ខ្មែរក្រហម
ជាតិ
×![]()
ដោយ: សារព័ត៌មានថ្មីៗ
នៅព្រឹកថ្ងៃទី២៩ ខែឧសភានេះ មន្ត្រីសាលាក្តីខ្មែរក្រហមបានចុះផ្សព្វផ្សាយអំពីកិច្ចការតុលាការក្នុងការជំនុំជម្រះក្តីលើអតីតមេដឹកនាំខ្មែរក្រហមជូនដល់សិស្សានុសិស្សជិត១ពាន់នាក់នៅវិទ្យាល័យ ហ៊ុន សែនកោះអណ្តែត ក្នុងស្រុកកោះអណ្តែត ខេត្តតាកែវ។
លោក នេត្រ ភក្ត្រា ដែលបានដឹកនាំការងារនេះបានថ្លែងថាការចុះផ្សព្វផ្សាយនេះ សាលាក្តីខ្មែរក្រហមបានចែកសៀវភៅសំណួរចម្លើយទាក់ទងនឹងអង្គជំនុំជម្រះវិសាមញ្ញក្នុងតុលាការកម្ពុជា កិច្ចការដែលតុលាការបានធ្វើក្នុងការនាំយកអតីតមេដឹកនាំជាន់ខ្ពស់ និងអ្នកទទួលខុសត្រូវខ្ពស់ក្នុងឧក្រិដ្ឋកម្មធ្ងន់ធ្ងរមកជំនុំជម្រះក្តី។ សៀវភៅនេះបានបំពេញបន្ថែមទៅលើការសិក្សាអំពីរបបកម្ពុជាប្រជាធិបតេយ្យរបស់សិស្សានុសិស្សនៅក្នុងកម្មវិធីសិក្សារបស់រដ្ឋ។
បើតាមលោក នេត្រ ភក្ត្រាដដែល បន្ទាប់ពីការធ្វើបទបង្ហាញដោយមន្ត្រីសាលាក្តីខ្មែរក្រហម សិស្សានុសិស្សមួយចំនួនក៏បានសួរសំណួរទាក់ទងនឹងរបបខ្មែរក្រហមផងដែរ ដែលសំណួរភាគច្រើនគឺផ្តោតថាហេតុអ្វីបានជារបបខ្មែរក្រហមសម្លាប់មនុស្សបំបាត់វត្តអារាម ជំនឿសាសនា និងបំបាត់សាលារៀនជាដើម។
សូមបញ្ជាក់ថា ការផ្សព្វផ្សាយនេះមានគោលបំណងពង្រឹងការយល់ដឹងរបស់សិស្សានុសិស្សដែលជាយុវជនជំនាន់ក្រោយបានយល់ច្បាស់ពីប្រវត្តិសាស្ត្រនៃរបបកម្ពុជាប្រជាធិបតេយ្យ និងការជំនុំជម្រះក្តីលើឧក្រិដ្ឋកម្មដែលបានកើតឡើងនៅក្នុងរបបខ្មែរក្រហម។ ការផ្សព្វផ្សាយនេះក៏ធ្វើឡើងដើម្បីការចងចាំ ពីឧក្រិដ្ឋកម្មដែលកើតឡើងក្នុងរបបខ្មែរក្រហមផងដែរ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
