ជាតិ
បទវិភាគ
តើប្រតិកម្មថ្មីៗអំពីបញ្ហាព្រំដែន ដើម្បីបូរណភាពទឹកដី ឬប្រជាភិថុតិ?
× ភ្នំពេញ៖ ទំនាស់បញ្ហាព្រំដែនរវាងកម្ពុជាជាមួយប្រទេសជិតខាងរបស់ខ្លួន ធ្លាប់កើតមានឡើងតាំងពីយូរមកហើយក្នុងប្រវត្តិសាស្ត្ររបស់ខ្លួន ជាពិសេស ទំនាស់បញ្ហាព្រំដែនរវាងកម្ពុជាជាមួយប្រទេសវៀតណាមនិងប្រទេសថៃ ដែលបានកើតឡើងតាំងពីសម័យអាណានិគមនិយមបារាំង។ រហូតមកដល់សព្វថ្ងៃនេះ កម្ពុជាបានបាត់បង់ទឹកដី របស់ខ្លួនចំនួន២១ខេត្តទៅខាងវៀតណាម និង១២ខេត្តទៅខាងប្រទេសថៃ។ លើសពីនេះទៀត សូម្បីតែ ទឹកដីរបស់ កម្ពុជាដែលនៅសេសសល់ ទំហំ ១៨១ ០៣៥ គីឡូម៉ែត្រការ៉េ ក៏ត្រូវបានគេអះអាងថា កំពុងត្រូវបាត់បង់បន្ថែមទៀត ជាបន្តបន្ទាប់ ទាំងព្រំដែនដីគោក ព្រំដែនទឹកនិងដីកោះ។ ក្នុងស្ថានភាពបែបនេះ ជំរុញឱ្យអ្នកស្រឡាញ់ទឹកដីពិតប្រាកដមានការឈឺចាប់ សោកស្ដាយ និងរិះរកវិធីផ្សេងៗគ្រប់បែបយ៉ាងក្នុងបំណងទាមទារទឹកដីដែលបានបាត់បង់ ទាំងនោះមកវិញ ឬយ៉ាងហោចណាស់ ការពារបូរណភាពទឹកដីដែលបានកំណត់ក្នុងផែនទីផ្លូវការរបស់កម្ពុជាសព្វថ្ងៃ។ ក្រោពីនេះ ក៏មានអ្នកនយោបាយមួយចំនួនឆ្លៀតទាញយកផលចំណេញពីបញ្ហានៃការបាត់បង់ទឹកដីនេះផងដែរ។
ទាក់ទិននឹងបញ្ហាព្រំដែន ឬបូរណភាពដែនដីនេះ អ្នកដឹកនាំនិងអ្នកនយោបាយខ្មែរជាច្រើនជំនាន់ តែងតែយកវាជាកម្មវត្ថុសម្រាប់ចោទប្រកាន់គ្នាទៅវិញទៅមក ដើម្បីជាឈ្នាន់ក្នុងការឡើងកាន់អំណាចនិងអាវុធសម្រាប់វាយប្រហារដៃគូប្រជែងរបស់ខ្លួនផងដែរ។ ជាក់ស្ដែង អតីតព្រះមហាក្សត្រខ្មែរនិងអតីតអ្នកដឹកនាំខ្មែរភាគច្រើន សុទ្ធតែត្រូវបានគេចោទថាបានធ្វើឱ្យបាត់បង់ទឹកដី។ សូម្បីតែ ព្រះមហាវីរក្សត្របរមរនតកោដ្ឋ នរោត្តម សីហនុ ដែលទើបតែយាងចូលទិវង្គតកាលពីឆ្នាំ២០១២នោះ ក៏មានមតិខ្លះធ្លាប់ចោទប្រកាន់ព្រះអង្គអំពីរឿងនេះដែរ។ ដូចគ្នាដែរអ្នកដឹកនាំខ្មែរក្រោយឆ្នាំ១៩៧៩ រហូតមកដល់សព្វថ្ងៃនេះ ក៏ត្រូវបានគេចោទប្រកាន់អំពីការធ្វើឱ្យបាតបង់ទឹកដីដែរ។
