សង្គមអន្តរជាតិ
អន្តរជាតិ
បាន គីមូន៖ រដ្ឋទាំងអស់ត្រូវលះបង់ប្រយោជន៍ផ្ទាល់ខ្លួនដើម្បីបញ្ចប់ភាពក្រីក្រពិភពលោក
× ឆ្នាំ២០១៥ ជាឆ្នាំកំណត់ចុងក្រោយ នៃការអនុវត្តគោលដៅអភិវឌ្ឍន៍សហសវត្សន៍អង្គការសហប្រជាជាតិ(MDGs)ដែលមានគោលបំណងចម្បងប្រាំបីចំណុច។ ក្នុងការអនុវត្តន៍MDGs មាន ប្រទេសមួយចំនួនបានសម្រេចគោលដៅស្ទើរតែទាំងអស់ ខ្លះទៀតបានតិចតួចដោយ អាស្រ័យលើសមត្ថភាពរបស់ប្រទេសនីមួយ។ ទោះជាក្នុងចំណោមគោលដៅទាំង៨ត្រូវបានអនុវត្តកន្លងមែន ភាពក្រីក្រនៅតែជាបញ្ហាប្រឈមដែលសហគមន៍អន្តរជាតិ ត្រូវដោះស្រាយ នៅក្នុងទិសដៅថ្មីរ។ ផែនការថ្មីនោះគឺគោលដៅអភិវឌ្ឍន៍និរន្តភាព (SDGs)។ ក៏ប៉ុន្តែអ្វីចាំបាច់បំផុតសម្រាប់សម្រេចបានគោលដៅនេះ គឺបញ្ហាហិរញ្ញវត្ថុ។
អគ្គលេខាធិការអង្គការសហប្រជាជាតិ លោក បាន គីមូន បានស្នើឲ្យរដ្ឋសមាជិកលះបង់ផលប្រយោជន៍ផ្ទាល់ខ្លួន ដើម្បីអាចទម្លាយនូវភាពជាប់គាំងកញ្ចប់ថវិកា ដើម្បីអាចយកទៅអនុវត្តក្នុងគោលដៅអភិវឌ្ឍន៍ជានិរន្តភាព។ ជាពិសេសនោះ ដើម្បីអាចមានលទ្ធភាពបញ្ចប់ភាពក្រីក្រ ដែលជាមរតក និងកត្តាប្រឈមដ៏ធំដែលបន្សល់ទុកក្រោយការអនុវត្តន៍គោលដៅអភិវឌ្ឍន៍សហវត្សន៍ (២០០០-២០១៥)។ សេចក្តីថ្លែងការណ៍នេះ ធ្វើឡើងនៅក្នុងសន្និសីទមេដឹកនាំកំពូលពិភពលោក នៅក្នុងក្រុង អាឌីស អាប៉ាប៉ា ប្រទេស អេត្យូពី ដោយផ្តោតលើបញ្ហាហិរញ្ញវត្ថុ ដើម្បីផែនការសកម្មភាពក្រោយឆ្នាំ២០១៥(SDGs)។
ជាធម្មតា ហិរញ្ញវត្ថុ គឺបញ្ហាចម្បងនិង ចាំបាច់បំផុតសម្រាប់រដ្ឋនីមួយៗ ដើម្បីយកទៅប្រើប្រាស់ក្នុងការអនុវត្តន៍និងសម្រេចគោលដៅ ទាំង១៧ នៃគោលដៅអភិវឌ្ឍន៍ជានិរន្តភាព ដែលនឹងត្រូវចាប់ផ្តើមពីឆ្នាំ២០១៥ ដល់ ២០៣០ ។ ដើម្បីដឹងកាន់តែជ្រាបច្បាស់ យើងត្រូវសិក្សាលើបញ្ហាមួយចំនួនខាងក្រោម៖
១. ហេតុអ្វីបានជាមានគោលដៅអភិវឌ្ឍន៍ជានិរន្តភាព ( Sustainable Development Goals )?
