ជាតិ
បទយកការណ៍ / បទសម្ភាសន៍
និស្សិតជនជាតិចាម ម៉ូត គីមរី បោះបង់ការសិក្សា ទៅការពារព្រៃឈើនៅអារ៉ែង
ភ្នំពេញ៖ នៅឆ្នាំ២០១១ ជាឆ្នាំដែលយុវជនជនជាតិចាម ម៉ូត គីមរី បានផ្តើមជីវិតជានិស្សិតនៃមហាវិទ្យាល័យស្ថាបត្យកម្ម និងជានិស្សិតបរិញ្ញាបត្ររងមួយទៀតផ្នែកសេដ្ឋកិច្ចផែនការ។ ដោយមានទម្លាប់ចូលរួមធ្វើកិច្ចការសង្គមតាំងពីថ្នាក់វិទ្យាល័យ គីមរី ក៏បានបន្តសកម្មភាពនេះរហូតដល់សម្រេចចិត្តព្យួរការសិក្សាថ្នាក់មហាវិទ្យាល័យស្ថាបត្យកម្មនៅឆ្នាំទី៣ ក្នុងឆ្នាំ២០១៤ ដើម្បីតស៊ូមតិការពារតំបន់អារ៉ែង និងជនជាតិភាគតិចជង។ ហេតុអ្វីបានជាយុវជនខ្មែរអ៊ីស្លាមមានឆន្ទៈមោះមុតយ៉ាងនេះ?
«រៀននៅមហាវិទ្យាល័យ ខ្ញុំអាចមានឱកាសលើកទី២ ។ ប៉ុន្តែប្រសិនបើ អារ៉ែងត្រូវបានគេសាងសង់ទំនប់វារីអគ្គិសនីមែន ខ្ញុំនឹងមិនមានឱកាសការពារវាជាលើកទីពីរទៀតឡើយ»។ យុវជនសម្បុរសស្តើង កំពុងតែបង្ហាញជំហរ និងការសម្រេចចិត្តដ៏ច្បាស់លាស់ក្នុងបុព្វហេតុការពារតំបន់អារ៉ែងដ៏ចម្រូងចម្រាស។ តំបន់អារ៉ែង ជាតំបន់ប្រទាញប្រទង់រវាងរដ្ឋាភិបាលដែលមានគម្រោងផ្តល់ឲ្យក្រុមហ៊ុនចិនវិនិយោគបង្កើតវារីអគ្គិសនី និងក្រុមអង្គការសង្គមស៊ីវិលដែលទាមទារឲ្យថែរក្សា។
ក្នុងវ័យ២២ឆ្នាំ ហើយរស់នៅក្នុងគ្រួសារធូរធាល្មម ដោយមានឪពុកម្តាយជាអាជីវករនោះ ប្រសិនបើយុវជន ម៉ូត គីមរី ផ្តោតអារម្មណ៍លើការសិក្សាដោយស្ងប់ចិត្តនោះ ក៏គេអាចធ្វើបានយ៉ាងងាយស្រួលដែរ។ ប៉ុន្តែ គីមរី យល់ឃើញខុសពីនេះ។ សម្បត្តិធនធានធម្មជាតិរបស់កម្ពុជានៅក្នុងតំបន់អារ៉ែង ដែលកំពុងប្រឈមនឹងការបំផ្លាញ និងការបាត់បង់ ពិតជាមានតម្លៃលើសការសិក្សាជំនាញស្ថាបត្យកម្មរបស់គីមរី។ ដូច្នេះគីមរី មិនស្តាយស្រណោះនឹងការព្យួរការសិក្សា រហូតដល់សាលាលុបឈ្មោះគីមរីពីបញ្ជីឈ្មោះសិស្សព្យួរការសិក្សានោះឡើយ។ «ការលះបង់តិចតួចរបស់ខ្ញុំ ពិតជាស័ក្តិសមនឹងការប្តូរជាមួយរបស់មានតម្លៃបំផុតនៅក្នុងតំបន់អារ៉ែង។ ព្រៃឈើ វប្បធម៌ជនជាតិដើមភាគតិច សត្វកម្ររាប់រយប្រភេទ ក្រពើភ្នំ ត្រីនាគ ប្រសិនបើមានទំនប់វារីអគ្គិសនី។ ជនជាតិដើមភាគតិចជងជាង១៥០០នាក់ កំពុងប្រឈមមុខនឹងការជម្លៀសចេញពីទឹកដីខ្លួនឯង»។ គីមរី ពន្យល់យ៉ាងនេះដោយការជឿជាក់លើសេចក្តីសម្រេចរបស់ខ្លួន។
