សង្គមអន្តរជាតិ
អន្តរជាតិ
រយៈពេល១ឆ្នាំ UNSC នៅមិនមានសមត្ថភាពវែកមុខអ្នកបាញ់យន្តហោះម៉ាឡេស៊ី MH17
× សល់រយៈពេលត្រឹមតែ៣ថ្ងៃទៀតតែប៉ុណ្ណោះ ខួបមួយឆ្នាំ នៃការបាញ់យន្តហោះដឹកអ្នកដំណើររបស់ម៉ាឡេស៊ី MH១៧ នៅក្បែរព្រំប្រទល់រុស្ស៊ីនិង អ៊ុយក្រែននឹងឈានដល់។ មិនទាន់មានប្រទេសណាមួយចេញមុខទទួលខុសត្រូវចំពោះករណីធ្លាក់នេះនៅឡើយនោះទេ។ អវត្តមាន នៃការដោះស្រាយនេះ បានបង្ខំឲ្យរដ្ឋាភិបាលប្រទេសប្រាំ រួមមានម៉ាឡេស៊ី អូស្ត្រាលី ហូឡង់ អ៊ុយក្រែន និង ប៊ែលហ្ស៊ិក ស្នើទៅកាន់ក្រុមប្រឹក្សាសន្តិសុខ ដើម្បីបង្កើតតុលាការវែកមុខ និងកាត់ទោសអ្នកទទួលខុសត្រូវ។
ម្សិលមិញនេះ រដ្ឋាភិបាលប្រាំបានទទូចសុំទៅកាន់ក្រុមប្រឹក្សាសន្តិសុខ ឲ្យចេញសេចក្តីសម្រេចដើម្បីបង្កើតសវនការមួយ ស្វែងរកអ្នកទទួលខុសត្រូវលើករណីបាញ់ទម្លាក់យន្តហោះដឹកអ្នកដំណើរក្រុមហ៊ុនម៉ាឡេស៊ី MH17 កាលពីឆ្នាំ២០១៤ កន្លងទៅនេះ។ ការទទូច សុំនេះ ត្រូវបានធ្វើឡើងជាបន្តន្ទាប់ ព្រោះសហគមន៍អន្តរជាតិហាក់ដូចជាស្ងប់ស្ងាត់ និងមិនអើពើក្នុងការចេញមុខចាត់វិធានការឡើយ។
បើយោងសេចក្តីថ្លែងការណ៍របស់ក្រសួងការបរទេសប៊ែលហ្សិក រដ្ឋាភិបាល៥រួមមាន ម៉ាឡេស៊ី អូស្ត្រាលី ហូឡង់ អ៊ុយក្រែន និង ប៊ែលហ្ស៊ិក បានព្រមព្រៀងគ្នាស្នើក្រុមប្រឹក្សាទៅកាន់អង្គការសហប្រជាជាតិ ដើម្បីអនុម័តសេចក្តីសម្រេចមួយ។ នោះគឺដើម្បីបើកសវនការ វែករកមុខអ្នកនៅពីក្រោយខ្នងនៃការបាញ់យន្តហោះនោះ។
សេចក្តីសម្រេចនោះ នឹងត្រូវស្ថិតក្រោមដែនកំណត់ជំពូក៧ នៃធម្មនុញ្ញអង្គការសហប្រជាជាតិ។ ក្នុងនេះ មានន័យថាប្រសិនបើរកឃើញថា រដ្ឋ ឬក្រុមណាមួយ ជាអ្នកនៅពីក្រោយខ្នងនៃការបាញ់នេះ រដ្ឋឬក្រុមនោះនឹងត្រូវទទួលរងការដាក់ទណ្ឌកម្ម ដែលកំណត់ដោយក្រុមប្រឹក្សាសន្តិសុខ។
សូមរំលឹក ផងដែរថា ក្រោយពីការធ្លាក់យន្តហោះនេះ មានបញ្ហាចម្រូងចម្រាស់ជាច្រើន ជុំវិញការស្វែងរកអ្នកទទួលខុសត្រូវ។ រដ្ឋាភិបាលអ៊ុយក្រែន និង បណ្តាលោកខាងលិច បានចោទប្រកាន់រុស្ស៊ី ថាជាអ្នកបាញ់យន្តហោះនោះ។ ស្របពេលជាមួយគ្នាមានមតិផ្សេងទៀត ទម្លាក់ការទទួលខុសត្រូវលើក្រុមឧទ្ទាមផ្តាច់ខ្លួននៅភាគខាងកើត។ យ៉ាងណាក៏ដោយ នោះគ្រាន់តែជាការសន្និដ្ឋាន ដែលគ្មានមូលដ្ឋានត្រឹមត្រូវតែប៉ុណ្ណោះ។ ជុំវិញការស្នើឲ្យមានការបង្កើតសវនការស្វែងរកការទទួលខុសត្រូវនេះ រដ្ឋាភិបាលរុស្ស៊ី ដែលជាសមាជិកអចិន្ត្រៃយ៍របស់ក្រុមប្រឹក្សាសន្តិសុខ មិនបានជំទាស់សំណើររបស់ ម៉ាឡេស៊ីនោះទេ តែស្នើឲ្យមានការស៊ើបអង្កេតឲ្យចប់សព្វគ្រប់សិន៕
© រក្សាសិទ្ធិដោយ thmeythmey.com