ពិភពតារា៖ ភិន សុដាលិស បន្ថែមអាជីពជាពិធីការិនីនៅប៉ុស្ដិ៍PNN
×
ភ្នំពេញ៖ តារាសម្តែង កញ្ញា ភិន សុដាលិស ដែលទស្សនិកជនជាច្រើនបានស្គាល់នាងតាមរយៈការសម្តែងខ្សែភាពយន្តភាគក៏ដូចជាខ្សែភាពយន្តខ្នាតធំជាច្រើនរបស់ផលិតកម្មមហាហង្សនោះ ពេលនេះ តារាសម្តែងរូបស្រស់ដែលជាបុត្ររបស់ម្ចាស់ផលិតកម្មមហាហង្សរូបនេះ បានទម្លាយការពិតជូនមិត្តអ្នកអានដោយអារម្មណ៍រំភើប និងសប្បាយរីករាយថា នាពេលឆាប់ៗខាងមុខនេះ នាងនឹងបង្ហាញវត្តមានជាមួយទេពកោសល្យសិល្បៈជាពិធីការនីនៅស្ថានីយទូរទស្សន៍ថ្មី គឺប៉ុស្ដិ៍ PNN។
តារាសម្តែងវ័យក្មេង កញ្ញា ភិន សុដាលិសបានបញ្ជាក់ឲ្យដឹងថា វាហាក់បីដូចជាប្លែកបន្តិចចំពោះអាជីពថ្មីលើវិថីសិល្បៈមួយនេះរបស់នាង ដោយកន្លងមកនាងធ្លាប់តែសម្តែងប៉ុណ្ណោះ តែដល់ពេលមកឈរនិយាយជាពិធីការនី ដែលត្រូវប្រើសំនួនវោរហា វាអាចមានភាពលំបាកខ្លះៗដែរចំពោះរូបនាង។ ប៉ុន្តែទន្ទឹមនឹងទទួលយកនូវអាជីពថ្មីនេះឲ្យនិយាយមានភាពរលូន នាងថា ក៏ទទួលបានការហ្វឹកហាត់ពីរៀមច្បងសិល្បៈចាស់ៗមួយចំនួនផងដែរ។
ជាមួយគ្នានោះដែរ ភិន សុដាលិសបានថ្លែងជាចុងក្រោយថា ថ្វីត្បិតបើពិធីការិនីនេះជាអាជីពថ្មីរបស់នាង ប៉ុន្តែនាងសង្ឃឹមយ៉ាងមុតមាំថានឹងទទួលបានការគាំទ្រយ៉ាងច្រើនពីមហាជន៕
© រក្សាសិទ្ធិដោយ thmeythmey.com