ជាតិ
សេដ្ឋកិច្ច
កម្ពុជា-ជប៉ុនចុះហត្ថលេខាលើជំនួយជាង២៧លានដុល្លារធ្វើទឹកស្អាតក្នុងខេត្តកំពត
× ប្រទេសកម្ពុជា និងជប៉ុន បានចុះហត្ថលេខាទទួល និងផ្តល់ជំនួយឥតសំណង ដែលមានទំហំ៣២៨៤ លានយ៉េន ប្រមាណជាង២៧លានដុល្លារ។ ជំនួយនេះនឹងត្រូវផ្តល់ឲ្យរដ្ឋាភិបាលកម្ពុជាដើម្បីផលិតទឹកស្អាតនៅក្នុងខេត្តកំពត និងការបណ្តុះបណ្តាលធនធានមនុស្ស។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និង Itsu Adachi ប្រធានទីភ្នាក់ងារ សហប្រតិបត្តិការអន្តរជាតិប្រទេសជប៉ុនJICA បានចុះហត្ថលេខាទទួល និងផ្តល់ជំនួយឥតសំណងប្រមាណជាង២៧លានដុល្លារនេះ នៅថ្ងៃទី១៦ខែមិថុនា។
បើយោងតាមសេចក្តីប្រកាសព័ត៌មាន ក្នុងចំណោមជំនួយហិរញ្ញវត្ថុចំនួន ៣,២៨៤លានយ៉េននេះ ថវិកា២៩៨៥លានយ៉េន (២៤.៨៧លានដុល្លារ) នឹងត្រូវប្រើប្រាស់សម្រាប់គម្រោងពង្រីកប្រព័ន្ធផ្គត់ផ្គង់ទឹកស្អាត។ រីឯទឹកប្រាក់ ២៩៩លានយ៉េន (២.៥ លានដុល្លារ) នឹងត្រូវប្រើប្រាស់សម្រាប់គម្រោងបណ្តុះបណ្តាលធនធានមនុស្ស។ ជំនួយនេះនឹងអនុញ្ញាតឲ្យមន្ត្រីរាជការវ័យក្មេងចំនួន២៤នាក់ ទៅសិក្សានៅប្រទេសជប៉ុនរយៈពេល២ឆ្នាំ។
ប្រទេសជប៉ុនបាននាំមុខគេក្នុងចំណោមដៃគូអភិវឌ្ឍន៍ ដែលជួយកម្ពុជាក្នុងវិស័យទឹកស្អាតតាំងដើមទស្សវត្ស១៩៩០។ ការរៀបចំប្រព័ន្ធផ្គត់ផ្គង់ទឹកស្អាតនៅក្នុងរាជធានីភ្នំពេញ នៅខេត្តសៀមរាប នៅកំពង់ចាម និងបច្ចុប្បន្នក្នុងខេត្តកំពត សុទ្ធតែបានប្រើប្រាស់ជំនួយរបស់ជប៉ុន៕
© រក្សាសិទ្ធិដោយ thmeythmey.com