ជាតិ
សេដ្ឋកិច្ច
រដ្ឋប្រមូលពន្ធដារ និងពន្ធគយបានជាង១,៤០០លានដុល្លារក្នុងរយៈពេល៦ខែ
× នៅក្នុងរយៈ៦ខែ ឆ្នាំ២០១៥នេះ អគ្គនាយកដ្ឋានពន្ធដារ និងអគ្គនាយដ្ឋានគយនិងរដ្ឋករកម្ពុជា ប្រមូលចំណូលពន្ធបានជាង១,៤៦៩លានដុល្លារអាមេរិក ក្នុងនោះចំណូលបានមកពីពន្ធដារមានជាង៧០៦លានដុល្លារ និងពន្ធគយមានជាង៧៦៣លានដុល្លារ។ នេះបើផ្អែកតាមរបាយការណ៍បូកសរុបការងារបូកលទ្ធផលប្រមូលចំណូលពន្ធប្រចាំឆមាសទី១ ឆ្នាំ២០១៥ របស់អគ្គនាយកដ្ឋានពន្ធដារ និងអគ្គនាយដ្ឋានគយគ និងរដ្ឋាករកម្ពុជា។
របាយការណ៍ប្រមូលចំណូលពន្ធប្រចាំឆមាសទី១ ឆ្នាំ២០១៥ របស់អគ្គនាយកដ្ឋានពន្ធដារ បានបង្ហាញថា ក្នុងឆមាសទី១ ឆ្នាំ២០១៥ អគ្គនាយកដ្ឋានពន្ធដារប្រមូលបាន ចំណូលពន្ធ-អាករគ្រប់ប្រភេទ បានជាង២,៨២៧ពាន់លានរៀល ស្មើនឹង៧០៦.៧៥លានដុល្លា កើនឡើង៣៨.៥៣ភាគរយ បើធៀបនឹងរយៈពេលដូចគ្នាកាលពីឆ្នាំ២០១៤ ។ របាយការណ៍ដដែលក៏បានបង្ហាញពីចំណូលពន្ធដែលប្រមូលបាននៅក្នុងខែមិថុនាកន្លងទៅដែរ។ ចំណូលពន្ធ-អាករគ្រប់ប្រភេទនៅក្នុងខែមិថុនាមានចំនួន៣៦៤,៦២៤.២៦លានរៀល ស្មើនឹងចំនួន៩១.១៦លានដុល្លារ។
ដោយឡែករបាយការណ៍បូកសរុបការងារគយនិងរដ្ឋាករប្រចាំឆមាសទី១ ឆ្នាំ២០១៥ របស់អគ្គនាយដ្ឋានគយនិងរដ្ឋាករកម្ពុជា ចំណូលសរុបប្រមូលដោយគយក្នុងឆមាសទី១ ឆ្នាំ២០១៥នេះ សម្រេចបានជាង៣,០៥៣ពាន់លានរៀល មានកំណើន១៧.៥១ភាគរយ ធៀបនឹងឆមាសទី១ ឆ្នាំ២០១៤ ។
សូមបញ្ជាក់ថា ក្នុងឆ្នាំ២០១៤កន្លងទៅ អគ្គនាយកដ្ឋានគយនិងរដ្ឋាករកម្ពុជា បានប្រកាសថាខ្លួន ប្រមូលចំណូលពន្ធនាំចេញ នាំចូលបានចំនួន១,៣៤ពាន់លានដុល្លារ កើនឡើង ៣៣,៥ភាគរយ ខណៈដែលអគ្គនាយកដ្ឋានពន្ធដារ ប្រមូលចំណូលពន្ធផ្ទៃក្នុងបានប្រមាណ១,០៦២,៧៩លានដុល្លារ កើនឡើង១៧,៩៣ភាគរយ បើធៀបទៅនឹងឆ្នាំ២០១៣៕
© រក្សាសិទ្ធិដោយ thmeythmey.com