ជាតិ
សង្គមជាតិ
ជំនន់ទឹកភ្លៀងនឹងលិចទីក្រុងភ្នំពេញទៀតក្នុងរដូវវស្សាឆ្នាំនេះ
× ភ្នំពេញ៖នៅរដូវវស្សាឆ្នាំនេះ ទឹកភ្លៀងនឹងជន់លិចរាជធានីភ្នំពេញ ដែលអាជ្ញាធរហៅថាទីក្រុងគជ់ទៀត ទោះបីជាអាជ្ញាធរសាលារាជធានីភ្នំពេញបានរៀបចំប្រព័ន្ធលូបង្ហូរ និងស្ថានីយ៍បូមទឹកចេញពីក្រុងរួចក៏ដោយ។ អភិបាលរាជធានីភ្នំពេញ អះអាងថា បញ្ហានេះ ដោយសារតែអាជ្ញាធរលំបាកក្នុងការស្តារសំរាមចេញពីក្នុងលូបង្ហូរទឹកស្អុយ ជាពិសេស គឺ សំរាមក្នុងស្ថានីយ៍បូមរំដោះទឹកទាំង ៨ស្ថានីយ៍ចេញពីក្រុង។
លោក ប៉ា សុជាតិវង្ស បានថ្លែងថាក្នុងរដូវវស្សាឆ្នាំនេះ ទឹកភ្លៀងនឹងបន្តជន់លិចទីក្រុងភ្នំពេញ ទៀត ដោយសារការចោលសំរាមដោយឥតសណ្តាប់ធ្នាប់ និងធ្វើឲ្យស្ទះលូទឹក និងស្ថានីយ៍បូមទឹក។ លោកបានថ្លែងដូចនេះ នៅក្នុងវេទិកាជួបពិភាក្សាជាមួយពលរដ្ឋដែលរងផលប៉ះពាល់ក្នុងគម្រោងស្តារបឹងស្តុកទឹកលូបឹងត្របែកប្រមាណ៣០០គ្រួសារក្រីក្រនៅព្រឹកថ្ងៃទី២៦ឧសភានេះ។
រដូវវស្សាក្នុងប្រទេសកម្ពុជា នឹងចាប់ផ្តើមចុងខែឧសភានេះហើយបញ្ចប់ទៅវិញនៅដើមខែវិច្ឆិកា។ អភិបាលរាជធានីភ្នំពេញ បានសង្កត់ធ្ងន់ថា សំរាមនៅតែជាបញ្ហាចោទដែលធ្វើឲ្យទីក្រុង ភ្នំពេញជន់លិចពេលភ្លៀងខ្លាំងម្តងៗ ។ ហើយថា ក្នុងនាមអាជ្ញាធរ លោកបានព្យាយាមជំរុញ ស្តារផងដែរ ប៉ុន្តែដោយសារសំរាមច្រើនត្រូវបានបង្ហូរចូលក្នុងលូនោះ ទើបអាជ្ញាធរមិនស្តារ ទាន់ពេលវេលា«ឆ្នាំនេះ ភ្លៀងនឹងលិចភ្នំពេញទៀត ដោយសារសំរាមបានហូរកកស្ទះក្នុងលូ និងបឹងស្តុកទឹក។ អាជ្ញាធរនឹងមិនអាចបូមបញ្ចេញទឹកតាមស្ថានីយ៍បូមទឹកទាំង ៨អស់បានទាន់ពេលទេ បើសំរាមកកស្ទះច្រើនក្រោមបាតបឹងនោះ»។ នេះជាការបញ្ជាក់របស់លោកអភិបាលរាជធានីភ្នំពេញ។
ជាមួយគ្នានេះ លោកក៏បានសំណូមពរឲ្យប្រជាជនចូលរួមសហការក្នុងការវេចខ្ចប់ទុកសំរាម ឲ្យបានត្រឹមត្រូវផងដែរ។ បើតាមលោក ប៉ា សុជាតិវង្ស រាជធានីភ្នំពេញមានស្ថានីយ៍បូមទឹកសរុបចំនួន៨ ក្នុងនោះ រួមមាន ស្ថានីយ៍បូមទឹកផ្សារចាស់ ស្ថានីយ៍ចតុមុខ ស្ថានីយ៍បឹងត្របែក ស្ថានីយ៍បឹងទំពុនទ្វារទឹក៧មករាលើសណ្តរស្ទឹងព្រែកត្នោតប៉ែកខាងលិចរាជធានីភ្នំពេញនិងស្ថានីយ៍ បូមទឹកកប់ស្រូវ ជាដើម។ នៅស្ថានីយ៍បឹងត្របែកមានម៉ូទ័របូមទឹកខ្នាតធំមុខកាត់ ១ម៉ែត្រចំនួន៨គ្រឿងដែរ។
កន្លងមក អាជ្ញាធរក៏បានដាក់បន្ថែមម៉ូទ័របូមទឹកខ្នាតធំមុខកាត់ ១ម៉ែត្ររថយន្តដឹកសំរាមសម្រាប់ដឹកសំរាមចេញពីស្ថានីយ៍នានា ឲ្យបានទាន់ពេលវេលា ព្រមទាំងចាត់មន្ត្រី ប្រចាំការត្រៀមលក្ខណៈប្រមូលសំរាមចេញពីស្ថានីយ៍នោះឲ្យកាន់តែប្រសើរទៀតផងផង៕
© រក្សាសិទ្ធិដោយ thmeythmey.com