អន្តរជាតិ
×![]()
របាយការណ៍សិទ្ធិមនុស្សប្រចាំឆ្នាំ២០១៤របស់ក្រុងវ៉ាស៊ីនតោន ដែលត្រូវបានផ្សព្វផ្សាយជាផ្លូវការកាលពីថ្ងៃ ព្រហស្បតិ៍ បង្ហាញថា កម្ពុជានៅមិនទាន់គោរពសិទ្ធិក្រុមមនុស្សភាគតិចនៅកម្ពុជាបានល្អប្រសើរនៅឡើយទេ ដែលក្នុងនោះក៏មានជនជាតិវៀតណាម។ របាយការណ៍ដដែលបានសង្កត់ធ្ងន់ថា ប្រជាជនវៀតណាមទាំងនោះប្រឈមការរើសអើង និងចលនាប្រឆាំងរៀបចំដោយបក្សនយោបាយ និងប្រជាជនផង ក្រោមហេតុផលចោទប្រកាន់ថាជនជាតិភាគតិចនេះជាគ្រោះថ្នាក់សម្រាប់សន្តិសុខ និងប្រពៃណីវប្បធម៌កម្ពុជាថែុមទៀត។ 
របាយការណ៍សិទ្ធិមនុស្សប្រចាំឆ្នាំរបស់ក្រសួងការបរទេសអាមេរិកសរសេរថា ការរើសអើងពូជសាសន៍នៅក្នុងសង្គមកម្ពុជានៅតែជាបញ្ហាប្រឈម ជាពិសេសការប្រឆាំងនិងរើសអើងជនជាតិភាគតិចវៀតណាម។ របាយការណ៍ដែលបង្ហាញដោយរដ្ឋមន្ត្រីការបរទេសអាមេរិក ចន ឃឺរី កាលពីថ្ងៃ ២៥ មិថុនាកន្លងមកនោះ បានបង្ហាញពីភាពវិជ្ជមាន និងអវិជ្ជមានទាក់ទងបញ្ហាសិទ្ធិមនុស្សនៅកម្ពុជាដែលចាំបាច់ត្រូវកែប្រែ។
បញ្ហាសិទ្ធិមនុស្សច្រើនដែរនៅកម្ពុជា ដែលមិនទាន់ល្អប្រសើរជាពិសេសបញ្ហាសេរីភាពសារព័ត៌មាន សិទ្ធិជួបជុំគ្នា និងបញ្ហាប្រព័ន្ធយុត្តិធម៌ជារួម។ យ៉ាងណាមិញ សំណុំឯកសារដែលចងក្រងរបស់ក្រុងវ៉ាស៊ីនតោន បានបង្ហាញកង្វល់ជុំវិញបញ្ហារើសអើងប្រឆាំងប្រជាជនភាគតិច ជាពិសេសវៀតណាម។ បញ្ហានេះបានក្លាយជាប្រធានបទសំខាន់ និងចម្រូងចម្រាសបំផុតមួយ សម្រាប់ប្រជាជនកម្ពុជា ដ្បិតបញ្ហានេះកំពុងតែរុកគួនសង្គមកម្ពុជាពិតមែន។ សូមបញ្ជាក់ថារបាយការណ៍ប្រចាំឆ្នាំរបស់ក្រុងវ៉ាស៊ីនតោនជុំវិញសំណុំរឿងសិទ្ធិមនុស្សពិភពលោក ត្រូវរៀបចំឡើងដោយលម្អិតពឹងផ្អែកលើរបាយការណ៍ស្ថាប័នជំនាញៗនានា ដូចជាស្ថាប័នសិទ្ធិមនុស្សអង្គការសហប្រជាជាតិ និងស្ថាប័នសិទ្ធិមនុស្សអន្តរជាតិផង។
