អន្តរជាតិ
នយោបាយអន្តរជាតិ
ចិនបញ្ជូនទ័ពទៅស៊ូដង់ខាងត្បូងដើម្បីការពារអណ្តូងប្រេង ឬរក្សាសន្តិភាព?
×![]()
កងទ័ពរក្សាសន្តិភាពចិនប្រហែល ៧០០នាក់នឹងចាប់ផ្តើប្រតិបត្តិការរបស់ខ្លួននៅក្នុងប្រទេសក្មេងខ្ចីស៊ូដង់ខាងត្បូងក្រោមឆ័ត្រអង្គការសហប្រជាជាតិ។ គេមើលឃើញហេតុផលពីរផ្សេងគ្នាដែលជំរុញឲ្យចិនដើរតួនាទីសកម្មជាងគេរហូតបញ្ជូនកងទ័ពរក្សាសន្តិភាពរបស់ខ្លួនទៅស៊ូដង់ខាងត្បូងទៀត។ ចិនទំនងជាចង់បង្ហាញពីការទទួលសុខត្រូវក្នុងការរក្សាសន្តិភាពក្នុងនាមជាមហាអំណាចឬ ដើម្បីការពារអណ្តូងប្រេងជាប្រយោជន៍ខ្លួននៅស៊ូដង់ខាងត្បូង។
ពិធីទទួលកងទ័ពរក្សាសន្តិភាពរបស់ក្រុងប៉េកាំងត្រូវបានរៀបចំឡើងនៅរដ្ឋធានី ជូបា (Juba) ស៊ូដង់ខាងត្បូងនៅថ្ងៃសុក្រនេះ។ នេះជាលើកដំបូងបំផុតដែលចិនបញ្ជូនកងកម្លាំងរក្សាសន្តិសុខមានទ័ពប្រយុទ្ធផងទៅក្នុងតំបន់ជម្លោះក្រៅប្រទេស ចាប់តាំងពីក្រុងប៉េកាំងក្លាយជាសមាជិកប្រទេសគាំទ្រប្រតិបត្តិការរក្សាសន្តិភាពពិភពលោកឆ្នាំ ១៩៩។ ក្នុងពិធីផ្លូវការនេះ គេសង្កេតឃើញមានវត្តមានឯកអគ្គរដ្ឋទូតចិនប្រចាំប្រទេសស៊ូដង់ខាងត្បូង Ma Qiang និងបេសកជនពិសេសតំណាងអគ្គលេខាធិការអង្គការសហប្រជាជាតិទទួលបន្ទុកកិច្ចការអាហ្វ្រិកEllen MargretheLoej។ អគ្គរដ្ឋទូតចិនថ្លែងតំណាងឲ្យរដ្ឋាភិបាលលោក ស៊ីជីនពិងថា នេះជាកងទ័ពរក្សាសន្តិភាពចិនដំបូងបំផុតដែលត្រូវបញ្ជូនទៅប្រតិបត្តិការនៅក្នុងតំបន់អាហ្វ្រិក ជ្រកក្រោមស្លាកអង្គការសហប្រជាតិ។ លោកបានបន្ថែមនេះ សកម្មភាពថ្មីនេះបញ្ជាក់ពីកិច្ចខិតខំប្រឹងប្រែង និងការចូលរួមកម្រិតថ្មីមួយរបស់ចិនក្នុងការរក្សាសន្តិសុខ បង្កើតសន្តិភាពជូនពិភពលោក។
ចំណែកមន្ត្រីអង្គការសហប្រជាតិខាងលើបានថ្លែងកោតសរសើរចិនដែលប្រឹងប្រែង និង ចូលរួមចំណែកយ៉ាងសំខាន់ក្នុងសកម្មភាពរក្សាសន្តិភាពពិភពលោកជាពិសេសអាហ្វ្រិក បើទោះជារដ្ឋាភិបាលចិនដឹងថាប្រតិបត្តិការនេះប្រឈមបញ្ហាខ្លាំងក៏ដោយ។ ក្នុងចំណោមកងកម្លាំងរក្សាសន្តិភាពចិននេះមានកងកម្លាំងសម្រាប់ប្រយុទ្ធ កងកម្លាំងវិស្វកម្ម គ្រូពេទ្យ និងកងកម្លាំងមិនមែនប្រយុទ្ធផង សរុប ៧០០នាក់។ អ្វីដែលសំខាន់កងម្លាំងថ្មីនេះមានសិទ្ធិប្រយុទ្ធករណីចាំបាច់ ដែលខុសប្លែកពីកងទ័ពរក្សាសន្តិភាពមុនៗដែលចិនប្រើប្រាស់ចូលរួមរក្សាសន្តិភាពពិភពលោក។