ជាការឆ្លើយតបទៅនឹងការចោទប្រកាន់របស់មន្ដ្រីបក្សប្រឆាំងនិងមហាជន សម្ដេច ហ៊ុន សែន ក៏ធ្លាប់បានប្រើសំដីផ្ចាញ់ផ្ចាលខ្លាំងៗទៅអ្នកដែលចង់បានទឹកដីដែលបានបាត់បង់នោះមកវិញ ដូចជាថា «...បើមានអ្នកចង់ទាមទារយកទឹកដីកម្ពុជាក្រោមមកវិញ សូមអញ្ជើញ ខ្ញុំរៀបចំម្ឈូសជូន...» និងធ្លាប់បានថ្លែងការណ៍បកស្រាយរឿងព្រំដែននៅក្នុងរដ្ឋសភាជាបន្តបន្ទាប់ ឯអ្នកទទួលខុសត្រូវផ្ទាល់ក្នុងរឿងនេះ ក៏ធ្លាប់ស្រាយបំភ្លឺអំពីរឿងព្រំដែននេះ ជាបន្តបន្ទាប់ដែរ។ ទោះបីជាយ៉ាងណាក៏ដោយ ក៏បញ្ហាព្រំដែនហាក់ដូចជាស្ងប់មិនបានយូរទេ ឱ្យតែជិតដល់ពេលបោះឆ្នោតម្ដងៗ បញ្ហានេះតែងតែកក្រើកឡើងវិញ។ ជាក់ស្ដែង នៅចុងខែឧសភានិងដើមខែមិថុនាឆ្នាំ២០១៥នេះ ដែលជាពេលមួយដែលបក្សនយោបាយនីមួយៗ ត្រូវកសាងស្នាដៃនិងកេរ្ដ៍ឈ្មោះ សម្រាប់ការបោះឆ្នោតក្រុមប្រឹក្សាឃុំ សង្កាត់ នាឆ្នាំ២០១៧ និងការបោះឆ្នោតជ្រើសតាំងតំណាងរាស្ត្រ នាឆ្នាំ២០១៨ ខាងមុខ បញ្ហាព្រំដែនក៏បានកក្រើកឡើងវិញ ចំពេលដែលភាគីវៀតណាមបានចូលមកបាញ់ឆ្នាំបំផ្លាញដំណាំរបស់ពលរដ្ឋខ្មែរនៅស្រុមេមត់ ខេត្តត្បូងឃ្មុំ និងបានជីកស្រះចំនួនប្រាំបីនៅក្នុងទឹកដីកម្ពុជា ត្រង់តំបន់មួយក្នុងស្រុកអូរយ៉ាដាវ ខេត្តរតនគិរី។
ជាប្រតិកម្មតបក្នុងករណីនេះ ប្រជាពលរដ្ឋដែលជាអ្នករងគ្រោះផ្ទាល់ តំណាងរាស្ត្របក្សសង្គ្រោះជាតិ និងសកម្មជនដទៃទៀត បាននាំគ្នាចុះទៅដល់កន្លែងកើតហេតុ ដើម្បីពិនិត្យមើលហេតុការណ៍ដោយផ្ទាល់ បើទោះបីជាមានការរារាំងពីអាជ្ញាធរខ្មែរនិងវៀតណាមក៏ដោយ។ លើសពីនេះទៀត តំណាងរាស្ត្របក្សប្រឆាំងមួយចំនួន បានចោទថា រដ្ឋាភិបាលកម្ពុជា បានប្រើផែនទីក្លែងក្លាយដើម្បីកំណត់ព្រំដែនជាមួយប្រទេសវៀតណាម ដែលបានធ្វើឱ្យបាត់បង់ទឹកដីរបស់កម្ពុជាយ៉ាងច្រើន និងថែមទាំងបានទាមទារឱ្យរដ្ឋាភិបាលបង្ហាញផែនទីដែលខ្លួនបានប្រើនោះផងដែរ។ ផ្ទុយទៅវិញ សម្ដេចនាយករដ្ឋន្ត្រី ហ៊ុន សែន និង លោក វ៉ា គឹហុង ដែលជាអ្នកទទួលខុសត្រូវបញ្ហាព្រំដែន បានប្រតិកម្មយ៉ាងខ្លាំងនឹងតំណាងរាស្ត្របក្សប្រឆាំងដែលបានចោទប្រកាន់នោះ ហើយក៏បានស្នើឱ្យអ្នកចោទប្រកាន់រូបនោះបង្ហាញផែនទីដែលខ្លួនអះអាងថា ជាផែនទីពិតនោះផងដែរ។
