ជាតិ
ប្រជាជនក្នុងសង្កាត់ចាក់អង្រែក្រោមទទួលអំណោយបបរគ្រឿងពីមូលនិធិ ម៉េងលី ជេ. គួច
×
ប្រជាជនខ្វះខាតនិងកម្មករសំណង់ប្រមាណ400នាក់ ស្ថិតក្នុងសង្កាត់ចាក់អង្រែក្រោមរាជធានីភ្នំពេញ កាលពីសប្ដាហ៍កន្លងទៅនេះបានមកទទួលបបរគ្រឿងដែលរៀបចំដោយមូលនិធិ ម៉េងលី ជេ. គួច តាមរយៈវិទ្យាស្ថាន និងសាលារៀន អន្តរទ្វីប អាមេរិកាំង។ កម្មវិធីបរិចា្ចគអាហារសប្បុរសធម៌លើកនេះផងដែរ មានការឧបត្ថម្ភដោយលោក Billy V. Chauvនិងក្រុមគ្រួសារ ដែលសព្វថ្ងៃកំពុងរស់នៅសហរដ្ឋអាមេរិក ដោយពួកគាត់មានសន្តានចិត្តអាណិតអាសូរដល់ប្រជាជនដែលខ្វះខាត លោកនិងក្រុមគ្រួសារក៏បានចូលរួមបរិចា្ចគនូវធនធានផ្ទាល់ខ្លួនមកមូលនិធិ ម៉េងលី ជេ. គួច ដើម្បីរៀបចំអាហារឲ្យប្រជាជនទាំងនោះបានទទួលទានឆ្ងាញ់ពិសា។
ក្រោយពីសកម្មភាពរបស់ធនាគាអាហារសប្បុរសធម៌ នៃមូលនិធិ ម៉េងលី ជេ. គួច បានចុះបរិចា្ចគផ្ទាល់នៅតាមសហគមន៍ក្រីក្រ មន្ទីពេទ្យ វត្តអារាម និងទីសាធារណៈផ្សេងៗក៏មានសប្បុរសជននានាក្នុង និងក្រៅប្រទេសបានចូលរួមបរិចា្ចគនូវថវិកាផ្ទាល់ខ្លួន ដើម្បីធ្វើយ៉ាងណាឲ្យសកម្មភាពសប្បុរសធម៌មួយនេះអាចនៅតែបន្តដំណើរការទៅមុខទៀតជាដរាប។
លោកឧកញ៉ា វេជ្ជបណ្ឌិត គួច ម៉េងលី នាយកប្រតិបត្តិ នៃមូលនិធិ ម៉េងលី ជេ. គួច ក៏បានថ្លែងអំណរគុណយ៉ាងជ្រាលជ្រៅចំពោះសប្បុរសជននានា ដែលបានចូលរួមបរិច្ចាគនូវថវិកាផ្ទាល់ខ្លួនដើម្បីគាំទ្រសកម្មភាពសប្បុរសធម៌នេះ។ ការចូលរួមចំណែកនេះ បានបង្ហាញឲ្យឃើញនូវវប្បធម៌ចែករំលែករបស់ខ្មែរយើងពោលគឺ ខ្មែរស្រលាញ់ខ្មែរ ហើយខ្មែរក៏ចេះជួយខ្មែរតាមរយៈអ្នកមានទ្រព្យធនច្រើនជួយដល់អ្នកក្រខ្សត់។ លោកឧកញ៉ា ក៏បានបន្តទៀតថា ក្នុងរយៈពេលជាងមួយឆ្នាំនេះ ធនាគារអាហារសប្បុរសធម៌ នៃមូលនិធិ ម៉េងលី ជេ. គួច បានចុះទៅបរិចា្ចគអាហាដល់សហគមន៍ក្រីក្រជាច្រើន និងបានជួយរំលែកទុក្ខលំបាករបស់ពួកគាត់បានមួយផ្នែកផងដែរ។ លោកឧកញ៉ាសង្ឃឹមថាសកម្មភាពសប្បុរសធម៌នេះនឹងមានការគាំទ្រ និងចូលរួមកាន់តែច្រើនពីសំណាក់សប្បុរសជនក្នុង និងក្រៅប្រទេស ដើម្បីឲ្យសកម្មភាពមួយនេះអាចប្រព្រឹត្តទៅលើសពី2ដងក្នុងមួយខែ។
បងស្រី យិន សុខគា បានថ្លែងអំណរគុណដល់មូលនិធិ ម៉េងលី ជេ. គួច ដែលបានផ្តល់ជាអាហារពេលព្រឹកដ៏ឆ្ងាញ់សម្រាប់កម្មករសំណង់បានពិសាទាំងអស់គ្នា។ បងស្រីបន្តទាំងទឹកមុខស្រស់ស្រាយថា ខណៈពេលនេះពួកគាត់កំពុងតែឃ្លានស្រាប់ បានទទួលទានបបរគ្រឿងរួចហើយក៏មានកម្លាំងធ្វើការងារយ៉ាងសស្រាក់សស្រាំបន្តទៀត៕
© រក្សាសិទ្ធិដោយ thmeythmey.com