ជាតិ
នយោបាយជាតិ
មន្រ្តីព្រំដែនកម្ពុជា-វៀតណាម ចាប់ផ្តើមជជែកគ្នា
× នៅម៉ោង ៩ ព្រឹក ថ្ងៃទី៦ ខែកក្កដានេះ គណៈកម្មការចម្រុះព្រំដែនគោកកម្ពុជា និងវៀតណាម ចាប់ផ្តើមបើកកិច្ចប្រជុំ ដើម្បីដោះស្រាយវិវាទព្រំដែនដែលនៅសេសសល់ និងបញ្ហាតាមខ្សែបន្ទាត់ព្រំដែនផ្សេងទៀតកន្លងមក។ កិច្ចប្រជុំនេះ ធ្វើឡើងក្នុងរាជធានីភ្នំពេញ នៅទីស្តីការគណៈរដ្ឋមន្រ្តី។
ដូចការគ្រោងទុកកិច្ចប្រជុំគណៈកម្មការចម្រុះព្រំដែនគោកកម្ពុជា និងវៀតណាម បានចាប់ផ្តើមហើយ នៅប៉ុន្មាននាទីមុននេះ។ ភាគីកម្ពុជា ដឹកនាំដោយលោក វ៉ា គឹមហុង ប្រធានគណៈកម្មការចម្រុះព្រំដែនកម្ពុជា រីឯភាគីវៀតណាម ដឹកនាំដោយលោក Ho Xuan Son អនុរដ្ឋមន្រ្តីការបរទេសវៀតណាម ទទួលបន្ទកកិច្ចការព្រំដែន។
អ្នកសារព័ត៌មានជាតិ និងអន្តរជាតិ ត្រូវគេអនុញ្ញាតឲ្យចូលថតរូបប៉ុន្មាន ៣ នាទី នៅពេលដែលកិច្ចប្រជុំ បានចាប់ផ្តើម។ ហើយកាលពីថ្ងៃចន្ទម្សិលមិញ លោក វ៉ា គឹមហុង បានប្រាប់សារព័ត៌មានថ្មីៗថា រូបលោកនៅមិនទាន់ប្រាកដថា ក្រោយកិច្ចប្រជុំនេះ មន្រ្តីព្រំដែននៃប្រទេសទាំងពីរ នឹងនិយាយពីលទ្ធផលនៃកិច្ចប្រជុំសង្ខេប ប្រាប់អ្នកសារព័ត៌មានឬយ៉ាងណានោះទេ ព្រោះវាអាស្រ័យលើការសម្រេចរួមគ្នាពីភាគីទាំងពីរ។
សូមបញ្ជាក់ថា កិច្ចប្រជុំនេះ ធ្វើឡើងរយៈពេល ២ ថ្ងៃ ពោលគឺចាប់ពីថ្ងៃទី ៧ ដល់ថ្ងៃទី ៨ ខែកក្កដា៕
© រក្សាសិទ្ធិដោយ thmeythmey.com