ពិភពតារា៖ វ៉ាឌី ភាលីង បង្ហាញខ្លួនជាថ្មីក្រោយល្បីថាមានឧកញ៉ាចិញ្ចឹម
×
ភ្នំពេញ៖ អតីតតារាចម្រៀងស្រីល្បីឈ្មោះប្រចាំផលិតកម្មស្ពាក Spark Music កញ្ញាវ៉ាឌី ភាលីង បានឱបក្រសោបនូវប្រជាប្រិយភាពល្បីគួរសម កាលពីអំឡុងឆ្នាំ២០១០ ប៉ុន្តែត្រូវបាត់មុខយ៉ាងស្ងាត់កំបាំងជាមួយនឹងព័ត៌មានថា នាងមានឧកញ៉ាជាម្ចាស់ស្នេហ៍ បង្ខំឱ្យនាងដកខ្លួន ពីសិល្បៈ ទៅសម្ងំរស់នៅសោយសុខលើគំនរទ្រព្យ។
ការដកខ្លួនឱ្យនៅឆ្ងាយពីពិភពសិល្បៈរបស់ ស្រីស្អាតវ៉ាឌី ភាលីង ក៏លេចចេញនូវព័ត៌មាន អាស្រូវមួយចំនួន ដោយគេនាំគ្នានិយាយ ថា នាងមានឧកញ៉ាម្ចាស់ស្នេហ៍ បង្ខំឱ្យនាងដកខ្លួន ពីសិល្បៈ ទៅសម្ងំរស់នៅសោយសុខលើគំនរទ្រព្យ វីឡា ដុល្លារ និងឡានទំនើបទៀតផង ។ តែសម្រាប់ព័ត៌មានមួយនេះកន្លងមក ក៏ត្រូវបានខាងគ្រួសាររបស់កញ្ញាវ៉ាឌី ភាលីង ផ្ទាល់ បានចេញមុខបដិសេធថា នោះពុំមែនជាការពិតទាំងអស់ ហើយក៏បានអះអាងទៀតថា តារាចម្រៀងរូបឆោមស្រស់ វ៉ាឌី ភាលីង មានបញ្ហាសុខភាពយ៉ាងធ្ងន់ធ្ងរ ទើបនាងអវត្តមានពីអាជីពយ៉ាងដូច្នេះ ។
មានទស្សនិកជនជាច្រើន មិនបានជឿ ជាក់ថា កញ្ញាវ៉ាឌី ភាលីង មិនបង្ហាញខ្លួនដោយ សារសុខភាពនោះទេ ផ្ទុយទៅវិញ គេបែរជានាំគ្នាជឿទៅលើរនាំងស្នេហារបស់នាងជាមួយ នឹងបុរស ដែលមានងារជាឧកញ៉ានោះច្រើនជាង ។ បើគិតមកដល់ពេលនេះ អវត្តមាននៅក្នុងពិភពសិល្បៈរបស់តារាចម្រៀងវ៉ាឌី ភាលីង បានអូសបន្លាយមកជិត ៣ឆ្នាំហើយ យូរៗម្តង គេបានឃើញនាងឡើងច្រៀងនៅក្នុងនាមជាតារាកិត្តិយសម្តងម្កាលដែរ ។ ថ្មីៗនេះ លេចឮដំណឹងមកថា កញ្ញាវ៉ាឌី ភាលីង បានស្ពាយបង្វេចវិលមកប្រកបរបស់ចាស់យ៉ាងពេញទំហឹងវិញហើយ ។
ដំណឹងមួយ នេះ ក៏បានធ្វើឱ្យទស្សនិកជនមួយចំនួនសង្ស័យ ថា ចំណងស្នេហ៍ដែលធ្លាប់តែល្បីរវាងកញ្ញាវ៉ឌី ភាលីង ជាមួយឧកញ៉ាម្នាក់នោះ ប្រហែលជា ដើរដល់ផ្លូវពុះជ្រែកបេះដូងពីគ្នាហើយ ទើប ធ្វើឱ្យកញ្ញាវ៉ាឌី ភាលីង ខ្វះភាពកក់ក្តៅនៅក្នុងការរស់នៅ ហើយក៏ងាកមកផ្ញើឆ្នាំងបាយជាមួយអាជីពចាស់ឡើងវិញយ៉ាងដូច្នេះ។ បើតាមប្រភពពីអ្នកជិតស្និទ្ធរបស់កញ្ញាវ៉ាឌី ភាលីង បានលួចបង្ហើបឱ្យដឹងថា តាមពិត កញ្ញា វ៉ាឌី ភាលីង វិលចូលមកពិភពសិល្បៈជាថ្មី ឡើងវិញនោះគឺ យូរក្រែលហើយដែរ គ្រាន់តែប៉ុន្មានខែមកនេះ នាងដើរច្រៀងចល័ត ពុំទាន់មានទ្រនំជ្រកកោណច្បាស់លាស់នៅឡើយ ។
ប្រភពដដែលបានបន្តទៀតថា ដោយសារតែការរស់នៅពុំមានលំនឹងសម្រាប់ខ្លួនឯង ទើបធ្វើឱ្យវ៉ាឌី ភាលីង សម្រេចចិត្តដើរចេញពីទីងងឹតមករកទីភ្លឺសាងកេរ្តិ៍ឈ្មោះជាថ្មី ហើយពេលនេះ នាងរកបានទ្រនំមួយហើយ សម្រាប់ធ្វើជាខ្នងបង្អែក គ្រាន់តែនាងពុំទាន់បានប្រកាសជាសាធារណៈតែប៉ុណ្ណោះ ។ បើតាមដំណឹង ល្ហិតល្ហៀងមកថា កញ្ញាវ៉ាឌី ភាលីង ពេលនេះ កំពុងតែជ្រកកោននៅក្នុងផលិតកម្មដាយម៉ិន ទៀតផង៕
© រក្សាសិទ្ធិដោយ thmeythmey.com