ជាតិ
នយោបាយជាតិ
លោក សម រង្ស៊ី៖ ក្រោមការដឹកនាំរបស់លោក ហ៊ុន សែន CPP នឹងរឹងមាំជាលំដាប់
× លោក សម រង្ស៊ី កាលពីថ្ងៃទី២៣ ខែមិថុនា បានសរសេរលិខិតអបអរសាទរលោក ហ៊ុន សែន ដែលបានទទួលតំណែងជាប្រធានគណបក្សប្រជាជនកម្ពុជា ក្រោយមរណភាពរបស់លោក ជា ស៊ីម។ ក្នុងលិខិត ប្រធានគណបក្សប្រឆាំង មានជំនឿថា គណបក្សប្រជាជនកម្ពុជាក្រោមការដឹកនាំរបស់លោក ហ៊ុន សែន នឹងមានភាពរឹងមាំជាលំដាប់។ នៅក្នុងការឆ្លើយឆ្លងគ្នាតាមលិខិត មេដឹកនាំគណបក្សនយោបាយទាំងពីរក៏បានលើកឡើងពីផ្លែផ្កានៃវប្បធម៌សន្ទនាផងដែរ។
«ខ្ញុំមានជំនឿយ៉ាងមុតមាំថា ក្រោមការដឹកនាំរបស់សម្តេចអគ្គមហាសេនាបតីតេជោ គណបក្សប្រជាជនកម្ពុជានឹងបន្តរីកចម្រើនរឹងមាំជាលំដាប់»។ នេះបើតាមសំណេរជូនពររបស់លោក សម រង្ស៊ី ផ្ញើរទៅកាន់លោក ហ៊ុន សែន។
ប្រធានគណបក្សសង្គ្រោះជាតិ បានបន្ថែមថា វប្បធម៌សន្ទនារវាងគណបក្សទាំងពីរ នឹងចាក់ឫសចាក់គល់កាន់តែជ្រៅ ហើយនឹងពង្រឹងពង្រីកកាន់តែទូលំទូលាយថែមទៀតក្នុងគោលដៅរួមដើម្បីជាប្រយោជន៍ប្រទេសជាតិ និងប្រជារាស្ត្រខ្មែរទាំងមូល។
លោកនាយករដ្ឋមន្ត្រី ហ៊ុន សែន នាថ្ងៃទី២៤ ខែមិថុនា បានសរសេរតបទៅកាន់លោក សម រង្ស៊ី វិញថា វប្បធម៌សន្ទនាពិតជាបាននាំមកនូវលទ្ធផលដ៏ល្អសម្រាប់ជាតិ និងប្រជាជន។ ប្រធានគណបក្សកាន់អំណាច រំពឹងផងដែរថា៖ «ខ្ញុំសង្ឃឹមថា គណបក្សយើងទាំងពីរនៅតែពង្រឹងកិច្ចសហការគ្នាដោយស្មារតីស្មោះត្រង់លើការអនុវត្តវប្បធម៌សន្ទនានេះនៅតាមបន្តាថ្នាក់បន្តទៀតដើម្បីភាពសុខដុមរមនាសម្រាប់ប្រជាជនយើងទាំងពេលបច្ចុប្បន្ន និងអនាគត»៕
© រក្សាសិទ្ធិដោយ thmeythmey.com