មកទល់នឹងពេលនេះ ទាំងភាគីរដ្ឋាភិបាល ទាំងភាគីបក្សប្រឆាំង មិនទាន់បានយកផែនទីរបស់ខ្លួនដែលបានអះអាងថាជាផែនទីត្រឹមត្រូវរៀងៗខ្លួននោះ មកបង្ហាញជាសាធារណៈ ដើម្បីបំបាត់ការសង្ស័យពីមហាជន និងដើម្បីបង្ហាញ ភាពស្អាតស្អំរបស់ខ្លួននៅឡើយទេ។ ដរាបណា សច្ចភាពមិនទាន់ត្រូវបានគេលាតត្រដាង ដរាបនោះ ភាគីទាំងពីរសុទ្ធិតែត្រូវបាត់បង់ប្រជាប្រិយភាពរបស់ខ្លួន ដោយភាគីរដ្ឋាភិបាលត្រូវគេចោទថាបានប្រើផែនទីមិនត្រឹត្រូវដែលធ្វើឱ្យបាត់បង់ទឹកដី ចំណែកឯតំណាងរាស្ត្របក្សប្រឆាំងវិញក៏ត្រូវគេចោទថា បានធ្វើជាភិថុតិដើម្បីប្រជាប្រិយភាពខាងនយោបាយ ដោយសារតែការចោទប្រកាន់គ្មានភស្តុតាង និងគ្មានមូលដ្ឋានច្បាស់លាស់។
ទោះបីជាយ៉ាងនេះក៏ ក៏ពេលថ្មីៗបំផុតនេះ រដ្ឋាភិបាលកម្ពុជាបានទទួលស្គាល់ថា ស្រះទាំងអស់ដែលបានជីកនៅលើទឹកដីខេត្តរតនគិរីដោយភាគីវៀតណាមនោះ ពិតជាការរំលោភមកក្នុងដែនអធិបតេយ្យភាពរបស់កម្ពុជាប្រាកដមែន ព្រមទាំងបានបញ្ជាឱ្យក្រសួងការការបរទេសរបស់ខ្លួន សរសេរកំណត់ទូតចំនួនពីរលើកផ្ញើជូនស្ថានទូតវៀតណាមប្រចាំកម្ពុជាដើម្បីតវ៉ារឿងនេះ។ រហូតមកដល់ពេលនេះ ប្រទេសវៀតណាម ដែលជាមិត្តចាក់ទឹកមិនលេចរបស់រដ្ឋាភិបាលបច្ចុប្បន្ននោះ មិនទាន់បានឆ្លើយតបយ៉ាងណានៅឡើយទេ។
ក្នុងការបង្ហាញជំហរប្រតិកម្ម តវ៉ាជាមួយវៀតណាម ជាលើកដំបូង ដ៏កម្រ និងមិនដែលធ្លាប់មានពីមុនមករបស់រដ្ឋាភិបាលដែលដឹកនាំដោយបក្សប្រជាជនកម្ពុជានេះ ត្រូវបានទទួលការស្វាគមនិងការគាំទ្រដោយសារធារណៈមតិ អ្នកវិភាគមួយចំនួន រួមទាំងបក្សប្រឆាំងផងដែរ។ លើសពីនេះទៀត ស្របពេលជាមួយគ្នានេះ អន្តោប្រវេសន៍វៀតណាម ក៏ត្រូវរដ្ឋាភិបាលកម្ពុជាចាប់ផ្ដើមត្រួតពិនិត្យភាពស្របច្បាប់ និងចាប់បញ្ជូនចេញទៅស្រុករបស់ខ្លួនវិញ នូវអន្តោប្រវេសន៍រូបណាដែលស្នាក់នៅកម្ពុជាដោយមិនស្របច្បាប់។
