ជាតិ
អង្គការជនពិការកម្ពុជាទាមទារឲ្យ គ.ជ.ប យកចិត្តទុកដាក់លើជនពិការ
×
អង្គការជនពិការកម្ពុជាស្នើដល់គ.ជ.ប ថ្មី បញ្ជ្រាបគោលនយោបាយទាក់ទងនឹងបញ្ហារបស់ជនពិការក្នុងវិស័យនយោបាយ ជាពិសេសបញ្ហាដែលតែងតែកើតឡើងពេលចុះឈ្មោះបោះឆ្នោត និងអំឡុងពេលទៅបោះឆ្នោត។នេះជាលើកឡើងរបស់លោក ងិន សៅរត្ន នាយកប្រតិបត្តិអង្គការជនពិការកម្ពុជា ក្នុងសន្និសីទសារពត៌មាន កាលពីថ្ងៃទី ២៨ ខែឧសភា ឆ្នាំ ២០១៥ ។
ជនពិការ មានសិទ្ធិស្មើគ្នានឹងជនមិនពិការ លើគ្រប់វិស័យក្នុងសង្គម ជាពិសេសវិស័យនយោបាយ។ តែជនពិការកម្ពុជានៅតែជួបបញ្ហាមួយចំនួនក្នុងវិស័យនយោបាយ ដូចជាពេលទៅចុះឈ្មោះបោះឆ្នោត អំឡុងពេលបោះឆ្នោត និងក្រោយពេលបោះឆ្នោត។
បើតាម លោក ងិន សៅរត្នជនពិការនៅតែជួបបញ្ហាមួយចំនួន ក្នុងវិស័យនយោបាយ ជាពិសេសពេលទៅចុះឈ្មោះ និងអំឡុងពេលបោះឆ្នោត។ លោករៀបរាប់យ៉ាងនេះថា៖ «បញ្ហាដែលកើតមានចំពោះបងប្អូនជនពិការមានដូចជា បញ្ហាផ្លូវចេញចូលទៅកាន់ការិយាល័យបោះឆ្នោតដំណាក់កាលទៅចុះឈ្មោះបោះឆ្នោត និងអំឡុងពេលទៅបោះឆ្នោត» ។
ដើម្បីដោះស្រាយបញ្ហាទាំងនេះ អង្គការជនពិការកម្ពុជាក៏សម្រេចផ្តួចផ្តើមគំនិតឲ្យមានគោលនយោបាយដាក់បញ្ចូលជនពិការទៅកាន់ គ.ជ.ប ថ្មី ក្នុងគោលបំណងធ្វើយ៉ាងណាធានាឲ្យបងប្អូនជនពិការគ្រប់ប្រភេទបានចូលរួមដោយស្មើភាព និងមិនមានការរើសអើងក្នុងវិស័យនយោបាយ និងវិស័យដទៃទៀតដូចជា សេដ្ឋកិច្ច និងសង្គមកិច្ច។
គួរបញ្ជាក់ថា អង្គការជនពិការកម្ពុជា គ្រោងនឹងដាក់សំណើរស្តីពីគោលនយោបាយបញ្ជ្រាបជនពិការទៅកាន់ គ.ជ.ប នៅសប្តាហ៍ក្រោយនេះ បន្ទាប់ពីជំនួបរវាងតំណាងអង្គការជនពិការកម្ពុជា និងលោក ហង្ស ពុទ្ធា អ្នកនាំពាក្យ គ.ជ.ប កាលពីថ្ងៃទី២៥ ខែឧសភា ឆ្នាំ២០១៥ ៕
© រក្សាសិទ្ធិដោយ thmeythmey.com