តើគីមរី បានទទួលឥទ្ធិពលនៃការស្រឡាញ់កិច្ចការសង្គមមកពីណា? ទម្លាប់ដែលត្រូវបានបណ្តុះនៅថ្នាក់វិទ្យាល័យក្នុងក្របខណ្ឌនៃយុវជនកាកបាទក្រហម បានចាក់គ្រឹះយ៉ាងជ្រៅទៅក្នុងផ្នត់គំនិតរបស់យុវជនគីមរីរួចហើយ។ នៅក្នុងឆ្នាំ ២០១៣ នៅពេលដែលគីមរីបានជួបបុរសជនជាតិអេស្ប៉ាញឈ្មោះអាឡិចដែលនិយាយភាសាខ្មែរយ៉ាងច្បាស់ ហើយបានតស៊ូមតិប្រឆាំងគម្រោងកសាងតំបន់អគ្គិសនីនៅអារ៉ែងក្នុងខេត្តកោះកុងនោះ ទឹកចិត្តគីមរីកាន់តែក្លៀវក្លាក្នុងការការពារប្រយោជន៍សហគមន៍ និងបរិស្ថានជាដើម។ បោះបង់ការសិក្សាជំនាញស្ថាបត្យកម្មមួយមែន ប៉ុន្តែគីមរី មានអំនួតវិញថា ខ្លួនក៏បានរៀនជំនាញផ្សេងមួយជំនួសវិញពីតំបន់អារ៉ែង។
អាចរៀនសូត្រពីតំបន់អារ៉ែងបាន ក៏ព្រោះតែយុវជនជនជាតិចាមរូបនេះ ឧស្សាហ៍ឡើងចុះ និងស្នាក់នៅក្នុងតំបន់នោះ ស្ទើរតែដូចអ្នកភូមិនៅទីនោះទៅហើយ។ គីមរី រម្លឹកអំពីការរស់នៅក្នុងតំបន់អារ៉ែងយ៉ាងនេះ៖«ក្នុងមួយខែខ្ញុំស្នាក់នៅអារ៉ែងចន្លោះពីពីរទៅបីសប្តាហ៍។ នៅទីនោះគ្មានសេវាទូរសព្ទសម្រាប់ទំនាក់ទំនង ខ្វះទឹកប្រើប្រាស់ គ្មានភ្លើងអគ្គិសនីជាដើម។ រស់នៅទីនោះវាលំបាកសម្រាប់ខ្ញុំ ព្រោះខ្ញុំកាន់សាសនាឥស្លាម តែក្រោយពី អ្នកភូមិជនជាតិភាគតិចជងបានដឹងនិងយល់ពីខ្ញុំ ពេលខ្លះពួកគាត់បានយកម្ហូបសម្រាប់ជនអ៊ីស្លាមឲ្យខ្ញុំហូប។ ពេលណាមានម្ហូបត្រី គឺយើងហូបជាមួយគ្នា។ តែខ្ញុំមិនហូបសាច់សត្វព្រៃដូចពួកគាត់ទេ។ ហើយការគោរពប្រតិបត្តិតាមសាសនាឥស្លាម ខ្ញុំនៅតែអាចធ្វើបានដដែល»។
