អន្តរជាតិ
នយោបាយអន្តរជាតិ
រុស្ស៊ីត្រៀមបញ្ជូននាវាមុជទឹកគ្រោះថ្នាក់បំផុតទៅក្បែររដ្ឋអាឡាស្កាអាមេរិក
×
ទំនាក់ទំនងការទូតរវាងអាមេរិកនិងរុស្ស៊ីនៅតែមិនទាន់ល្អប្រសើរឡើងវិញឡើយ ព្រោះតែជម្លោះប្រដាប់អាវុធអ៊ុយមិនអាចរកផ្លូវចប់ឃើញ។ ទោះជាមើលមុខគ្នាមិនចំក៏ដោយ លោក វ្ល៉ាឌីមៀ ពូទីន សុខចិត្តផ្ញើរសារជូនពរប្រជាជនអាមេរិកទៅកាន់លោក បារ៉ាក់ អូបាម៉ា ក្នុងថ្ងៃបុណ្យឯករាជ្យអាមេរិកកន្លងមក។ សកម្មភាពរបស់ប្រមុខរដ្ឋរុស្ស៊ីអាចនឹងជួយឲ្យកម្តៅ និងការប្រឈមមុខគ្នាផ្នែកការទូតថយចុះខ្លះ ប៉ុន្តែគេមិនដឹងទេថា ភាគីត្រៀមខ្លួនកម្រិតណាដើម្បីស្តារទំនាក់ទំនងជាមួយគ្នាឡើយ។ ម្យ៉ាងស្រាប់តែលេចលឺព័ត៌មានមួយដែល អះអាងថា រុស្ស៊ីគ្រោងពង្រាយនាវាមុជទឹកស៊េរីចុងក្រោយទៅក្បែររដ្ឋអាឡាស្ការបស់អាមេរិក ហើយលោក ពូទីន ក៏កំណត់សាងសង់នាវាមុជទឹកដើរដោយថាមពលនុយក្លេអ៊ែរសម្រាប់កម្ទេចនាវាពិឃាតនិងនាវាដឹកយន្តហោះរបស់ក្រុងវ៉ាស៊ីនតោនជាច្រើនគ្រឿងផង។ នាវាមុជទឹកដ៏គ្រោះថ្នាក់នេះនឹងចូលបម្រើវិស័យការពារជាតិត្រឹម ឆ្នាំ ២០២០។
សូមស្តាប់ការបកស្រាយរបស់លោក សៅ ផលនិស្ស័យ៖
ក្នុងថ្ងៃ ៤កក្កដា ប្រធានាធិបតីរុស្ស៊ីលោក វ្ល៉ាឌីមៀ ពូទីន បានសម្រេច ផ្ញើសំបុត្រផ្ទាល់ទៅកាន់ប្រធានាធិបតីអាមេរិកលោក បារ៉ាក់ អូបាម៉ាដើម្បីសាទរប្រជាជនអាមេរិកថ្ងៃបុណ្យឯករាជ្យ ។ រឿងគួរឲ្យភ្ងាក់ផ្អើលនេះ ធ្វើឲ្យគ្រប់គ្នាសង្ឃឹមថាការប្រឈមមុខគ្នាផ្នែកការទូតអាចនឹងថមថយវិញ ព្រោះភាគីទាំងពីរអាចស្វែងរកផ្លូវផ្សះផ្សាចំណងការទូតដែលកំពុងធ្លាក់ចុះខ្លាំងនេះ។ ភាគីរុស្ស៊ីដូចជាត្រៀមខ្លួនរួចហើយដើម្បីស្តារទំនាក់ទំនង ជាពិសេសចង់បង្កើនការសហការគ្នាប្រឆាំងភេរវកម្មនិងដោះស្រាយវិបត្តិសាកលផ្សេងទៀត។
