អន្តរជាតិ
នយោបាយអន្តរជាតិ
អ៊ីរ៉ង់ទារឲ្យមហាអំណាចដកបម្រាមនាំចូលអាវុធនិងកាំជ្រួចមីស៊ីល
×
ក្នុងកិច្ចចរចាកម្មវិធីនុយក្លេអ៊ែរអ៊ីរ៉ង់ ភាគីរដ្ឋាភិបាលអ៊ីរ៉ង់បានទារឲ្យមានការបញ្ចូលចំណុចពាក់ព័ន្ធការដកបម្រាមនាំចូលអាវុធយុទ្ធភ័ណ្ឌ និងកាំជ្រួចមីស៊ីលផងក្នុងកិច្ចព្រមព្រៀង។ ក្រុមមហាអំណាចលោកខាងលិចបានជំទាស់ការទាមទាររបស់រដ្ឋាភិបាលអ៊ីរ៉ង់ដាច់ខាត ដែលនេះបានធ្វើឲ្យកិច្ចចរចាកាន់តែស្មុគស្មាញឡើយ។ គេបារម្ភថាភាគីមិនអាចត្រូវរ៉ូវគ្នាដើម្បីបង្កើតកិច្ចព្រមព្រៀងមួយ ឲ្យបានមុនថ្ងៃកំណត់។
លោក មុំ ពិទូរ្យ លម្អិតព័ត៌មាននេះ
កិច្ចចរចាកម្មវិធីនុយក្លេអ៊ែរកំពុងបន្តយ៉ាងសស្រាក់សស្រាំនៅក្នុងទីក្រុងវ្យ៉ែនប្រទេសអូទ្រីស ស្របពេលដែលកាលកំណត់ចុងក្រោយកាន់តែជិតដល់មែនទែនហើយ។ ភាគីចរចាមហាអំណាច៦ និងអ៊ីរ៉ង់នៅតែបន្តខ្វែងគំនិតគ្នាខ្លាំងផងដែរចំពោះចំណុចស្នូលដែលត្រូវចែងក្នុងកិច្ចព្រមព្រៀង។ ម្សិលមិញ បញ្ហាធំដែលធ្វើឲ្យភាគីចរចាគ្នាមិនត្រូវគ្នាសោះនោះគឺ ការដកទណ្ឌកម្មនិងការហាមឃាត់ការនាំចូលអាវុធ។ តំណាងរដ្ឋាភិបាលអ៊ីរ៉ង់ ទារឲ្យមហាអំណាចបញ្ចូលចំណុចទាក់ទងការដកការហាមឃាត់ការនាំចូលអាវុធ និងកាំជ្រួចមីស៊ីលនៅក្នុងកិច្ចព្រមព្រៀងនេះ។
យោងតាមសម្តីប្រតិភូដែលចូលរួមចរចារបស់អ៊ីរ៉ង់ រដ្ឋាភិបាលក្រុងតេអ៊ីរ៉ង់ចង់ទាមទារឲ្យភាគីពាក់ព័ន្ធជាពិសេសមហាអំណាចដែលបានដាក់ហាមការនាំចូលអាវុធទៅអ៊ីរ៉ង់នោះ ឲ្យដកការហាមឃាត់របស់ខ្លួនវិញ។ អ៊ីរ៉ង់ចង់ឲ្យមានការដកការហាមឃាត់ការនាំអាវុធនេះ ស្របពេលជាមួយការដកទណ្ឌកម្មរបស់អង្គការសហប្រជាជាតិក្រោយពេលកិច្ចព្រមព្រៀងអ៊ីរ៉ង់និងមហាអំណាច៦ចេញរូបរាងជាផ្លូវការ។ អ៊ីរ៉ង់ចាត់ទុកថា ខ្លួនមានសិទ្ធិពេញលេញក្នុងការនាំចូល អាវុធយុទ្ធភ័ណ្ឌ ជាពិសេសប្រព័ន្ធមីស៊ីលជាដើម ព្រោះវាគ្មានប៉ះពាល់ និងមិនមានពាក់ព័ន្ធអ្វីជាមួយកម្មវិធីនុយក្លេអ៊ែរឡើយ។
យ៉ាងណាក៏ដោយចុះ មហាអំណាចលោកខាងលិចដែលអង្គុយក្នុងតុចរចាដែលនោះ បានជំទាស់ការទាមទាររបស់អ៊ីរ៉ង់ដាច់ខាត។
មន្ត្រីលោកខាងលិចម្នាក់ដែលមិនបានបង្ហាញអត្តសញ្ញាណបានសង្កត់ធ្ងន់ថា ការទាមទារទាំងអម្បាលម៉ានរបស់រដ្ឋាភិបាលអ៊ីរ៉ង់ជារឿងមិនអាចទទួលយបាននោះឡើយ ទោះក្នុងលក្ខខណ្ឌណាក៏ដោយ។ លោកខាងលិចបារម្ភថា កាលណាបើដកការរឹតត្បិតសិទ្ធិអ៊ីរ៉ង់ក្នុងការនាំចូលអាវុធ និងប្រើប្រព័ន្ធមីស៊ីល វានឹងធ្វើឲ្យមានអស្ថិរភាពនៅក្នុងតំបន់ទាំងមូល។
កាលកំណត់នៃការចរចារគឺយូរបំផុតត្រឹមយប់ថ្ងៃអង្គារនេះ។ បើសិនជាក្រុមប្រទេសមហាអំណាចទាំង៦ និងអ៊ីរ៉ង់នៅតែមិនអាចរកចំណុចរួមគ្នាឃើញដើម្បីត្រួសសត្រាយផ្លូវទៅបង្កើតកិច្ចព្រមព្រៀងទេនោះ សហរដ្ឋអាមេរិកអាចនឹងដើរចេញពីតុចរចាលែងត្រលប់វិញផងក៏មិនដឹង។
តាមពិតទៅ រដ្ឋាភិបាលក្រុងវ៉ាស៊ីនតោនដែលសកម្មក្នុងការចរចាជាមួយអ៊ីរ៉ង់ដែលនោះ បារម្ភជាងគេជុំវិញការទាមទារដកការហាមឃាត់ការនាំចូលសព្វាវុធរបស់អ៊ីរ៉ង់។ អាមេរិកភ័យថា កាលណាអ៊ីរ៉ង់មានសពា្វវុធទំនើប សម្ព័ន្ធមិត្តខ្លួនអ៊ីស្រាអែលច្បាស់ស្ថិតក្រោមការគំរាមកំហែងជាក់ជាមិនខាន។ ចង់មិនចង់ អាមេរិកមិនអាចបណ្តោយឲ្យអ៊ីរ៉ង់មានសិទ្ធិនាំចូលសព្វាវុធ ជាពិសេសកាំជ្រួចមីស៊ីលដើម្បីប្រើប្រាស់ក្នុងវិស័យការពារជាតិរបស់ខ្លួនបានរហ័សឡើយ៕
© រក្សាសិទ្ធិដោយ thmeythmey.com