ព្យួរការសិក្សានៅមហាវិទ្យាល័យគឺរឿងដែលពិបាកសម្រេចចិត្តមួយហើយ ប៉ុន្តែការបញ្ចុះបញ្ចូលរកការគាំទ្រពីឪពុកម្តាយដើម្បីគេអាចធ្វើសកម្មភាពការពារតំបន់អារ៉ែង វាក៏ជាចំណោទមួយទៀតសម្រាប់គីមរីដែរ។ ប៉ុន្តែគីមរីនៅតែព្យាយាមពន្យល់ឪពុកម្តាយរបស់គេ រហូតដល់ឪពុកម្តាយយល់ព្រមបំពេញបំណងគីមរី។ យុវជនកូនពៅនៅក្នុងចំណោមបងប្អូនបង្កើត៥នាក់រូបនេះ បានពន្យល់ឪពុកម្តាយថា៖ «ខ្ញុំបានព្យាយាមពន្យល់ទៅឪពុកម្តាយខ្ញុំថា ខ្ញុំទៅធ្វើការទាក់ទងនឹងទេសចរណ៍ទៅតំបន់អារ៉ែង គឺខ្ញុំនាំយុវជន និងភ្ញៀវបរទេសឲ្យស្គាល់ពីតំបន់អារ៉ែង។ ខ្ញុំខំពន្យល់រហូតទាល់តែគាត់អនុញ្ញាតឲ្យខ្ញុំទៅធ្វើការងារហ្នឹង។ ប៉ុន្តែមានរឿងធំៗឬបញ្ហាប្រឈមខ្លះ ខ្ញុំមិនដែលហ៊ានប្រាប់ពួកគាត់ទេ»។
យុវជនស្រឡាញ់បរិស្ថានរូបនេះ ធ្លាប់ជួបបញ្ហាប្រឈមជាមួយនឹងអាជ្ញាធរដែលមិនពេញចិត្តនឹងសកម្មភាពរបស់ខ្លួនទៀត។ សកម្មជនការពារព្រៃអារ៉ែងរូបនេះបាននិយាយថា៖«ខ្ញុំត្រូវអាជ្ញាធរនិងទាហាននៅទីនោះសម្លុតគំរាមកំហែង និងបានយកទូរសព្ទខ្ញុំលុបរូបថត លុបសំឡេងដែលខ្ញុំបានថតនោះអស់ ហើយបានរារាំងក្រុមយុវជន និងប្រជាជនដែលតវ៉ានៅទីនោះទៀតផង»។
សកម្មភាពនៅអារ៉ែងយុវជនស្ម័គ្រចិត្ត ម៉ូត គីមរី បានដើរតួរជួយបង្រៀនសហគមន៍ផង នាំយុវជន អង្គការសង្គមស៊ីវិល និងជនជាតិបរទេសឲ្យស្គាល់ពីតំបន់អារ៉ែងទៀតផង។ គីមរី បង្រៀនប្រជាជនសហគមន៍ ឲ្យពួកគាត់យល់ពីសិទ្ធិមនុស្ស លិទ្ធិប្រជាធិបតេយ្យ សិទ្ធិលំនៅឋាន និងភាសាអង់គ្លេសបន្តិចបន្តួចដល់ពួកគាត់។
សកម្មភាពដែលសកម្មជនការពារអារ៉ែងរូបនេះធ្វើ គ្មានអ្វីក្រៅពីជួយការពារសិទ្ធិរបស់ជនជាតិ ភាគតិចជងនៅអារ៉ែង ដើម្បីឲ្យពួកគាត់ទទួលបានសិទ្ធិកាន់កាប់ដីធ្លី ការពារព្រៃឈើនិងសត្វព្រៃរាប់រយប្រភេទ និងអភិរក្សវប្បធម៌របស់ពួកគាត់។ ជាពិសេស កូនជនជាតិចាម ម៉ូត គីមរី ចង់ឃើញតំបន់អារ៉ែងប្រែក្លាយជាតំបន់ទេសចរណ៍បៃតង ដែលមានភ្ញៀវជាតិ និងអន្តរជាតិទៅកម្សាន្តកុះករ។
នៅពេលអារ៉ែងសន្តិភាព ស្រស់ស្រាយ ដោយពណ៌បៃតងនៃប្រភពជីវៈចម្រុះរបស់ខ្លួនហើយនោះ ម៉ូត គីមរី នឹងចាប់ផ្តើមជីវិតជានិស្សិតផ្នែកស្ថាបត្យកម្មវិញ ហើយគីមរីក៏មិនបំភ្លេចបរិស្ថានឡើយ។ សំណង់ស្ថាបត្យកម្មស្តង់ដា និងមាននិរន្តរភាពជាមួយបរិស្ថានល្អ គឺជាសុបិនរបស់ ម៉ូត គីមរី៕
© រក្សាសិទ្ធិដោយ thmeythmey.com