ទោះជាយ៉ាងណាក៏ដោយ មិនទាន់មានសញ្ញណាមួយបញ្ជាក់ថា មហាអំណាចទាំងពីរនេះព្រមព្រៀងគ្នាស្តារចំណងការទូតឡើងវិញឡើយ ត្បិតអាមេរិកនៅបន្តសាងកម្លាំងទ័ពឥតឈប់នៅបាល់ទិកនិងអឺរ៉ុបខាងកើត ហើយជម្លោះភាគខាងកើតអ៊ុយក្រែនដោះស្រាយមិនចេញ។ ថ្មីៗនេះទៀតសោត រុស្ស៊ីក៏បន្តបង្កើនថវិកាការពារជាតិ ត្រៀមទំនើបកម្មយោធា និងសាងសង់អាវុធទំនើបៗជំនាន់ថ្មីយ៉ាងច្រើន ដូចជាត្រៀមធ្វើសង្គ្រាមដូច្នេះដែរ។
១. រុស្ស៊ីពង្រាយនាវាមុជទឹកសាហាវបំផុតទៅកៀក រដ្ឋអាមេរិក «អាឡាស្កា»
ទោះជាលោក ពូទីន ត្រៀមខ្លួនស្តារចំំណងមិត្តភាពជាមួយរដ្ឋបាលក្រុងវ៉ាស៊ីនតោន ក៏ពិតមែន មេដឹកនាំរុស្ស៊ីម្នាក់នេះមិនភ្លេចត្រៀមខ្លួនទប់ទល់ការគំរាមកំហែងរបស់ក្រុងវ៉ាស៊ីនតោនឡើយ។ ដូចរៀបរាប់ខាងលើ រដ្ឋាភិបាលក្រេមឡាំងដំឡើងលុយសម្រាប់វិស័យយោធាជាពិសេសទ័ពជើងទឹក ហើយអ្វីដែលធ្វើឲ្យក្រុងវ៉ាស៊ីនតោនភ្ងាក់ផ្អើលនៅគឺ រុស្ស៊ីគ្រោងពង្រាយនាវាមុជទឹកទំនើបចុងក្រោយនិងសាហាវបំផុតរបស់ខ្លួនទៅជិតអតីតទឹកដីខ្លួន និងបច្ចុប្បន្នជារដ្ឋទី៤៩ របស់អាមេរិកគឺអាឡាស្កា។
បើយោងតាមក្រសួងការពាជាតិរុស្ស៊ី នាវាមុជទឹកដ៏គ្រោះថ្នាក់ជំនាន់៤(Borei-class)ដែលទើបចូលបម្រើវិស័យការពារជាតិរុស្ស៊ីឆ្នាំ ២០១៣នឹងត្រូវចូលទៅសំចតនៅក្បែររដ្ឋអាឡាស្កា កាលណាមូលដ្ឋាននាវាជើងទឹកនៅតំបន់Kamchatkaត្រូវសាងសង់ចប់ជាស្ថាពរនៅប៉ុន្មានខែខាងមុខនេះ។ គេរំពឹងថា កំពង់ផែនាវាមុជទឹករុស្ស៊ីនឹងត្រូវបើកប្រើប្រាស់ជាផ្លូវការក្នុងខែតុលាការខាងមុខនេះតែម្តង។ កំពង់ផែថ្មីនេះនឹងក្លាយជាផ្ទះសម្រាប់នាវាមុជទឹកស៊េរីទំនើបចុងក្រោយរបស់រុស្ស៊ីជំនាន់ទី៤ និងជាទីតាំងតំឡើងកាំជ្រួចមីស៊ីលសម្រាប់នាវាមុជទឹកផងដែរ។ បើតាមក្រសួងការពារជាតិរុស្ស៊ី មូលដ្ឋានទ័ពជើងទឹករុស្ស៊ីនៅមហាសមុទ្រប៉ាស៊ីហ្វិកមាន នាវាមុជទឹកដើរដោយថាមពលនុយក្លេអ៊ែរបំពាក់កាំជ្រួចបាលីស្ទិក៥គ្រឿង នាវាមុជទឹកដើរដោយថាមពលនុយក្លេអ៊ែរបំពាក់មីស៊ីល ៥គ្រឿង នាវាមុជទឹកដើរដោយថាមពលនុយក្លេអ៊ែរសម្រាប់វាយប្រហារ ៥គ្រឿង និងនាវាមុជទឹកធម្មតា ៨គ្រឿងផ្សេងទៀតផង។ វត្តមាននាវាមុទឹកស៊េរីក្រោយ នៅក្បែរអាមេរិកនេះ បង្ហាញច្បាស់ថា រុស្ស៊ីកំពុងរៀបយុទ្ធសាស្ត្រជើងទឹកដើម្បីប្រឆាំងក្រុងវ៉ាស៊ីនតោន ករណីដែលមានការប៉ះទង្គិចគ្នាកើតឡើង។
