ជាតិ
តើព្រះរាជបរមងា«ព្រះស្រីលោកធម្មិករាជ»មានអត្ថន័យដូចម្តេច?
× ភ្នំពេញ៖កម្ពុជានឹងរៀបចំពិធីថ្វាយព្រះរាជបរមងារកិត្តិយសថ្វាយព្រះមហាក្សត្រ ព្រះបរមនាថ នរោត្តម សីហមុនី នៅព្រឹកថ្ងៃទី៣មិថុនានេះដែលក្នុងពិធីនោះនឹងមានវត្តមានចូលរួមពីថ្នាក់ដឹកនាំនៃស្ថាប័នកំពូល ព្រមទាំងព្រះសង្ឃ១ម៉ឺនអង្គ។ តើនរណាជាអ្នកថ្វាយព្រះបរមងារដល់ព្រះអង្គ? ហើយថាតើព្រះបរមងារនេះមានអត្ថន័យយ៉ាងដូចម្តេច?
អ្នកដែលសម្រេចថ្វាយព្រះបរមងារ «ព្រះស្រីលោកធម្មិករាជ» ដល់ព្រះមហាក្សត្រ ព្រះបរមនាថ នរោត្តម សីហមុនីគឺអង្គការព្រះពុទ្ធសាសនាពិភពលោក។ លោក ជ័យ ចាប ទីប្រឹក្សាលោកឧបនាយករដ្ឋមន្ត្រីរដ្ឋមន្ត្រីក្រសួងព្រះបរមរាជវាំងបានរៀបរាប់ប្រាប់សារព័ត៌មានថ្មីៗថា អង្គការអន្តរជាតិផ្នែកព្រះពុទ្ធសាសនាបានស្វែងរកព្រះមហាក្សត្រនៃប្រទេសនានានៅក្នុងពិភពលោកដែលយកចិត្តទុកដាក់ និងលើកស្ទួយព្រះពុទ្ធសាសនា ដើម្បីថ្វាយព្រះបរមងារនេះ។ បើតាមការអះអាងរបស់លោក ជ័យ ចាប ដដែល ថ្នាក់ដឹកនាំនៃអង្គការអន្តរជាតិខាងព្រះពុទ្ធសាសនាបានរកឃើញព្រះមហាក្សត្រខ្មែរថាជាអ្នកយកព្រះទ័យទុកដាក់ខ្លាំងលើវិស័យព្រះពុទ្ធសាសនា។ ហើយថានៅថ្ងៃថ្វាយព្រះបរមងារនៅថ្ងៃទី៣មិថុនានោះ តំណាងអង្គការអន្តរជាតិផ្នែកព្រះពុទ្ធសាសនាមកពីប្រទេសចំនួន៣ គឺម៉ុងហ្គោលី សិង្ហបុរី និង ប្រទេសជប៉ុន គឺជាអ្នកនាំយក ព្រះបរមងារភ្ជាប់ជាមួយនឹងបណ្ណបញ្ជាក់ព្រះបរមងារនេះ ថ្វាយព្រះមហាក្សត្រ។
លោក ជ័យ ចាបដែលធ្លាប់បានចូលរួមប្រជុំស្តីពីការរៀបចំពិធីថ្វាយព្រះបរមងារដល់ព្រះមហាក្សត្រដែរនោះបានបញ្ជាក់យ៉ាងដូច្នេះថា៖«គេបានសម្រេចថ្វាយព្រះបរមងារកិត្តិយសនេះ ដល់ព្រះមហាក្សត្រយើងពីព្រោះគេបានតាមដានឃើញព្រះអង្គគឺជាអ្នកបដិបត្តិព្រះពុទ្ធសាសនាពិតប្រាកដនិងបានយកព្រះហរទ័យទុកដាក់លើវិស័យព្រះពុទ្ធសាសនាខ្លាំងមែនទែន។ ព្រះអង្គយាងតាំងសីលរាល់ថ្ងៃសីលទាំង៤ដងក្នុងមួយខែ។ក្រៅពីព្រះវិហារព្រះកែវមរកត ព្រះអង្គក៏យាងទៅវត្តផ្សេងៗដែរ។ ហើយព្រះអង្គឧបត្ថម្ភច្រើនណាស់ដល់វិស័យព្រះពុទ្ធសាសនា»។ លោក ជ័យ ចាប ដែលជាអតីតសាស្ត្រាចារ្យភាសាខ្មែរបានពន្យល់អំពីអត្ថន័យនៃព្រះបរមងារយ៉ាងដូច្នេះ៖«ព្រះស្រីលោកធម្មិករាជ មានន័យថាក្សត្រដែលយកចិត្តទុកដាក់និងឧបត្ថម្ភលើកស្ទួយព្រះពុទ្ធសាសនាក្នុងពិភពលោក»។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានអះអាងឲ្យដឹងថាមនុស្សជិត២ម៉ឺននាក់នឹងអាចមានវត្តមាននៅក្នុងពិធីនៅព្រឹកថ្ងៃទី៣មិថុនានោះដោយក្នុងនោះគ្រាន់តែព្រះសង្ឃនឹងមានចំនួន១ម៉ឺនអង្គរួចទៅហើយ។
លោកនាយករដ្ឋមន្ត្រី ហ៊ុន សែន ប្រធានរដ្ឋសភាលោក ហេង សំរិនតំណាងព្រឹទ្ធសភា ថ្នាក់ដឹកនាំតាមក្រសួង និងមន្ត្រីរាជការនឹងមានវត្តមាននៅក្នុងពិធីនោះដែរ។ ដើម្បីសម្រួលដល់ការរៀបចំពិធី កំណាត់ផ្លូវជុំវិញព្រះបរមរាជវាំង នឹងត្រូវបិទចាប់ពីថ្ងៃទី២មិថុនានេះ៕
© រក្សាសិទ្ធិដោយ thmeythmey.com