ជាការវិនិច្ឆ័យជំហានដំបូងចំពោះ ចំណាត់ការដ៏កម្រ គួរជាទីចាប់អារម្មណ៍ និងជាការគាប់ជួនគ្នានេះ អ្នកវិភាគមួយចំនួនសង្ស័យថា អាចជាការរៀបចំទុកជាមុន និងជាឈុតល្ខោន ដែលបក្សប្រជាជនកម្ពុជាបានរៀបចំឡើងដើម្បីស្ដារមុខមាត់ និងប្រជាប្រិយភាពរបស់ខ្លួន ដែលបាននិងកំពុងធ្លាក់ចុះជាបន្តបន្ទាប់ ដោយសាតែ បញ្ហាព្រំដែន អន្តោប្រវេសន៍វៀតណាមខុសច្បាប់ អំពើពុករលួយ ប្រព័ន្ធតុលាការមិនឯករាជ្យ ការកាប់បំផ្លាញព្រៃឈើ...។ ទោះបីជាយ៉ាងនេះក៏ដោយ ក៏ការសន្មតនេះមិនទាន់ជាការណ៍ពិតដែរ វាគ្រាន់តែជាការសង្ស័យរបស់អ្នកវិភាគមួយចំនួនប៉ុណ្ណោះ។ ការណ៍ពិតជាក់ស្ដែងយ៉ាងណានោះសូមរង់ចាំពិនិត្យនិងតាមដានដោយយកចិត្តទុកដាក់ទាំងអស់គ្នា។
ផ្ទុយទៅវិញ ប្រសិនបើ អ្វីដែលរដ្ឋាភិបាលកំពុងធ្វើចំពោះបញ្ហាព្រំដែននិងអន្តោប្រវេសន៍វៀតណាមនោះ គឺជាជំហរពិតរបស់ខ្លួន ដែលចេញពីសុឆន្ទៈពិតរបស់រដ្ឋាភិបាល យើងជាអ្នកវិភាគ ពលរដ្ឋគ្រប់រូប រួមទាំងបក្សប្រឆាំងផង ត្រូវតែគាំទ្រដោយឥតក្ខខណ្ឌ និងសូមសរសើរដោយស្មោះចំពោះរបត់ថ្មីនេះ ហើយសូមឱ្យវាវិវឌ្ឍទៅមុខនិងស្ថិតស្ថេរក្នុងមនសិការនៃអ្នកដឹកនាំខ្មែរគ្រប់រូប គ្រប់ជំនាន់។
លើសពីនេះទៀត ក្នុងបុព្វហេតុជាតិ និងបូរណភាពទឹកដីរួម រដ្ឋាភិបាលខ្មែរ បក្សប្រឆាំង និងសកម្មជនព្រំដែនក្នុងនិងក្រៅប្រទេស មិនត្រូវធ្វើៗអ្វីដាច់ដោយឡែកៗពីគ្នា ដោយលាក់លៀម ប្រឆាំងគ្នា និងពោរពេញដោយកលល្បិច ដើម្បីទាញយកប្រជាប្រិយភាពនិងជាការធ្វើប្រជាភិថុតិនោះទេ។ ផ្ទុយទៅវិញ ពួកគេត្រូវរួមសាម្គីគ្នា ដើម្បីខ្មែរខ្លាំងនិងឈ្នះសត្រូវគ្រប់ទិសទី ដូចព្រះរាជបណ្ដាំរបស់អតីតព្រះមហាវីរក្សត្រ នរោត្តម សីហនុ និងក៏ដូចជា បណ្ដាំរបស់ សម្ដេច ជា ស៊ីម ដែលទើបតែទទួលមរណភាពកាលពីថ្ងៃទី ៨ ខែមិថុនា ឆ្នាំ២០១៥នេះដែរ៕
© រក្សាសិទ្ធិដោយ thmeythmey.com