សង្គមអន្តរជាតិ
អន្តរជាតិ
បោះឆ្នោតថា«ទេ»ធ្វើឲ្យរដ្ឋាភិបាលក្រិកទឹកមាត់ប្រៃជាងមុនដើម្បីជជែករឿងបំណុល?
× ក្រោយរង់ចាំលទ្ធផលប្រជាមតិនៅក្រិកយ៉ាងអន្ទះសារ គេឃើញច្បាស់នឹងភ្នែកថា ប្រជាជនក្រិកភាគច្រើនមិនគាំទ្រកញ្ចប់សំណើរបស់ម្ចាស់បំណុលអឺរ៉ុបទេ។ ប្រជាជនក្រិកបោះឆ្នោតទាត់ចោលសំណើរអឺរ៉ុប ប្រៀបដូចជាការទះកំភ្លៀងសហភាពអឺរ៉ុបមួយទំហឹងដែរ ព្រោះមេដឹកនាំអឺរ៉ុបមិនរំពឹងថាប្រជាជនក្រិកថ្លើមធំហ៊ានទាត់ចោលសំណើររបស់ខ្លួនបែបនេះទេ ព្រោះក្រិកអាចនឹងត្រូវប្រថុយផ្សងព្រេងយ៉ាងគ្រោះថ្នាក់កំណត់ជោគវាសនាខ្លួនឯងដោយចេញពីតំបន់ចាយលុយអឺរ៉ូផងក៏មិនដឹង។ គេរំពឹងថា ក្រិកនិងសហភាពអឺរ៉ុបបន្តចរចាគ្នាជាថ្មីទៀត ក្រោយមានប្រជាមតិនេះ ប៉ុន្តែមិនមែនមានន័យថា ការបោះឆ្នោតថា «ទេ» នឹងជួយឲ្យក្រិក និងម្ចាស់បំណុលត្រូវរ៉ូវគ្នាបង្កើតកិច្ចព្រមព្រៀងឡើយ។ បោះឆ្នោតថាទេនេះ នឹងធ្វើឲ្យរដ្ឋាភិបាលក្រិកមានទឹកមាត់កាន់តែប្រៃពេលចរចាខាងមុខ ក្នុងករណីដែលអឺរ៉ុបមិនចង់ឲ្យក្រិកចេញពីក្រុមចាយលុយអឺរ៉ូ។ តែបើថា ករណីក្រិកបរាជ័យក្នុងការទាមទារអ្វីដែលខ្លួនចង់បាន វាប្រាកដណាស់ថាក្រិកនឹងចាកចេញពីតំបន់អឺរ៉ូ។
សូមស្តាប់ការបកស្រាយលោកសៅ ផលនិស្ស័យ៖
ប្រជាជនក្រិកដែលបោះឆ្នោតថា«ទេ»ម្សិលមិញ បានប្រកាសជ័យជម្នះក្រោយលទ្ធផលផ្លូវការត្រឹមបានគេប្រកាសហើយ។ លទ្ធផលផ្លូវការបង្ហាញថាប្រជាជនក្រិចកជាង៦១ភាគរយមិនទទួលសំណើរម្ចាស់បំណុល ខណៈពេលប្រជាជនត្រឹម៣៩ភាគរយទៀតប៉ុណ្ណោះចង់ទទួលសំណើរ។ ប្រមុខរដ្ឋាភិបាលក្រុងអាថែន អាឡិចស៊ីស ត្ស៊ីប្រាស (Alexis Tsipras) ដែលបានអំពាវនាវឲ្យបោះឆ្នោតទាត់ចោលសំណើររបស់ម្ចាស់បំណុលអឺរ៉ុប-មូលនិធិរូបីយវត្ថុអន្តរជាតិបានសាទរភាពក្លាហានរបស់ប្រជាជនក្រិកគ្រប់គ្នាដែលគាំទ្រជំហររដ្ឋាភិបាលក្នុងការចរចាខាងមុខ។ ប្រជាមតិក្រិកដែលបង្ហាញការប្រឆាំងសំណើរអឺរ៉ុប ប្រហែលជាលើកដំបូងបំផុតហើយក្នុងប្រវត្តិសាស្ត្រអឺរ៉ុប ហើយសូម្បីតែអឺរ៉ុបក៏ភ្ងាក់ផ្អើលខ្លាំងនិងមិនដែលធ្លាប់មានសូម្បីតែកូនចិត្តគិតសោះថាក្រិកថ្លើមធំបែបនេះដែរ។ វាប្រាកដណាស់ ក្រោយប្រជាជនក្រិកឈ្នះអឺរ៉ុប ចលនាប្រឆាំងអឺរ៉ុបនឹងរីកសាយភាយពេញអឺរ៉ុប ជាពិសេសនៅរដ្ឋដែលប្រជាជនរងទុក្ខព្រោះវិធានការត្បិតត្បៀតដែរនោះ។ ក្នុងនោះមានដូចជាអេស្ប៉ាញ អ៊ីតាលី និងប៉រទុយហ្កាល់ជាដើម។
១.បោះឆ្នោតប្រជាមតិម្សិលមិញសម្រេចលើអ្វីឲ្យប្រាកដ?
