សង្គមអន្តរជាតិ
អន្តរជាតិ
មេដឹកនាំកូរ៉េខាងជើងចេញបញ្ជាឲ្យមន្ត្រីទាំងអស់ចាប់ផ្តើមធ្វើការនៅម៉ោង៥ព្រឹក
× ដោយសារតែអាកាសធាតុកាន់តែក្តៅខ្លាំង កូរ៉េខាងជើងបានដាក់បញ្ជាឲ្យមន្ត្រីការងាររដ្ឋ បុគ្គលិករោងចក្រ-សហគ្រាស និងសាលារៀន ចាប់ផ្តើមប្រតិបត្តិការងារនៅម៉ោង៥ព្រឹកវិញ។ នេះបើតាមសេចក្តីរាយការណ៍របស់សារព័ត៌មានកូរ៉េខាងត្បូង Daily NK។
យោងតាមប្រភពដែលខ្លួនទទួលបានដោយសម្ងាត់ Daily NK បានបញ្ជាក់រដ្ឋាភិបាលក្រុងព្យុងយ៉ាង បានចេញបទបញ្ជាឲ្យមន្ត្រីការិយាល័យ រួមទាំងសាលារៀនទាំងអស់ចាប់ផ្តើមការងារនៅម៉ោង៥ព្រឹក រហូតដល់ម៉ោង១ថ្ងៃត្រង់ ដែលជាធម្មតាចាប់ផ្តើមនៅម៉ោង៨ព្រឹក។
នារដូវកាលនេះ អាកាសធាតុនៅក្នុងទីក្រុងព្យុងយ៉ាង និងខេត្តមួយចំនួន ជាពិសេសភាគខាងលិច និងភាគខាងជើងឡើងកម្តៅយ៉ាងខ្លាំង ដូច្នេះរដ្ឋាភិបាលរបស់លោក គឹម ជុងអ៊ុន យល់ថា មន្ត្រីរបស់ខ្លួននឹងពិបាកធ្វើការងារចាប់ពីពេលថ្ងៃតទៅ។
ការផ្លាស់ប្តូរពេលវេលានេះ បានបង្ករការលំបាកយ៉ាងខ្លាំង ជាពិសេសចរន្តការងារ ការរៀនសូត្ររបស់សិស្ស និងពេលវេលាស្រស់ស្រូបអាហារ។ ប្រភពសម្ងាត់បានប្រាប់ Daily NK ថា ទាំងអស់គ្នាត្រូវតែគោរពតាមបទបញ្ជា ប៉ុន្តែពួកគេជួបបញ្ហាគ្មានអគ្គសនី និងភាគច្រើនមិនដឹងច្បាស់ថា ខ្លួនត្រូវធ្វើអ្វីនោះឡើយនៅពេលព្រឹកព្រលឹម៕
Tag:
កូរ៉េខាងជើង
Nourth korea
© រក្សាសិទ្ធិដោយ thmeythmey.com