អន្តរជាតិ
អាស៊ានបង្កើតប្រអប់ជំនួយជួយជនរងគ្រោះដោយសារការជួញដូរតាមទូក
× រដ្ឋមន្ត្រីអាស៊ានបានឯកភាពគ្នាចូលរួមដោះស្រាយបញ្ហាបទឧក្រិដ្ឋឆ្លងដែន និងបង្កើតប្រអប់លុយសម្រាប់ប្រើប្រាស់ជួយសង្គ្រោះជនរងគ្រោះដោយសារការជួញដូរមនុស្សឬជនភៀសខ្លួន។ ការសម្រេចនេះកើតឡើងក្នុងកិច្ចប្រជុំរដ្ឋមន្ត្រីអាស៊ានបន្ទាន់នៅក្នុងទីក្រុងកូឡាឡាំពួ ប្រទេសម៉ាឡេស៊ី កាលពីថ្ងៃព្រហស្បតិ៍ម្សិលមិញ។ ប្រទេសសិង្ហបុរីបានក្លាយជាសមាជិកអាស៊ានផ្តល់លុយជំនួយ ២សែនដុល្លារគាំទ្រគម្រោងនេះ។
បញ្ហាវិបត្តិជនអន្តោប្រវេសន៍ បញ្ហាជួញដូមនុស្សនិងបទឧក្រិដ្ឋឆ្លងដែនបានក្លាយជាបញ្ហាសំខាន់ និងចម្រូងចម្រាស់ដោះស្រាយមិនចេញនៅតំបន់អាស៊ាន។ យ៉ាងណាក៏ដោយ ម្សិលមិញនេះ បញ្ហាប្រឈមទាំងនេះត្រូវបានក្រុមរដ្ឋមន្ត្រីអាស៊ានជួបប្រជុំគ្នាយកមកពិភាក្សានិងរកដំណោះស្រាយបញ្ចប់បញ្ហានេះ។ ក្រោយពិភាក្សាគ្នាអស់ពេលយូរល្មមនៅរាធានីកូឡាឡាំពួ ប្រទេសម៉ាឡេស៊ី ក្រុមរដ្ឋមន្ត្រីអាស៊ានបានសម្រេចឯកភាពគ្នាបង្កើតឲ្យមានវិធានការរួមគ្នារវាងសមាជិកអាស៊ានតាមកម្ចាត់បទឧក្រិដ្ឋឆ្លងដែននៅក្នុងតំបន់អាស៊ីអាគ្នេយ៍។ បន្ថែមពីវិធានការសំខាន់នេះ បណ្តារដ្ឋមន្ត្រីទាំងអស់ក៏ព្រមព្រៀងគ្នាបង្កើនប្រអប់ជំនួយហិរញ្ញវត្ថុរួមមួយ ដែលប្រមូលផ្តុំរាល់វិភាគទានពីបណ្តារដ្ឋអាស៊ានទាំងអស់សម្រាប់ដោះស្រាយបញ្ហាជនរងគ្រោះជាជនភៀសខ្លួន និងជនអន្តោប្រវេសន៍ដែលចាញ់បោកឈ្មួញជួញដូរមនុស្សតាមទូកផង។
គ្រាន់តែប្រកាសបង្កើតមូលនិធិនេះភ្លាម រដ្ឋាភិបាលសិង្ហបុរី បានប្រកាសផ្តល់វិភាគទាន ២សែនដុល្លារ ប៉ុន្តែសមាជិកផ្សេងទៀតមិនទាន់សម្រេចចិត្តឡើយថានឹងផ្តល់វិភាគទានប៉ុន្មានសម្រាប់ទ្រទ្រង់គម្រោងនេះ។ លេខាធិការដ្ឋានអាស៊ាននឹងបន្តចាត់ចែងផែនការនេះដើម្បីអាចឲ្យប្រទេសសមាជិកឯទៀតផ្តល់ជំនួយរបស់ខ្លួន។
ការបង្កើតប្រអប់លុយជំនួយនេះ ជាអ្វីដែលគ្រប់គ្នាចង់បាន ព្រោះវានឹងលែងមានការរត់គេចពីការទទួលខុសត្រូវ ហើយបញ្ហាគ្រោះមហន្តរាយមនុស្សជាតិក៏មិនអាចកើតមានឡើងទៀតដែរ។ គ្រប់រដ្ឋសមាជិកអាស៊ានមានបន្ទុករួមគ្នា លែងមានរដ្ឋមួយណាដែលត្រូវរងបន្ទុកម្នាក់ឯងទៀតដែរ។ កន្លងមកបញ្ហាជនភៀសខ្លួន និងជនអន្តោប្រវេសន៍ពីមីយ៉ាន់ម៉ា និងបង់ក្លាដែនបានធ្វើឲ្យសមាជិកអាស៊ានមួយចំនួនឈឺក្បាល វិលមុខ ហើយជនភៀសខ្លួន និងជនអន្តោប្រវេសន៍ដែលចាញ់បោកក្រុមឈ្មួញនោះបានរងគ្រោះបន្តរសាត់អណ្តែតគ្មានកោះត្រើយរហូតស្លាប់រាប់រយនាក់ថែមទៀតផង។ ជនជាតិរ៉ូហ៊ីងយ៉ាស្ថិតក្នុងចំណោមអ្នករងគ្រោះនោះដែរ បន្តចាកចេញពីមីយ៉ាន់ម៉ា ដើម្បីគេចពីគ្រោះថ្នាក់ និងការធ្វើទុកបុកម្នេញរបស់អាជ្ញាធរ និងប្រជាជនភាគច្រើនផង។ បញ្ហានេះនៅតែជាកង្វក់ដ៏ធំរបស់អាស៊ាន និងជារឹសគល់នៃវិបត្តិជនភៀសខ្លួននិងជនអន្តោប្រវេសន៍ដែរ។
យ៉ាងណាក៏ដោយ រដ្ឋសមាជិកអាស៊ានមិនបានជជែករឿងជនជាតិរ៉ូហ៊ីងយ៉ាឡើយ ព្រោះមីយ៉ាន់ម៉ា បានបន្តស្នើឲ្យកិច្ចប្រជុំរដ្ឋមន្ត្រីអាស៊ានទាំងមូល ដកប្រធានបទជនភៀសខ្លួនរ៉ូហ៊ីងយ៉ាចេញពីរបៀបវារៈ។ មីយ៉ាន់ម៉ាអះអាងថា បញ្ហាប្រជាជនរ៉ូហ៊ីងយ៉ា ជាកិច្ចការផ្ទៃក្នុង និងកិច្ចការនយោបាយមីយ៉ាន់ម៉ា និងមិនត្រូវលើកយកមកជជែកគ្នាថ្នាក់តំបន់ឡើយ។ ប្រធានកិច្ចប្រជុំអាស៊ាន រដ្ឋមន្ត្រីមហាផ្ទៃម៉ាឡេស៊ី បានគាំទ្រការលើកឡើងរបស់ភាគីមីយ៉ាន់ម៉ា ដោយសង្កត់ធ្ងន់ថាកិច្ចការអាស៊ានគឺជំរុញការសហការគ្នាដោះស្រាយបញ្ហាឧក្រិដ្ឋកម្មឆ្លងដែន មិនមែនផ្តោតលើបញ្ហានយោបាយផ្ទៃក្នុងរបស់រដ្ឋជាសមាជិកឡើយ៕
© រក្សាសិទ្ធិដោយ thmeythmey.com