ជាតិ
សេដ្ឋកិច្ច
ការនាំអង្ករចេញរបស់កម្ពុជាកើនជិត៦០ភាគរយក្នុងឆមាសទី១
× នៅក្នុងរយៈពេល៦ខែ ដើមឆ្នាំ២០១៥នេះកម្ពុជានាំចេញអង្ករទៅកាន់ទីផ្សារអន្តរជាតិបានចំនួន២៨៣.៨២៥តោនកើនឡើង៥៩.៥ភាគរយបើធៀបនឹងរយៈពេលដូចគ្នាកាលពីឆ្នាំ២០១។ប្រភេទអង្ករទាំងនោះរួមមានអង្ករក្រអូប អង្ករស និងប្រភេទអង្ករចំហុយ។ក្រុមហ៊ុនដែលនាំអង្ករចេញមានចំនួន៧២ក្រុមហ៊ុនខណៈដែលទីផ្សារដែលកម្ពុជាបាននាំអង្ករទៅមានចំនួន៥១ប្រទេស។
នៅក្នុងរយៈពេល៦ខែ ពោលគឺក្នុងឆមាសទី១ ឆ្នាំ២០១៥នេះកម្ពុជានាំចេញអង្ករទៅកាន់ទីផ្សារអន្តរជាតិបានចំនួន២៨៣.៨២៥តោនកើនឡើង៥៩.៥ភាគរយបើធៀបនឹងរយៈពេលដូចគ្នាកាលពីឆ្នាំ២០១៤ដែលមានត្រឹមតែ១៧៧,៩២៨តោនប៉ុណ្ណោះ។ នេះបើយោងតាមរបាយការណ៍ការណ៍របស់លេខាធិការដ្ឋានសម្រាប់បំពេញបែបបទនាំចេញអង្ករ។
លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ ក៏បានបង្ហាញផងដែរ ពីប្រភេទអង្ករដែលកម្ពុជាបាននាំចេញ។ ប្រភេទអង្ករទាំងនោះរួមមានអង្ករក្រអូបនាងម្លិះអង្ករក្រអូបសូមាលីអង្ករក្រអូបសរីរាង្គនិងអង្ករក្រអូបភ្លឺចំនួន១២៦,៣៥៦តោន ស្មើនឹង៤៤.៥០ភាគរយ ប្រភេទអង្ករសចម្រុះគ្រាប់វែងនិងអង្ករសប្រណិតចំនួន១៣៤,៦០៥តោន ស្មើនឹង៤៧.៤០ភាគរយ និងប្រភេទអង្ករចំហុយគ្រាប់វែងមានចំនួន២២,៨៦៤តោនស្មើនឹង៨.១០ភាគរយ។
បើតាមរបាយការណ៍ដដែលក្រុមហ៊ុនដែលនាំអង្ករចេញមានចំនួន៧២ក្រុមហ៊ុនខណៈដែលទីផ្សារដែលកម្ពុជាបាននាំអង្ករទៅមានចំនួន៥១ប្រទេស រួមមានទីផ្សារប្រទេសសមាជិកសហគមន៍អឺរ៉ុបចំនួន ២៦ក្នុងបរិមាណ១៧២.៣៧១តោនប្រទេសសមាជិកអាស៊ានចំនួន៣គឺម៉ាឡេស៊ី ឥណ្ឌូនេស៊ី និងសិង្ហបុរីក្នុងបរិមាណសរុប៣០.០២៦តោន និង២២ប្រទេសផ្សេងទៀត ដូចជាចិនហុងកុង អូស្រា្តលី អាមេរិក និងកាណាដាជាដើម ក្នុបរិមាណ៨១.៤២៨តោន ក្នុងនោះប្រទេសចិននាំចូលបានរហូតដល់៧២.០៨៦តោន។
សូមបញ្ជាក់ថានៅក្នុងខែឧសភាឆ្នាំ២០១៥កម្ពុជានាំចេញអង្ករបានចំនួន៤១,៨៤២តោន កើនឡើង៤៩.៥ភាគរយបើធៀបនឹងការនាំចេញអង្ករកាលពីមេសាឆ្នាំ២០១៤ ដែលមានចំនួន២៧,៩៧១តោន។ដោយឡែកក្នុងរយៈពេល៥ខែដើមឆ្នាំ២០១៥ កម្ពុជានាំចេញអង្ករបានចំនួន២៤៣,០២៥តោនកើនឡើង៦៣.៩ភាគរយ ខណៈក្នុងឆ្នាំ២០១៤ កន្លងទៅកម្ពុជាបាននាំអង្ករបានចំនួន ៣៨៧,០៦១តោនកាន់ទីផ្សារអន្តរជាតិ៕
© រក្សាសិទ្ធិដោយ thmeythmey.com