កិច្ចប្រជុំព្រំដែនកម្ពុជា-វៀតណាម បញ្ចប់ថ្ងៃទី ១ ដោយពុំទាន់មានលទ្ធផល

ជាតិ

នយោបាយជាតិ

កិច្ចប្រជុំព្រំដែនកម្ពុជា-វៀតណាម បញ្ចប់ថ្ងៃទី ១ ដោយពុំទាន់មានលទ្ធផល

07, Jul 2015 , 12:28 pm

រូបភាព

ដោយ: រំដួល ចិត្រា (Romdoul Chetra)

នៅម៉ោង ១២ និង ១៥ នាទី ថ្ងៃទី៧ ខែកក្កដានេះ កិច្ចប្រជុំគណៈកម្មការចម្រុះព្រំដែនកម្ពុជា និងវៀតណាម បានបិទបញ្ជប់នៅថ្ងៃទី ១ ហើយ ក្រោយពីជជែកគ្នាអស់រយៈពេលជាង ៣ ម៉ោង នៅទីស្តីការគណៈរដ្ឋមន្រ្តី។

តែយ៉ាងណាក្រោយកិច្ចប្រជុំនៅថ្ងៃដំបូងនេះ លោក វ៉ា គឹមហុង ប្រធានគណៈកម្មការចម្រុះព្រំដែនកម្ពុជា នៅមិនទាន់អាចនិយាយពីលទ្ធផលនៃកិច្ចប្រជុំនៅថ្ងៃទី ១ ស្តីពីបញ្ហាព្រំដែនកម្ពុជា និងវៀតណាម ប្រាប់អ្នកកាសែតបាននោះទេ។ លើសពីនេះ សូម្បីតែរបៀបវារៈសំខាន់ៗនៃកិច្ចពិភាក្សាក៏លោក វ៉ា គឹមហុង មិនទាន់និយាយនោះដែរ។ លោក វ៉ា គឹមហុង បានបញ្ជាក់យ៉ាងខ្លីថា៖« នៅមិនទាន់មានលទ្ធផលអ្វីទេ ចាំមើលស្អែក ដែលជាថ្ងៃបញ្ជប់» ។

សូមបញ្ជាក់ថា កិច្ចប្រជុំគណៈកម្មការចម្រុះព្រំដែនកម្ពុជា និងវៀតណាមនេះ ខាងភាគីកម្ពុជា ដឹកនាំដោយលោក វ៉ា គឹមហុង ប្រធានគណៈកម្មការចម្រុះព្រំដែនកម្ពុជា រីឯភាគីវៀតណាម ដឹកនាំដោយលោក Ho Xuan Son អនុរដ្ឋមន្រ្តីការបរទេសវៀតណាម ទទួលបន្ទកកិច្ចការព្រំដែន។ កិច្ចប្រជុំនេះ ធ្វើឡើងរយៈពេល ២ ថ្ងៃ ពោលគឺចាប់ពីថ្ងៃទី ៧ ដល់ថ្ងៃទី ៨ ខែកក្កដា៕