ជាតិ
លោក ព្រាប សុវត្ថិ អន់ចិត្តគណៈកម្មការ៣នាក់ទៀតដែលមិនផ្តល់ឱកាសដល់បេក្ខនារីឈ្មោះ ស្រីរ័ត្ន
× សំឡេងផ្អែមដ៏មានទឹកដមរបស់ ឈួរ ស្រីរ័ត្ន ត្រូវបានកាត់ផ្តាច់ដោយសារការឈ្លក់ទឹកមាត់ ខណៈបេក្ខនារីវ័យ២២ឆ្នាំរូបនេះ បកស្រាយបទចម្រៀង «អស់ស្នេហ៍តែមិនចង់បាត់បង» នៅវគ្គ Judge Audition នៃកម្មវិធី Cambodian Idol របស់ទូរទស្សន៍ហង្សមាស។ កំហុសអចេតនានេះ បានធ្វើឲ្យបេក្ខនារីមកពីខេត្តព្រះសីហនុ និងមានកំណើតនៅខេត្តកណ្តាល អស់ឱកាសឈានទៅវគ្គបន្ត។
លោក ព្រាប សុវត្ថិ គឺជាសមាជិកគណៈកម្មការតែម្នាក់គត់ដែលបានបើកភ្លើងខៀវដល់ ឈួរ ស្រីរ័ត្ន តាមរយៈការឆ្លើយ «Yes» ប៉ុន្តែលោក ណុប បាយ៉ារិទ្ធ លោក ឆន សុវណ្ណារាជ និងកញ្ញា ឱក សុគន្ធកញ្ញា បានលើកឡើងថា ការភ្លាត់ស្នៀតមិនគួរលើកលែងនោះឡើយសម្រាប់ការប្រកួតប្រជែងដ៏សំខាន់។
«Yes» តែមួយ និង «No» រហូតដល់ទៅបី បានបង្អាក់ដំណើររបស់ ឈួរ ស្រីរ័ត្ន ក្នុងការឈានទៅកាន់វគ្គបន្ត។ ក្រោយការសម្រេចរួចរាល់ លោក ព្រាប សុវត្ថិ បានសម្តែងប្រតិកម្មអាក់អន់ចិត្តចំពោះការសម្រេចរបស់គណៈកម្មការ៣រូបផ្សេងទៀត។ លោកបានលើកឡើងថា មិនគួរឆ្លើយថា «No» រហូតដល់ទៅ៣នោះឡើយ យ៉ាងហោចណាស់ «Yes» ២ និង «No» ២ ដើម្បីជាការលើកទឹកចិត្ត។
លោក ព្រាប សុវត្ថិ បាននិយាយសម្តៅទៅសមាជិកគណៈកម្មការ៣រូបទៀតថា៖ «នេះជាការគិតរបស់ប្អូនទាំងបី […] ប៉ុន្តែសម្រាប់បង ស្រីរ័ត្នមានសំឡេងល្អអាចទៅមុខបាន... យើងដឹងថាសំឡេងកម្រិតណាហើយដែលអាចទៅមុខបាន តែការភ្លាត់នោះជារឿងមួយដែលវាចៃដន្យ បងគិតថា បើគាត់មកប្រឡងទៀត អត់មានការភ្លាត់ទៀតនោះទេ»។
សម្រាប់លោក ព្រាប សុវត្ថិ ការភ្លាត់ស្នៀតឈ្លក់ទឹកមាត់គឺជារឿងតិចតួចបំផុត ហើយរូបលោកផ្ទាល់ និងគណៈកម្មការដែលជាអ្នកចម្រៀងទាំងអស់ក៏ធ្លាប់ជួបបញ្ហានេះផងដែរ។
កញ្ញា ឱក សុគន្ធកញ្ញា បានការពារចំពោះការសម្រេចចិត្តរបស់ខ្លួនថា ការមិនចេះបន់បែនស្ថានការណ៍នៅពេលភ្លាត់ស្នៀត គឺជាប្រការដែលមិនអាចលើកលែងបាន បើទោះបីជាខ្លួនពេញចិត្តសំឡេងរបស់ បេក្ខនារី រូបនេះយ៉ាងណាក៏ដោយ។
លោក ណុប បាយ៉ារិទ្ធ បានបញ្ជាក់ផងដែរថា កំហុសដែលកើតឡើងនៅពេលប្រឡង គឺជាការទទួលខុសត្រូវរបស់បេក្ខជន ពីព្រោះថា ទស្សនិកជនពិតជាពិបាកទទួលយកនៅពេលឃើញកំហុសរបស់បេក្ខជន។ ដោយឡែក លោក ឆន សុវណ្ណារាជ បានបន្ថែមថា ឈួរ ស្រីរ័ត្ន មានបញ្ហាចំពេលដែលគណៈកម្មការចង់ដឹងពីសមត្ថភាពនៃការស្រែក ជាពិសេសនៅវគ្គបន្ទរ។
លោក ព្រាប សុវត្ថិ បានត្រឹមតែអន់ចិត្តប៉ុណ្ណោះ ពីព្រោះលោកមិនអាចជួយឲ្យបេក្ខនារី ឈួរ ស្រីរ័ត្ន ឈានទៅកាន់វគ្គបន្តនោះឡើយ។ ស្រីរ័ត្ន ក៏ប្រកាសទទួលស្គាល់នូវអ្វីដែលខ្លួនធ្វើខុសផងដែរ៕
© រក្សាសិទ្ធិដោយ thmeythmey.com