ចន ច័ន្ទលក្ខិណា៖ ដាច់និស្ស័យប្តីប្រពន្ធ តែនិស្ស័យបងប្អូនកាត់មិនបានឡើយ
×![]()
ដោយ: ថ្មីៗ
តារាសម្តែង ចន ច័ន្ទលក្ខិណា នៅថ្ងៃទី២៣ ខែមិថុនា នេះ បានបង្ហោះរូបថត៥សន្លឹកនៅលើគណនីហ្វេសប៊ុករបស់ខ្លួន ដើម្បីបង្ហាញថា ទោះបីជាចំណងអាពាហ៍ពិពាហ៍ជិត២០ឆ្នាំជាមួយលោក យុត្ថារ៉ា ឆានី បានបញ្ចប់ក៏ដោយ ប៉ុន្តែទំនាក់ទំនងរបស់អ្នកទាំងពីរក្នុងភាពជាបងប្អូនស្ថិតនៅជាដរាប។
ជាមួយនឹងការបង្ហោះជាមួយនឹងរូបថតដែលពោរពេញដោយស្នាមញញឹម ចន ច័ន្ទលក្ខិណា បានសរសេរថា៖ «និស្ស័យប្តីប្រពន្ធយើងអាចកាត់បាន តែនិស្ស័យបងប្អូនគឺកាត់មិនបានឡើយ»។ យោងតាមសំណេរ អ្នកទាំងពីរ និងក្រុមការងារ បានថតរូបរួមគ្នានៅទូរទស្សន៍បាយ័ន កាលពីថ្ងៃទី១៨ ខែឧសភា ឆ្នាំ២០១៥ ។
ការចែកផ្លូវគ្នារបស់តារាសម្តែងជើងចាស់ទាំងពីរ បង្កមតិលើកឡើងអវិជ្ជមានជាច្រើន។ អ្នកខ្លះបានចោទប្រកាន់ ចន ច័ន្ទលក្ខិណា ថា ស្រឡាញ់អ្នកផ្សេងដោយសារអំណាចទឹកប្រាក់ ហើយអ្នកខ្លះទៀតថា លោក យុត្ថារ៉ា ឆានី មានស្រីថ្មី រួមទាំងការលើកឡើងផ្សេងៗទៀត។គួរឲ្យកត់សម្គាល់ផងដែរ លោក យុត្ថារ៉ា ឆានី កាលពីពេលថ្មីនេះ បានសរសេរបញ្ជាក់នៅលើហ្វេសប៊ុករបស់ខ្លួនថា ពាក្យពេចន៍កម្សត់ផ្សេងៗដែលលោកបានចែករំលែកនោះ មិនមែនជាគំនិតផ្ទាល់របស់លោកឡើយ វាគ្រាន់តែទ្រឹស្តីដែលគេបានសរសេរមកតែប៉ុណ្ណោះ។
អ្នកទាំងពីរបានបែកបាក់គ្នាដោយបន្សល់នូវអនុស្សារីយ៍កូនស្រីស្រស់ស្អាតម្នាក់។ ទោះបីជាលោក យុត្ថារ៉ា ឆានី ទទួលសិទ្ធិគ្រប់គ្រងកូនក៏ដោយ ប៉ុន្តែកូនស្រីនៅតែអាចទៅមកជាមួយម្តាយ។ បច្ចុប្បន្ន ចន ច័ន្ទលក្ខិណា កំពុងមានទំនាក់ទំនងស្នេហាជាមួយបុរសពោះម៉ាយម្នាក់៕
© រក្សាសិទ្ធិដោយ thmeythmey.com