ជុំវិញចលនាប្រជាមតិនៅក្រិកម្សិលមិញ នៅតែមានការភាន់ច្រឡំនៅឡើយក្នុងចំណោមអ្នកមិនសូវបានតាមដានស្ថានការណ៍វិបត្តិនៅក្រិក។ មានអ្នកខ្លះនៅយល់ថា ប្រជាជនក្រិកម្សិលមិញនាំគ្នាបោះឆ្នោតដើម្បីសម្រេចជោគវាសនាប្រទេសជាតិខ្លួនថានឹងចាកចេញពីតំបន់ចាយលុយអឺរ៉ូ ឬសហភាពអឺរ៉ុបផង។ តាមពិតទៅវាមិនមែនដូច្នេះឡើយ ការបោះឆ្នោតម្សិលមិញត្រឹមសួរមតិប្រជាជនថាតើត្រូវទទួលកញ្ចប់សំណើររបស់ម្ចាស់បំណុលអឺរ៉ុបជាថ្នូរនឹងកញ្ចប់លុយសម្រាប់ដោះបំណុលឬអត់ប៉ុណ្ណោះ។ តែការបោះឆ្នោតនេះអាចក៏នឹងធ្វើឲ្យក្រិករបូតចេញពីប្លុកចាយលុយអឺរ៉ូរួមគ្នាដែរ បើការចរចាខាងមុខមិនមានផ្លែផ្កាទេ។
២. ការបោះឆ្នោតថា «ទេ» មានន័យដូចម្តេចសម្រាប់ក្រិក?
ម្សិលមិញ ប្រជាជនក្រិកព្រមបោះឆ្នោតថា ទេ ទាត់ចោលសំណើរម្ចាស់បំណុល ក៏ព្រោះតែប្រជាជនទាំងនោះមិនចង់បន្តរងទុក្ខវេទនាជាថ្មី។ ច្រើនឆ្នាំមកហើយ និយាយឲ្យត្រូវគឺក្រោយវិបត្តិសេដ្ឋកិច្ចសាកលឆ្នាំ ២០០៨កើតឡើង ក្រិកត្រូវធ្វើតាមបញ្ជាម្ចាស់បំណុល ព្រោះតែត្រូវការលុយដោះបំណុល ប៉ុន្តែប្រជាជនក្រិកមិនតិចទេដែលរងទុក្ខវេទនា ដោយសារបាត់បង់សេវាសុខភាព បាត់បង់ការងារ និងប្រឈមបញ្ហាសង្គមផ្សេងទៀតផង។តាមពិតជាក់ស្តែង អ្នករងគ្រោះពិតប្រាកដបើអនុវត្តគោលនយោបាយត្បិតត្បៀតគឺប្រជាជនក្រិកនេះឯង ហើយចំណាត់ការអឺរ៉ុបនេះ វាក៏មិនមែនជាដំណោះស្រាយអចិន្ត្រៃយ៍ដែរ។ ការបង្ខំឲ្យក្រិកតំឡើងពន្ធ កាត់លុយចំណាយសាធារណនិងធ្វើកំណែទម្រង់ផ្សេងទៀត ជាថ្នូរនឹងការទទួលលុយសងបំណុលគេ មិនជួយក្រិកឲ្យផុតពីវិបត្តិរហូតដែរ។ បោះឆ្នោតថា «ទេ» បង្ហាញអឺរ៉ុបកាន់តែច្បាស់ថា ប្រជាជនក្រិកលែងត្រូវការគោលនយោបាយត្បិតត្បៀតរបស់អឺរ៉ុបទៀតហើយ។ បោះឆ្នោតម្សិលមិញជាអ្វីដែលមេដឹកនាំប្រ៊ុយសែលមិនចង់ឃើញទាល់តែសោះ ហើយមុនចេញលទ្ធផលមេដឹកនាំអឺរ៉ុប ដូចជាបារាំងប្រហោងពោះខ្លាំងជាងគេ តែលួចសង្ឃឹមតិចៗដែរថាប្រជាជនក្រិកព្រមទទួលសំណើរ។
ពេលលោក ត្ស៊ីប្រាស ទទួលបានអ្វីដែលលោកចង់បានហើយ។ ពាក្យថា ទេ ចំពោះសំណើរអឺរ៉ុប វាពិតជាជួយឲ្យជំហររដ្ឋាភិបាលក្រុងអាថែនកាន់តែរឹងមាំដើម្បីទប់ទល់ជាមួយម្ចាស់បំណុលអឺរ៉ុបសម្រាប់ការចរចានៅពេលឆាប់ៗខាងមុខ។ ប៉ុន្តែត្រឹមនេះយើងអាចវាយតម្លៃបានពីរយ៉ាង។ ទីមួយបើអឺរ៉ុបមិនចង់ឲ្យក្រិកចាកចេញពីក្រុមចាយលុយអឺរ៉ូដោយខ្លាចការបែកបាក់គ្នាក្នុងក្រុម ម្ចាស់បំណុលអឺរ៉ុបនឹងប្តូរជំហរ ដោយផ្តល់ដំណោះស្រាយផ្សេងដែរបន្ធូរបន្ថយលក្ខខណ្ឌ។ ទីពីរ បើអឺរ៉ុបមិនមានបំណងទុកក្រិកក្នុងក្រុមទេ ការបោះឆ្នោតថាទេមិនខុសពីការបិទផ្លូវដើរខ្លួនឯងទៀត។ ក្រិកមានតែបង្ខំចិត្តដើរចេញពីក្រុមតែប៉ុណ្ណោះ។ វាជារឿងពិបាកប៉ាន់ស្មាន ព្រោះអឺរ៉ុបគ្មានស្មារតីរួបរួមគ្នាឡើយក្នុងការដោះស្រាយបញ្ហាក្រិកបច្ចុប្បន្ន។ ប្រមុខរដ្ឋបារាំងហ្វ្រង់ស្វ័រហូឡង់ចង់ជួយក្រិកព្រោះមិនចង់ឲ្យសុបិន្តពន្លឿនសមាហរណកម្មអឺរ៉ុបនឹងរលាយក្លាយជាផេះ។ ប៉ុន្តែអធិការបតីអាល្លឺម៉ង់ដែលមានទឹកមាត់ប្រៃក្នុងកិច្ចចរចានោះទំនងមានចេតនាចង់ទាត់ក្រិកចេញពីក្រុមវិញ ដូច្នេះទោះក្រិកបោះឆ្នោតថាទេក៏គ្មានអ្វីជាសម្ពាធលើភាគីម្ចាស់បំណុលដែរ។ ប៉ុន្តែផ្ទុយទៅវិញការបោះឆ្នោតថាទេនេះ ក្រិកកំពុងនៅផ្លូវវែងឆ្ងាយនិងគ្រោះថ្នាក់បំផុតមួយ ព្រោះ បើគ្មានកិច្ចព្រមព្រៀង ធនាគារក្រិកនឹងបន្តបិទទ្វារព្រោះគ្មានសាច់ប្រាក់ប្រើប្រាស់។ ជាលទ្ធផលក្រិកនឹងចាកចេញពីក្រុម និងធ្លាក់ចុះក្នុងវិបត្តិកាន់តែធ្ងន់ បើគ្មានជំនួយពីក្រៅទេ។ ប៉ុន្តែតំបន់អឺរ៉ុបទាំងមូលក៏មិនអាចគេចរួចពីគ្រោះធំដែរ។
៣.ក្រិកត្រូវធ្វើអ្វីក្រោយចាកចេញពីតំបន់អឺរ៉ូ ?
រឿងដែលគេកំពុងតាមដានគឺការចាកចេញរបសក្រិកពីប្លុកចាយលុយអឺរ៉ូ ព្រោះលទ្ធភាពនៃការចាកចេញកាន់តែខ្ពស់មែនទែន។ ការមិនលន់តួទទួលសំណើរម្ចាស់បំណុល វាដូចជាបិទផ្លូវដើរខ្លួនឯងដែរ។ បច្ចុប្បន្ន គេកំពុងចាំមើលថាតើក្រិកនឹងធ្វើអ្វីទៀតប្រសិនបើរដ្ឋនេះចាកចេញពីក្រុមមែននោះ។ ក្រោយចាកចេញអ្វីដែលរដ្ឋាភិបាលក្រិកត្រូវធ្វើដំបូងបំផុតគឺបង្កើតរូបីយវត្ថុមួយផ្ទាល់ខ្លួន ព្រោះក្រិកមិនប្រើប្រាស់លុយអឺរ៉ូទៀតទេ។ ក្រោយបង្កើតលុយផ្ទាល់ខ្លួន ក្រិកមិនចាំបាច់ចាកចេញពីសហភាពអឺរ៉ុបដែរ ព្រោះក្រិកអាចធ្វើដូចរដ្ឋអឺរ៉ុបមួយចំនួនជាពិសេសចក្រភពអង់គ្លេសដែលជាសមាជិកសភាពអឺរ៉ុប ប៉ុន្តែចាយលុយផោន។ យ៉ាងណាកដោយ ក្រោយបង្កើតរូបីយវត្ថុផ្ទាល់ខ្លួន ក្រិកត្រូវប្រឈមបញ្ហាមួយដ៏ធំគឺតម្លៃរូបីយវត្ថុដើម្បីប្រើប្រាស់ក្នុងសេដ្ឋកិច្ចនិងបើកធនាគារឡើងវិញ។ គេរំពឹងថា អឺរ៉ុប អាមេរិកនិងសម្ព័ន្ធមិត្តនឹងតាមព្យាបាទក្រិកដោយព្យាយាមធ្វើឲ្យតម្លៃរូបីយវត្ថុថ្មីរបស់ក្រិកធ្លាក់ចុះទៅរកតម្លៃទាបបំផុត។ បើគ្មានអ្នកជួយជ្រោមជ្រែងទេ សេដ្ឋកិច្ចក្រិកនឹងរលំចៀសមិនរួចនៅពេលខាងមុខ។
© រក្សាសិទ្ធិដោយ thmeythmey.com