ប៉ុន្តែយ៉ាងណាក៏ដោយ ចេតនារបស់ចិន ក្រៅពីបង្ហាញពិភពលោកថាខ្លួនជាមហាអំណាចមានទំនួលខុសត្រូវខ្ពស់ក្នុងការរក្សានិងបង្កើតសន្តិភាពជូនពិភពលោក ក្រុងប៉េកាំងបញ្ជូនកងទ័ពរាប់រយនាក់មានទាំងទ័ពប្រយុទ្ធផងដើម្បីជួយការពារអណ្តូងប្រេងរបស់ខ្លួននៅស៊ូដង់ខាងត្បូង។ អាចជាការពិតដែរ ដែលចិនត្រូវដើរតួនាទីឲ្យសកម្មក្នុងការរក្សាសន្តិភាពនៅរដ្ឋអាហ្វ្រិកនេះ ដ្បតិចិនមានក្រុមហ៊ុនវិនិយោគរបស់ខ្លួនជាច្រើន ប្រថុយបោះទុនរកស៊ីរាប់រយលានដុល្លារនៅស៊ូដង់ខាងត្បូង ក្នុងវិស័យថាមពល ជាពិសេសបូប ខួង យកប្រេង និងរ៉ែផង។ បើសិនជាចិនបណ្តែតបណ្តោយទុកឲ្យជម្លោះស៊ូដង់ខាងត្បូងកាន់តែរីករាលដាលធំ វាប្រាកដណាស់ថា ចិនអាចបង់លុយវិនិយោគនៅពេលខាងមុខ។ ប៉ុន្តែ ក្នុងសំណុំរឿងនេះ បើមើលចិនក្នុងផ្លូវល្អ ចិនអាចបារម្ភខ្លាំងថាកាលណាជម្លោះរីកធំ កាត់ផ្តាច់ការបូមខួងយកប្រេង ស៊ូដង់នឹងអាចក្ស័យធន់ ព្រោះការនាំប្រេងចេញជាប្រភពចំណូលសំខាន់បំផុតរបស់ប្រទេសក្មេងខ្ចីនៅអាហ្វ្រិកមួយនេះ។
គួរបញ្ជាក់ថា ក្រោយជម្លោះស៊ូដង់ខាងត្បូងផ្ទុះឡើងក្រោយប្រទេសនេះប្រកាសឯករាជ្យឆ្នាំ ២០១១ មនុស្សរាប់លាននាក់បាត់បង់ជម្រក រស់ពិបាកវេទនាជាងស្លាប់ ខ្វះមុខ ខ្វះក្រោយ និងបន្តរត់គេចពីគ្រាប់ផ្លោងនិងការកាប់សម្លាប់។ បើតាមរបាយការណ៍ស្ថាប័នសិទ្ធិមនុស្ស ជនស៊ីវិលច្រើនជាង ១ម៉ឺននាក់ បានស្លាប់បាត់បង់ជីវិត ព្រោះសង្គ្រាមស៊ីវិលដ៏រាំរ៉ៃនេះ។ ជម្លោះនេះផ្តើមចេញមកពីការដណ្តើមអំណាច និងចោទប្រកាន់គ្នារឿងធ្វើរដ្ឋប្រហាររវាងភាគីនយោបាយពីរក្រុម ទីមួយ ប្រធានាធិបតី SalvaKiir និងក្រុមទីពីរអនុប្រធានាធិបតី RiekMachar។ ចាប់ពីមានការចោទប្រកាន់គ្នារឿរដ្ឋប្រហារ ជម្លោះបង្ហូរឈាមគ្នាក៏បន្តរហូតដល់ពេលបច្ចុប្បន្ននេះ បើទោះជាមានការចរចា បង្កើតកិច្ចព្រមព្រៀងសន្តិភាពរួមគ្នាកន្លងមកក៏ដោយ៕
© រក្សាសិទ្ធិដោយ thmeythmey.com
