សង្គមអន្តរជាតិ
អន្តរជាតិ
×![]()
ក្រុងហាណូយស្រាប់តែចេញមុខថ្កោលទោសក្រុងប៉េកាំងរឿងបញ្ចេញសាច់ដុំយោធាដោយបញ្ជូនទ័ពទៅធ្វើសមយុទ្ធនៅក្នុងតំបន់ជម្លោះសមុទ្រចិនខាងត្បូង។ សមយុទ្ធកងទ័ពចិនធ្វើឡើងរយៈពេល១០ថ្ងៃដោយចាប់ផ្តើមកាលពីថ្ងៃពុធថ្ងៃទី២២កក្កដារហូតដល់ចុងខែ។ ចិនបានប្រាប់ថា ខ្លួនគ្មានគម្រោងគំរាមកំហែងអ្នកណាទេ ព្រោះសមយុទ្ធចិនធ្វើជាប្រចាំ ហើយមុនមានសមយុទ្ធនេះចិនរៀបចំអស់រយៈពេលជាច្រើនខែមកហើយ។ 
ស្តាប់សំឡេង
ស្តាប់សំឡេង
រដ្ឋាភិបាលក្រុងហាណូយចាប់ផ្តើមស្រែកថ្កោលទោសសកម្មភាពសមយុទ្ធយោធារបស់ក្រុងប៉េកាំង នៅតំបន់ជម្លោះសមុទ្រចិនខាងត្បូងក្បែរកោះប៉ារ៉ាសែស និងទាមទារឲ្យក្រុងប៉េកាំងបញ្ឈប់សកម្មភាពយោធានេះផងដែរ។ ការទាមទារនេះកើតឡើង ក្រោយពេលដែលទាហានចិនចាប់ផ្តើមលំហាត់យោធានៅក្បែរតំបន់ជម្លោះសមុទ្រចិនខាងត្បូងរយៈពេល ១០ថ្ងៃ ចាប់ពីថ្ងៃពុធសប្តាហ៍មុន រហូតដល់ចុងខែកក្កដានេះ។
អ្នកនាំពាក្យក្រសួងការបរទេសវៀតណាមលោក Le Hai Binh បានទាមទារឲ្យចិនបញ្ឈប់សមយុទ្ធយោធានេះជាប្រញាប់ ដោយលោកលើកឡើងថាចិនកំពុងរំលោភអធិបតេយ្យវៀតណាម និងគំរាមកំហែងសន្តិសុខក្នុងតំបន់ទាំងមូល។ មិនត្រឹមតែប៉ុណ្ណោះទេអ្នកនាំពាក្យរូបនេះក៏ទិតៀនរដ្ឋាភិបាលចិនយ៉ាងខ្លាំងដែរ។ លោកថា សកម្មភាពរំលោភចូលអធិបតេយ្យវៀតណាមរបស់ចិនជាហូរហែរនេះ វាមិនខុសអ្វីពីក្មេងបៀមដៃ ក្រឡិចក្រឡុចខ្លាំង ព្រោះកន្លងមកមេដឹកនាំចិនបានសន្យាហើយថាមិនធ្វើអ្វីដែលបង្កឲ្យមានភាពតានតឹងក្នុងតំបន់ទៀតឡើយ។
អ្នកនាំពាក្យរូបនេះ ចង់សម្តៅដល់ការសន្យារបស់តំណាងរដ្ឋាភិបាលក្រុងប៉េកាំងកន្លងមកដែលបានមកទស្សនកិច្ចនៅវៀតណាមមួយសប្តាហ៍ មុនពេលមានសមយុទ្ធយោធានេះ។ លោកឧបនាយករដ្ឋមន្ត្រីចិន Zhang Gaoli ដែលបានទៅទស្សនកិច្ចប្រទេសវៀតណាម និងជួបជជែកពិភាក្សាជាមួយប្រមុខរដ្ឋាភិបាលក្រុងហាណូយ បានអះអាងរួចហើយថា ចិននឹងប្រឹងប្រែងចាប់យកវប្បធម៌សន្ទនា និងរកដំណោះស្រាយ ដើម្បីទប់ស្កាត់ជម្លោះប្រដាប់អាវុធ។
យ៉ាងណាក៏ដោយ ក្រសួងការពារជាតិចិនបានបញ្ជាក់យ៉ាងច្បាស់ថា សមយុទ្ធយោធាជើងទឹកជារឿងសាមញ្ញដែលចិនធ្លាប់ធ្វើជាញឹកញយមកហើយ។ ចិនគ្មានចេតនាគំរាមគំហែងក្រុងណា រដ្ឋណា ឬភាគីណាក្នុងតំបន់នោះទេ។ អ្វីដែលភាគីចិនបានសង្កត់ធ្ងន់នោះគឺ សមយុទ្ធទ្រង់ទ្រាយធំបែបនេះមិនមែននឹកឃើញចង់ធ្វើ គឺធ្វើភ្លាមឡើយ តែចិនបានចំណាយពេលជាច្រើនខែមុនមានបញ្ហាតានតឹងកើតឡើង ដើម្បីរៀបចំផែនការសមយុទ្ធយោធានេះ៕
Tag:
វៀតណាម
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com
