តំណាងរាស្ត្រមាននិន្នាការផ្ទុយគ្នា ប៉ុន្តែថ្កោលទោសទង្វើលោក សុខ ប៊ុន លើ សាសា ដូចគ្នា
× មិនមានសេចក្តីថ្លែងការណ៍ផ្លូវការឡើយ ប៉ុន្តែបើគណនីហ្វេសប៊ុកផ្ទាល់ លោក ហ៊ុន ម៉ានី តំណាងរាស្ត្រ នៃគណបក្សប្រជាជនកម្ពុជា និងលោកស្រី មូរ សុខហួ តំណាងរាស្ត្រនៃគណបក្សសង្គ្រោះជាតិសុទ្ធតែបានថ្កោលទោសនូវទង្វើរបស់ឧកញ៉ា សុខ ប៊ុន ប្រធានក្រុមហ៊ុន TEHO Development និងជាប្រធានសមាគមអ្នកវាយតម្លៃអចលនវត្ថុកម្ពុជា ជាមួយនឹងអង្គរក្សដែលបានវាយតប់ទៅលើអតីតពិធិការិនីទូរស្សន៍ឈ្មោះ សាសា នៅក្នុងភោជនីយដ្ឋានមួយនៅកោះពេជ្រ។
លោកស្រី មូរ សុខហួ បានសរសេរថា៖ «បើតុលាការគិតថា កម្ពុជា ជានីតិរដ្ឋមែន នោះ គួរតែចាត់វិធានការពេញលេញ ដើម្បី ផ្តន្ទាទោស ឧកញ៉ា សុខ ប៊ុន ដាក់ក្នុងពន្ធនាគារ អោយខាងតែបាន។ ដូចយើងទាំងអស់គ្នាបានដឹងហើយថា នេះជាបទឧក្រិដ្ឋប៉ុនប៉ងមនុស្សឃាតមក លើស្ត្រីភេទទន់ខ្សោយម្នាក់ ដែលឧក្រិដជនរូបនេះដឹងហើយថា នាងមិនអាចតដៃបាន។ ក្នុងនាមខ្ញុំជានារីខ្មែរម្នាក់ សូមចូលរួមសោកស្តាយផង»។
តំណាងរាស្ត្រគណបក្សសង្គ្រោះជាតិក៏បានលើកឡើងផងដែរថា ការប្រើអំពើហឹង្សាប្រឆាំងស្ត្រី គឺមិនអាចទទួលយកបានជាដាច់ខាត ហើយត្រូវតែដោះស្រាយតាមច្បាប់ ។ មិនគួរអនុញ្ញាតគ្រាន់តែទទួលសំណង ហើយអនុញ្ញាតអោយអ្នកប្រព្រឹត្តិបទឧក្រិដ្ឋមានសេរីភាពឡើយ។អំពើហឹង្សាទៅលើស្ត្រី ជាបទឧក្តិដ្ឋប្រឆាំងសិទ្ធិមនុស្សរបស់ស្ត្រី។ យើងត្រូវតែរួមគ្នាបញ្ឈប់អំពើហឹង្សាមកលើស្ត្រី។
ជាមួយគ្នានេះផងដែរ លោក ហ៊ុន ម៉ានី តំណាងរាស្ត្រគណបក្សប្រជាជនកម្ពុជា និងជាប្រធានសហភាពសហព័ន្ធយុវជនកម្ពុជា បានកត់សម្គាល់ថា៖ «ទោះបីជាមានបញ្ហាអ្វីក៏ដោយ រាល់ការប្រើប្រាស់អំពើហឹង្សាលើស្ត្រីជាដំណោះស្រាយ គឺជាអ្វីដែលសង្គមមិនអាចទទួលយកបាន និងជាទង្វើដែលត្រូវថ្កោលទោស»។
យោងតាមឃ្លីបវីដេអូដែលថតដោយកាម៉េរ៉ាសុវត្ថិភាព គេសង្កេតឃើញសកម្មភាពវាយដំយ៉ាងធ្ងន់ធ្ងរពីបុរសម្នាក់ដែលគេអះអាងថា ជាលោក សុខ ប៊ុន និងអង្គរក្ស ទៅលើនាង សាសា អតីតពិធីការិនីទូរទស្សន៍នៅក្នុងហាងស្ថិតក្នុងបរិវេណកោះពេជ្យ កាលពីយប់ថ្ងៃទី២ ខែកក្កដា។ តាមបទសម្ភាសមួយជាមួយទូរទស្សន៍ CNC កញ្ញា សាសា បានអះអាងថា នាង និង សុខ ប៊ុន មិនដែលស្គាល់គ្នានោះឡើយ។ នាងបានបញ្ជាក់ថា ទំនាស់កើតឡើងបន្ទាប់ពីនាងព្យាយាមរារាំង លោក សុខ ប៊ុន និងក្រុមអង្គរក្ស មិនឲ្យនាំម្ចាស់ហាងជនជាតិជប៉ុនដែលជាមិត្តភក្តិរបស់នាងចេញទៅក្រៅ ខណៈដែលមិត្តភក្តិនោះកំពុងស្រវឹងជោគជាំ។ នាងបានទទួលរងការជេរប្រមាថពីសំណាក់អង្គរក្ស និងរងការវាយដំផ្ទាល់ពីសំណាក់លោក សុខ ប៊ុន។
ប៉ុន្តែជាមួយគ្នានេះផងដែរ មេធាវីលោក សុខ ប៊ុន ដែលមិនបានបញ្ចេញឈ្មោះ បាននិយាយប្រាប់គេហទំព័រ Fresh News ថា មានភ្លើងទើបមានផ្សែង ហើយកំហឹងរបស់លោក សុខ ប៊ុន បានកើតឡើងបន្ទាប់ពី សាសា បានជេប្រមាថ និងគប់ទូរសព្ទទៅលើលោក។
គួរបញ្ជាក់ថា បន្ទាប់ពីជនរងគ្រោះដាក់ពាក្យបណ្តឹងទៅកាន់តុលាការ លោកព្រះរាជអជ្ញារង ហ៊ឹង ប៊ុនថននៃសាលាដំបូងរាជធានីភ្នំពេញ បានចេញដីកាកោះហៅ លោក សុខ ប៊ុន ឲ្យចូលខ្លួនបំភ្លឺកាលពីថ្ងៃទី៨ ខែកក្កដា តែរហូតមកដល់ពេលនេះបុរសជាឧកញ៉ារូបនេះ មិនទាន់បង្ហាញខ្លួននៅឡើយទេ។
សាសា ដែលមានឈ្មោះដើមថា ឯក សុជាតា បានសរសេរនៅលើហ្វេសប៊ុករបស់ខ្លួនថា៖ «គ្រួសារខ្ញុំមិនដែលនិយាយរឿងលុយ រឺសំណងអ្វីនៅឡើយទេ ទោះជាប៉ុន្មានលានក៏ដោយ សូមអោយចេញមុខដោះស្រាយចំពោះមុខច្បាប់ !»៕
© រក្សាសិទ្ធិដោយ thmeythmey.com