ពិភពតារា៖ ឡុង ថាវរី ត្រូវអ្នកមានទ្រព្យនិងអំណាចតាមប្រមាញ់
×
ភ្នំពេញ៖តារាសម្តែងដែលទើបតែរះលើវិថីសិល្បៈកញ្ញាឡុង ថាវរីអតីតកញ្ញាឯកចំណាត់ថ្នាក់លេខ៣ នៅក្នុងការប្រឡងកម្មវិធី Miss Nikon ដែលមានសម្រស់ផូរផង់ ហើយថែមទាំងនៅវ័យក្មេងទៀតនោះ ទើបធ្វើឱ្យនាងកំពុងស្ថិតនៅក្នុងផ្ទាំងស៊ីបដ៏ក្តៅគគុកមួយពីសំណាក់អ្នកមានបុណ្យសិក្តិ មានទ្រព្យសម្បត្តិ ក៏ដូចជាម៉ែយ៉ែម តាមប្រមាញ់ បណ្តាលឲ្យនាងឈឺក្បាលវិលមុខមិនតិចទេ។
រឿងរ៉ាវបែបនេះ វាពុំមែនជារឿងអ្វីដែលចម្លែកនោះឡើយ សម្រាប់តារាសិល្បៈស្រីៗ ដែលមានរូបសម្ផស្សស្រស់ស្អាតចំពោះរឿងកន្លង់តាមបោះនុយដុំស្ទូចយកបេះដូង យកប្រាណទៅត្រកងបីនោះទេ ។ ដូច្នេះ កញ្ញាឡុង ថាវរី ក៏ដូចគ្នាអ៊ីចឹងដែរ នាងកំពុងតែរងការរំខានពីអស់លោកកន្លង់សំបូរទ្រព្យ នៅខ្វះស្នេហ៍ជាច្រើនផងដែរ បើទោះជាកន្លងមក ថាវរី បានច្រាននិងបដិសេធចោល មិនព្រមទទួលយកផ្ទះរថយន្តទំនើប ក៏ដូចជា ទ្រព្យសម្បត្តិជាច្រើនទៀតពីពួកបុរសដែលចង់ធ្វើជាម្ចាស់បេះដូងលើរូបនាងយ៉ាងណា ក៏នៅតែមានអ្នកតាមរំខានដដែលពុំចេះអស់ឡើយ រហូតធ្វើឱ្យពេលខ្លះ តារារលកក្រោយរូបនេះ មានអារម្មណ៍មួម៉ៅទៀតផង ។
កញ្ញាឡុង ថាវរី បានពោលឱ្យដឹងថា “ខ្ញុំបដិសេធមិនទទួលស្នេហ៍ពីលោកធំ ឬឧកញ៉ា នោះទេ ព្រោះថាខ្ញុំមិនទាន់ចង់គិតពីរឿងនេះ ដោយសារតែពេលនេះ ខ្ញុំទើបតែចាប់ផ្តើមការងារដំបូងមិនទាន់ជោគជ័យនោះទេ ហើយការសិក្សាក៏មិនទាន់ចប់។ ដូច្នេះរឿងស្នេហា គឺនៅឆ្ងាយណាស់សម្រាប់ខ្ញុំ ម្យ៉ាងខ្ញុំនៅក្មេង មិនចង់ពាក់ព័ន្ធរឿងស្នេហាទេ គេមើលឃើញ ឃើញទៅសំខាន់ខ្ញុំមិនយកចិត្តទុកដាក់” ។
ក្រឡេកមកខាងការងារសិល្បៈរបស់កញ្ញា ឡុង ថាវរី វិញម្តងរយៈពេល ១ឆ្នាំមកនេះ នាងពិតជាពុំទាន់ មានយីអ៊ុននិងឱកាសនៅក្នុងការថតសម្តែងខ្សែភាពយន្តមួយរឿងណានៅឡើយ ក្រៅពីរូបនាងធ្លាប់ថតសម្តែងឈុតខារ៉ាអូខេ និងស្ពតផ្សាយពាណិជ្ជកម្មមួយចំនួនតែប៉ុណ្ណោះ ។ ការទន្ទឹងរង់ចាំស្របដោយចិត្តអន្ទះសាចង់ធ្វើជាតារាភាពយន្ត វាជាបំណងប្រាថ្នាធំបំផុតសម្រាប់កញ្ញាឡុង ថាវរី តែបើទោះជាចិត្ត នាងចង់យ៉ាងណា ក៏រហូតមកដល់ពេលនេះ ពុំទាន់មានខាងម្ចាស់ផលិតកម្មក៏អ្នកដឹកនាំរឿង ណាមួយមើលឃើញ និងចាប់អារម្មណ៍ចំពោះ រូបនាងនៅឡើយ ។
ឡុង ថាវរី បានបន្ថែមថា “ឱ្យតែមានគេហៅថតកុន ខ្ញុំនឹងថតភ្លាម ទោះជារឿងនោះសម្តែងជាតួអ្វីក៏ដោយ ខ្ញុំមិន រើសអើងទេ សំខាន់ឱ្យតែបានសម្តែង។ ជាមួយគ្នានេះដែរ ជ័យលាភីលេខ៣ កម្ម វិធី Miss Nikon រូបនេះ ក៏បានបង្ហាញនៅ មហិច្ឆតាយ៉ាងធំធេង ចង់គ្រប់គ្រងតំណែងធ្វើជាតួឯក និងចង់ក្លាយទៅជាតារាសម្តែង ដែលមានកេរ្តិ៍ឈ្មោះល្បីទៅថ្ងៃអនាគតផងដែរ ៕
© រក្សាសិទ្ធិដោយ thmeythmey.com