នៅឆ្នាំ២០០០ មេដឹកពិភពលោក បានអនុម័តទៅលើគោលដៅអភិវឌ្ឍន៍សហសវត្សន៍ ដើម្បី បញ្ចប់នូវបញ្ហាប្រឈមសំខាន់ៗ បីប្រាំចំណុចដែលទាក់ទងនឹងភាពក្រីក្រ បញ្ហាអប់រំ សុខភាព និងសមភាពភេទ។ ហើយគោលដៅនោះ ត្រូវអនុវត្តក្នុងរយៈពេល ១៥ឆ្នាំ ពោលគឺចាប់ពី២០០០ដល់ ២០១៥ ។ យ៉ាងណាក៏ដោយ ឆ្នាំ២០១៥ បានមកដល់ តែបញ្ហានៅតែមិនបានបញ្ចប់ ជាពិសេសភាពក្រីក្រ ដែលមានប្រជាជនជាង១ពាន់លាននាក់ បន្តរស់នៅក្រោមបន្ទាត់នៃភាពក្រីក្រនេះ។ ដូច្នេះដើម្បីបន្ត និង ជំនួសលើផែនការអភិវឌ្ឍន៍ចាស់ អង្គការសហប្រជាជាតិ បានអនុម័តគោលដៅអភិវឌ្ឍន៍ជានិរន្តភាពដែលនឹងអនុវត្តចាប់ពីឆ្នាំ២០១៥ ដល់ ២០៣០ ។ គោលដៅនេះ មានគោលដៅ ១៧ ច្រើនជាគោលដៅមានចែងក្នុងផែនការសកម្មភាពចាស់។
២. តើអ្វីជាបញ្ហាប្រឈមក្នុងការអនុវត្តគោលដៅថ្មីនេះ?
តាមពិតទៅ ការអនុវត្តន៍គោលដៅថ្មីនេះ មិនមែនជាបញ្ហាចោទសម្រាប់ប្រទេសអ្នកមាននោះទេ តែជាបញ្ហាសម្រាប់ប្រទេសកំពុងអភិវឌ្ឍន៍ ដែលខ្វះធនធនា ឬហិរញ្ញវត្ថុ។ យ៉ាងណាក៏ដោយ សម្រាប់ប្រទេសក្រីក្រ ដើម្បីទទួលបានជំនួយផ្សេងៗ ពួកគេត្រូវលះបង់ ឬត្រូវបំពេញចិត្តម្ចាស់ជំនួយផងដែរ ក្នុងនោះរាប់បញ្ចូលទាំងការកែទម្រង់ប្រពន្ធ័នយោបាយផងដែរ ។ ក៏ប៉ុន្តែនេះមិនអាចងាយសម្រេចជោគជ័យទេ ព្រោះប្រទេសមួយចំនួនមិនចង់បាត់បង់អំណាច ឬឥទ្ធិពលរបស់ខ្លួន ដើម្បីជាថ្នូរនឹងជំនួយឡើយ។ ការមិនត្រូវគ្នានេះហើយ បានរុញច្រានឲ្យមានការលំបាកក្នុងការសម្រេចកំណត់ទំហំថវិកាឲ្យបានច្បាស់លាស់។ ក៏ប៉ុន្តែ បើយោងតាមសន្និសីទ អង្គការសប្រជាជាតិស្តីពាណិជ្ជកម្ម និងការអភិវឌ្ឍន៍ គោលដៅថ្មីនេះ ត្រូវបានរំពឹងទុកថានឹងត្រូវចំណាយមិនតិចជា ៣.៣ ទៅ ៤.៥ លានលានដុល្លារអាមេរិកឡើយ។ ជុំវិញបញ្ហា កញ្ចប់ថវិកាដ៏ធំសម្បើមសម្រាប់អនុវត្តន៍នេះដែរ ស្ថាប័នហិរញ្ញវត្ថុរួមមានធនាគារពិភពលោក រូបិយវត្ថុអន្តរជាតិ ធនាគារអភិវឌ្ឍន៍អាហ្វ្រិក និង ធនាគារអភិវឌ្ឍន៍អាស៊ី បានចុះហត្ថលេខាបន្ថែមជំនួយ ៤០០លានដុល្លារអាមេរិកផងដែរជួយគាំទ្រគម្រោងនេះផង៕
© រក្សាសិទ្ធិដោយ thmeythmey.com