២. រុស្ស៊ីផលិតនាវាមុជទឹកដែលអាចកម្ទេចនាវាដឹកយន្តហោះអាមេរិក
រឿងមួយទៀត គឺផែនការរបស់ក្រុងម៉ូស្គូ ដែលចង់សង់នាវាមុជទឹកជំនាន់ទី៥ ដែលសាហាវនិងទំនើបបំផុតក្នុងចំណោមនាវាមុជទឹកជំនាន់ផ្សេងទៀតលើពិភពលោក។ អ្វីដែលគេចាប់អារម្មណ៍ខ្លាំង នាវាមុជទឹករបស់រុស្ស៊ីថ្មីនឹងមានសមត្ថភាពពិសេសដោយបង្កើតឡើងដើម្បីកម្ទេចនាវាពិឃាតធំៗ ជាពិសេសនាវាដែលប្រើប្រាស់សម្រាប់ដឹកយន្តហោះតែម្តង។ ហើយគោលដៅចម្បងនៃនាវាមុជទឹកថ្មីនេះ គឺនាវាដឹកយន្តហោះរបស់ក្រុងវ៉ាស៊ីនតោនតែម្តង ។ បើតាមសារព័ត៌មានរុស្ស៊ី The Moscow Times គម្រោងសង់នាវាមុជទឹកជំនាន់ថ្មីបំផុតពីរគ្រឿងស្ថិតក្នុងដំណើរការហើយ ហើយវាផ្នែកមួយនៃផែនទំនើបកម្មយោធារបស់លោក ពូទីនផង។ បើតាមឧត្តមនាវីឯក Viktor Chirkovគម្រោងសាងសង់នាវាមុជទឹករបស់រុស្ស៊ីចាប់ផ្តើមដំណើរការពិតមែន ហើយគោលដៅនៃការផលិតនាវាជំនាន់ ៥មានបីយ៉ាងធំ។ ទីមួយ នាវាមុជទឹកដ៏ទំនើបនេះនឹងមានភារកិច្ចការពារក្រុមនាវាមុជទឹកដែលបំពាក់កាំជ្រួចបាលីស្ទិកមីស៊ីលក្នុងពេលប្រយុទ្ធ ។ ទីពីនាវានេះនឹងមានសមត្ថភាពវាយប្រហារនាវាមុជទឹកសត្រូវក្នុងពេលប្រយុទ្ធ។ ចំណុចចុងក្រោយ នាវាមុជទឹកជំនាន់ទីប្រាំនឹងត្រូវបំពាក់ដោយមីស៊ីលរយៈចម្ងាយឆ្ងាយដែលជំនាញពិសេសឲ្យវាវាយប្រហារកម្ទេចនាវាពិឃាតរបស់សត្រូវ និងនាវាដឹកយន្តហោះតែម្តង។ គេរំពឹងថា អាវុធទំនើបៗបែបនេះ នឹងត្រូវចូលបម្រើក្នុងវិស័យការពារជាតិរុស្ស៊ីឆាប់ៗខាងមុខនេះ ហើយវាពិតជាសញ្ញាគ្រោះថ្នាក់មួយសម្រាប់ទ័ពជើងទឹកអាមេរិកដែលពឹងផ្អែកលើនាវាដឹកយន្តហោះសម្រាប់ចល័តទ័ព និងយន្តហោះប្រដេញក្នុងសមរភូមិជាច្រើនកន្លងមក៕
© រក្សាសិទ្ធិដោយ thmeythmey.com