ជាតិ
នយោបាយជាតិ
តំណាងរាស្ត្រCPP ពីររូប ស្ម័គ្រចិត្តលាចេញពីតំណែង រូបខាងឆ្វេងលោកស្រី ចែម សាវ៉ៃ និងខាងស្ដាំលោក អាន ហេ
× តំណាងគណបក្សប្រជាជន២រូប គឺលោកស្រី ចែម សាវ៉ៃ និងលោក អាន ហេ បានស្ម័គ្រចិត្តលាលែងពីតំណែងកាលពីសប្ដាហ៍មុន ដោយសារជំងឺមហារីកនិងការវះកាត់ឆ្អឹងខ្នង ។ រដ្ឋសភាបានតែងតាំងលោក កែវ ពិសិដ្ឋ និង លោក ងួន ប៊ៀនជាតំណាងរាស្ត្រថ្មីជំនួសលោកស្រី ចែម សាវ៉ៃ និងលោក អាន ហេ។
លោក អាន ហេ តំណាងរាស្ត្រគណបក្សប្រជាជនមណ្ឌលកែប ដែលបានលាលែងពីតំណែងបានបញ្ជាក់ថា រូបលោកមិនអាចបំពេញការងារបានដូចមុននោះទេ ដោយសារលោកទើបតែវះកាត់ឆ្អឹងខ្នង ដូចនេះបានជាលោកលាលែងពីតំណែង ដោយទុកតួនាទីនេះឲ្យសមាជិកបក្សបន្ដតំណែងជំនួស។ ថ្លែងប្រាប់សារព័ត៌មានថ្មីៗនៅថ្ងៃសុក្រនេះ តំណាងរាស្ត្រគណបក្សប្រជាជនមណ្ឌលកែបរូបនេះ បញ្ជាក់យ៉ាងដូច្នេះថា៖«ជំងឺវះកាត់ឆ្អឹងខ្នងដើរមិនរួច»។
ដោយឡែកអ្នកស្និទ្ធនិងលោកស្រី ចែម សាវ៉ៃ តំណាងរាស្ត្រមណ្ឌលខេត្តកំពង់ចាម ដោយសុំមិនបញ្ចេញឈ្មោះ ប្រាប់សារព័ត៌មានថ្មីៗដែរថា ការលាលែងរបស់លោកស្រី ចែម សាវ៉ៃ គឺមិនមានបញ្ហាអ្វីជាមួយគណបក្សនោះទេ។ ហើយមូលហេតុដែលលោកស្រី ចែម សាវ៉ៃ លាលែងពីតំណែងនេះ ដោយសារតែលោកស្រី មានជំងឺមហារីក ដែលមិនមានកំលាំងគ្រប់គ្រាន់សម្រាប់បំពេញការងារ។«គាត់មានជំងឺមហារីកជាង១ឆ្នាំហើយ ជំងឺនេះវាធ្ងន់ ដូចនេះទើបគាត់ស្ម័គ្រចិត្តលាឈប់ពីតំណែងដោយខ្លួនឯង ព្រោះគាត់ឈឺគ្មានកំលាំង អត់មានពេលចុះជួបប្រជារាស្ត្រដូចមុន។ ហើយគាត់គិតថាមិនចង់បានប្រាក់ខែពីរដ្ឋដោយមិនអាចធ្វើការកើត ទើបគាត់សុំលាឈប់»។ នេះជាការបញ្ជាក់របស់អ្នកស្និទ្ធ និង លោកស្រី ចែម សាវ៉ៃ។
លោក ហេង សំរិន ប្រធានរដ្ឋសភា បានដឹកនាំអង្គប្រជុំគណៈកម្មាធិការអចិន្ត្រៃយ៍រដ្ឋសភា នៅថ្ងៃសុក្រនេះ បានពិនិត្យ និងអនុម័តលើរបៀបវារៈចំនួន៤ ដោយប្រកាសទទួលស្គាល់ លោក កែវ ពិសិដ្ឋ ជាតំណាងរាស្ត្រគណបក្សប្រជាជនថ្មីនៃមណ្ឌលខេត្តកំពង់ចាម ជំនួសលោកស្រី ចែម សាវ៉ៃ។ ចំណែកលោក ងួន ប៊ៀន ជាតំណាងរាស្ត្រថ្មីនៃមណ្ឌលខេត្តកែប ជំនួសលោក អាន ហេ បន្ទាប់ពីតំណាងរាស្ត្រទាំងពីររូបនេះ បានសុំលាលែងពីតំណែង។
លើសពីនេះរដ្ឋសភាក៏បានពិនិត្យលើសំណើសុំជ្រើសតាំងលោក កែវ ពិសិដ្ឋ ជាសមាជិក គណៈកម្មការ នីតិកម្ម និង យុត្តិធម៌៕
© រក្សាសិទ្ធិដោយ thmeythmey.com