ជាតិ
សង្គមជាតិ
រូបចម្លាក់ដែលពលរដ្ឋប្រទះឃើញធ្វើឡើងនៅសម័យបាយ័ន រូបភាព៖ អាជ្ញាធរជាតិអប្សរា
× សៀមរាប៖ អាជ្ញាធរជាតិអប្សរា បានកំណត់អត្តសញ្ញាណនៃរូបចម្លាក់ ដែលពលរដ្ឋរស់នៅតំបន់អង្គរប្រទះឃើញកាលពីម្សិលមិញហើយ។ បើតាមអ្នកជំនាញ រូបទាំងពីរដុំនោះ ធ្វើឡើងនៅចុងសម័យបាយ័ន គឺចុងសតវត្សទី១៣ ។
ក្នុងទំព័រហ្វេសប៊ុករបស់ខ្លួនដែលចេញផ្សាយនៅថ្ងៃទី២ កក្កដានេះ អាជ្ញាធរជាតិអប្សរាហៅរូបចម្លាក់ដែលប្រទះឃើញនៅបរិវេណតំបន់អង្គរម្សិលមិញ គឺជាបំណែកវត្ថុបុរាណ២ដុំ ហើយដែលពលរដ្ឋប្រទះឃើញពេលកំពុងឆ្កាដី។ អ្នកជំនាញសន្និដ្ឋានថា បំណែកវត្ថុបុរាណទាំងនោះ គឺជាទេវរូបធ្វើពីថ្មភក់ ក្នុងរចនាបថទម្រង់សិល្បៈចុងសម័យបាយ័ន (ចុងសតវត្សទី១៣)។
តាមការបញ្ជាក់ពីអាជ្ញាធរជាតិអប្សរាដដែល បំណែកវត្ថុបុរាណខាងលើ ត្រូវបានពលរដ្ឋប្រទះឃើញនៅភូមិវាល សង្កាត់គោកចក ក្រុងសៀមរាប គឺនៅខាងត្បូងទីតាំងបាឡុង មុខប្រាសាទអង្គរវត្ត។ ដោយរូបទី១ ជារូបទេវរូបអង្គុយពែនភ្នែន មានកម្ពស់ ២០សង់ទីម៉ែត្រ ទទឹង ១៧ សង់ទីម៉ែត្រ និងកម្រាស់ ៩សង់ទីម៉ែត្រ។ ហើយរូបទី២ ជាព្រះកេសទេវរូប មានកម្ពស់ ១៨សង់ទីម៉ែត្រ ទទឹង ២៣សង់ទីម៉ែត្រ និងកម្រាស់ ១២សង់ទីម៉ែត្រ។
បច្ចុប្បន្ន អ្នកជំនាញនៃអាជ្ញាធរជាតិអប្សរា កំពុងសិក្សាបន្តទៅលើលក្ខណៈបុរាណវិទ្យា សិល្បៈរចនាបថជាដើម ដើម្បីឈានដល់ការចុះបញ្ជី និងរក្សាទុកក្នុងសារមន្ទីរ។ អាជ្ញាធរជាតិអប្សរា ក៏បានថ្លែងការអរគុណចំពោះប្រជាពលរដ្ឋ ដែលតែងសហការនិងអាជ្ញាធរ ក្នុងកិច្ចការអភិរក្សរមណីយដ្ឋានអង្គរជារៀងរហូតមក៕
© រក្សាសិទ្ធិដោយ thmeythmey.com