អន្តរជាតិ
នយោបាយអន្តរជាតិ
លោកប្រាយុទ្ធរុះរើមន្ត្រីរដ្ឋាភិបាលជាថ្មីស្តារសេដ្ឋកិច្ចជាតិ ឬពង្រឹងអំណាច?
×![]()
រយៈពេលជិតមួយឆ្នាំហើយនៃការបង្កើតរដ្ឋាភិបាលថៃដែលដឹកនាំដោយលោកនាយករដ្ឋមន្ត្រីរដ្ឋប្រហារយោធាថៃ ប្រាយុទ្ធចាន់អូចាបានធ្វើឲ្យសេដ្ឋកិច្ចថៃដែលធំជាងគេលំដាប់ទី២នៅក្នុងអាស៊ានបានមានការធ្លាក់ចុះ។ការប្រែប្រួលនេះបានជំរុញឲ្យលោកនាយករដ្ឋមន្ត្រីប្រាយុទ្ធត្រូវរៀបចំយុទ្ធសាស្ត្រថ្មី ដោយលោកគ្រោងនឹងរុះរើសមាជិករដ្ឋាភិបាលមួយចំនួនឡើងវិញ។
ទំនងជាមិនអាចទ្រាំនឹងការរិះពីសំណាក់ប្រជាជនលើរបបសឹកយោធាលោកនាយករដ្ឋមន្ត្រីប្រាយុទ្ធចាន់អូចាបានសម្រេចរុះរើក្បាលម៉ាស៊ីនរដ្ឋាភិបាលដើម្បីឆ្លើយតបទៅការធ្លាក់ចុះនៃកំណើនសេដ្ឋកិច្ច។ ការសម្រេចរុះរើក្បាលម៉ាស៊ីនរដ្ឋាភិបាលនេះលើកឡើងស្របពេល ជាមួយគ្នា នៃការលើកឡើងពីការពន្យារពេល នៃការបោះឆ្នោតសារជាថ្មីទៅឆ្នាំ២០១៧ ដោយសារមិនទាន់បញ្ចប់នូវរដ្ឋធម្មនុញ្ញថ្មីផងដែរ។
ក្រោយរដ្ឋប្រហារទម្លាក់អតីតនាយករដ្ឋមន្ត្រីថៃលោកស្រីយីងឡាក់ស៊ីនណាវ៉ាតត្រាថ្ងៃទី២២ ឧសភា ឆ្នាំ២០១៤ លោកឧត្តមសេនីយ៍ប្រាយុទ្ធចាន់អូចាត្រូវបានព្រះមហាក្សត្រថៃតែងតាំងជានាយករដ្ឋមន្ត្រីនៅក្នុងខែកញ្ញាបន្ទាប់ពីពេលនោះ។យ៉ាងណាក៏ដោយរយៈពេលជិតមួយឆ្នាំនៃបង្កើតរដ្ឋាភិបាលដែលគ្រប់គ្រងដោយរដ្ឋបាលយោធា មិនបានធ្វើឲ្យអ្នកវិនិយោគមានភាពកក់ក្តៅនិងទំនុកចិត្តនោះទេព្រោះមានបញ្ហាជាច្រើនដែលមិនទាន់ដោះស្រាយចប់នៅឡើយ។ ជាពិសេសនោះគឺបញ្ហានៃរដ្ឋបាលគ្រប់គ្រងដែលភាគច្រើនគឺជាសមាជិកយោធា។
ជុំវិញបញ្ហានេះ លោកនាយករដ្ឋមន្ត្រីប្រាយុទ្ធ បានបញ្ជាក់ថា នឹងមានការផ្លាស់ប្តូរនៅក្នុង ក្បាលម៉ាស៊ីនរដ្ឋាភិបាលនៅក្នុងពេលខាងមុខនេះ។ ក៏ប៉ុន្តែ សមាជិកថ្មីទាំងនេះ មិនត្រូវបាន រាប់បញ្ចូលអ្នកនយោបាយនោះទេ។ មួយវិញទៀតសម្រាប់ការធ្លាក់ចុះនៃកំណើនសេដ្ឋកិច្ច គឺ មិនមែនមកពីបញ្ហាខាងក្នុងតែមួយផ្នែកនោះទេ តែវាក៏ចំណែកមួយនៃបញ្ហាសេដ្ឋកិច្ចពិភពលោកផងដែរ។
អ្វីដែលគួរកត់សម្គាល់នោះ ការគ្រោងផ្លាស់ប្តូរសមាជិករដ្ឋាភិបាលថ្មីនេះ ត្រូវបានលេចឡើង ស្របពេលដែលមានពត៌មាននៃការពន្យារពេលនៃការបោះឆ្នោតជាសកលទៅឆ្នាំ២០១៧ ផងដែរ។ ភាពស្របគ្នានេះ បានក្លាយជាចំណោទបញ្ហាមួយសម្រាប់អ្នកវិភាគថាតើការផ្លាស់ប្តូរ យុទ្ធសាស្ត្រនេះ គឺគ្រាន់តែដើម្បីកែទម្រង់សេដ្ឋកិច្ច ឬជាការពង្រឹងអំណាចរបស់លោកបន្តទៅ ទៀត៕
Tag:
ប្រាយុទ្ធ
© រក្សាសិទ្ធិដោយ thmeythmey.com