នៅកម្ពុជាសិទ្ធិជនជាតិភាគតិចដែលរស់នៅដោយស្របច្បាប់ត្រូវបានការពារនិងចែងក្នុងរដ្ឋធម្មនុញ្ញឆ្នាំ ១៩៩៣ ។ ហើយម្យ៉ាងប្រជាជនវៀតណាមនិងប្រជាជនភាគតិចចិនជាជនជាតិភាគតិចដែលមានចំនួនច្រើនជាងគេក្នុងចំណោមជនជាតិភាគតិចកម្ពុជាផ្សេងទៀត ថែមទាំងបានរស់នៅកម្ពុជាអស់ពេលយូរផងដែរ។
«យ៉ាងណាក៏ដោយ បើប្រៀបធៀបជាមួយក្រុមភាគតិចចិន ជនជាតិភាគតិចវៀតណាមនៅកម្ពុជាមិនទាន់បានទទួលការការពារត្រឹមត្រូវឡើយ ហើយមិនបានទទួលការស្វាគមន៍និងទទួលយកពីសំណាក់ប្រជាជនភាគច្រើនដែរ។ ផ្ទុយទៅវិញពួកគេនៅប្រឈមការរើសអើង និងត្រូវប្រជាជនកម្ពុជាខ្លះចាត់ទុកថាជាគ្រោះថ្នាក់សម្រាប់សង្គម សន្តិសុខ និងវប្បធម៌ដ៏ផូរផង់របស់កម្ពុជាផងដែរ»។ នេះបើតាមការលើកឡើងនៅក្នុងរបាយការណ៍សិទ្ធិមនុស្សប្រចាំឆ្នាំរបស់សហរដ្ឋអាមេរិក។
ជុំវិញការរើសអើង ការស្អប់ខ្ពើម បានបង្កជាហិង្សាប្រឆាំងប្រជាជនវៀតណាមផងដែរ។ ជាឧទាហរណ៍ការប្រើប្រាស់ហិង្សាប្រឆាំងប្រជាជនភាគតិចវៀតណាម វ័យ ២៨ឆ្នាំ Nyuyen Yaing Ngoc រហូតស្លាប់បាត់បង់ជីវិតនៅខណ្ឌមានជ័យ ដោយសារតែបុរសម្នាក់នេះមានជាប់ពាក់ព័ន្ធបញ្ហាគ្រោះថ្នាក់ចរាចរណ៍តូចតាច។ ការឈានដល់សម្លាប់ជនជាតិវៀតណាមនេះផ្តើមចេញពីការប្រើប្រាស់ភាសាឬពាក្យសម្តីខ្លះដែលបង្កប់អត្ថន័យរើសអើង ដូចករណីខាងលើផ្តើមចេញពីការស្រែក៖ « យួន វៃខ្មែរ» ជាដើម។
របាយការណ៍អាមេរិកឆ្នាំ ២០១៤ បានបញ្ជាក់យ៉ាងច្បាស់ថា ទាំងប្រជាជន និងមានគណបក្សនយោបាយខ្លះផង បានឆ្លៀតឱកាសដើម្បីប្រើប្រាស់ពាក្យសម្តី ឬសកម្មភាពនានាដែលប្រឆាំងជនជាតិវៀតណាម ដោយភ្ជាប់ជាមួយបញ្ហានយោបាយផង។ ក្រុមអ្នកវាយតម្លៃសិទ្ធិមនុស្សនៃក្រសួងការបរទេសអាមេរិកសរសេរថា រឿងរដ្ឋាភិបាលវៀតណាមគ្រប់គ្រងគណបក្សកាន់អំណាច បញ្ហាវៀតណាមឈ្លានពានទឹកដីកម្ពុជា និងបញ្ហាដទៃផ្សេងទៀតត្រូវក្រុមទាំងនោះលើកឡើងដើម្បីបង្កើនស្មារតីជាតិនិយម និងទាមទារឲ្យក្រុមជនជាតិភាគតិចវៀតណាមមិនដឹងអីសោះនៅកម្ពុជាទទួលខុសត្រូវដែរ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
