អ្នកវិភាគថា ការបណ្តេញជនជាតិវៀតណាមខុសច្បាប់ចេញពីកម្ពុជា គឺជារឿងនយោបាយផ្ទៃក្នុងកម្ពុជា

ជាតិ

អ្នកវិភាគថា ការបណ្តេញជនជាតិវៀតណាមខុសច្បាប់ចេញពីកម្ពុជា គឺជារឿងនយោបាយផ្ទៃក្នុងកម្ពុជា

29, Jul 2015 , 8:59 pm

រូបភាព

ដោយ: ថ្មីៗ

ភ្នំពេញ៖ នគរបាលនៃនាយកដ្ឋានស៊ើបអង្កេត និងអនុវត្តនីតិវិធី សហការជាមួយកម្លាំងស្នងការដ្ឋាននគរបាលរាជធានីភ្នំពេញ បានចាប់ខ្លួនជនជាតិវៀតណាមដែលរស់នៅខុសច្បាប់នៅកម្ពុជាចំនួន៥១ នាក់។ ប្រតិបត្តិការនេះធ្វើឡើង កាលពីព្រឹកថ្ងៃ២៩ ខែកក្កដា ឆ្នាំ២០១៥ ដែលស្ថិតនៅបុរីអង្គរភ្នំពេញ ក្នុងភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។ ការចាប់ខ្លួនជនជាតិវៀតណាមដែលរស់កម្ពុជាដោយមិនស្របច្បាប់ជាច្រើនសន្ធឹកសន្ធាប់ មិនធ្លាប់មានពីមុនមក ចាប់តាំងពីការឡើងកាន់អំណាចរបស់លោកនាយករដ្ឋមន្ត្រី ហ៊ុន សែន ត្រូវបានអ្នកវិភាគសង្គមលើកឡើងថា វាគឺជារឿងនយោបាយផ្ទៃក្នុងច្រើនជាងនយោបាយការទូតទាក់ទងនឹងជម្លោះព្រំដែនកម្ពុជាវៀតណាម។

កាលពីថ្ងៃទី២៩ កក្កដា ឆ្នាំ២០១៥ព្រឹកមិញនេះ នគរបាលនៃនាយកដ្ឋានស៊ើបអង្កេត និងអនុវត្តនីតិវិធី សហការជាមួយកម្លាំងស្នងការដ្ឋាននគរបាលរាជធានីភ្នំពេញ បានចាប់ខ្លួនជនជាតិវៀតណាមដែលរស់នៅខុសច្បាប់នៅកម្ពុជាចំនួន៥១នាក់បន្ថែមទៀត។ ការចាប់ខ្លួន និងបណ្តេញជនជាតិវៀតណាមនេះធ្វើឡើងបន្ទាប់ពីកម្ពុជាមានជម្លោះជាមួយវៀតណាមជុំវិញរឿងព្រំដែន ដែលមកដល់ពេលនេះ នៅមិនទាន់ស្រកកម្តៅនៅឡើយទេ។

ទាក់ទងនឹងបញ្ហានេះ លោក កែម ឡី អ្នកស្រាវជ្រាវការអភិវឌ្ឍសង្គម បានមានប្រសាសន៍ថា ការ បណ្តេញជនជាតិវៀតណាមនេះ គឺជាលក្ខណៈនយោបាយផ្ទៃក្នុងជាជាងជម្លោះកា រទូតរវាងកម្ពុជា និងវៀតណាមដោយសារបញ្ហាព្រំដែន។ លោកបន្ថែមថា ប្រជាជនកម្ពុជា មិនបោះឆ្នោតឲ្យគណបក្សប្រជាជន ព្រោះមើលឃើញពីហានីភ័យដែលជនអន្តោប្រវេសន៍ វៀតណាមបានហូរចូលមកកម្ពុជាច្រើនឡើង។ ហេតុផលនេះហើយ ទើបធ្វើឲ្យរដ្ឋាភិបាល កម្ពុជាដែលគ្រប់គ្រងដោយគណបក្សប្រជាជនកម្ពុជាត្រូវតែដោះស្រាយបញ្ហានេះ ក្នុងគោលបំណងដើម្បីទាក់ទាញប្រជាប្រិយភាពពីប្រជាពលរដ្ឋ។

ពាក់ព័ន្ធនឹងការបណ្តេញជនជាតិវៀតណាមនេះដែរ អ្នកវិភាគនយោបាយ លោក អ៊ូ វីរៈ បានអត្ថាធិប្បាយថា នេះមិនមែនជាបញ្ហាព្រំដែននោះទេ តែជាសម្ពាធនយោបាយផ្ទៃក្នុងរបស់កម្ពុជា។ លោកបន្ថែមថា គណបក្សប្រជាជនកម្ពុជាកន្លងមកមិនបានដោះស្រាយបញ្ហាជនអន្តោប្រវេសន៍វៀតណាមនោះទេ តែទើបចាប់ផ្តើមនៅអាណត្តិនេះ គឺដោយសារខ្លាចបាត់បង់ការគាំទ្រពីប្រជាជនដូចអាណត្តិមុន។

ឆ្លើយតបនឹងបញ្ហានេះ អ្នកនាំពាក្យទីស្តីការគណរដ្ឋមន្ត្រីលោក ផៃ ស៊ីផាន បានឲ្យដឹងថា ការដែល រដ្ឋាភិបាលចាប់បញ្ជូនជនជាតិវៀតណាមនេះ មិនមែនជាការឆ្លើយតាមការទូតដែលវៀតណាមព្រងើយកន្តើយរឿងព្រំដែននោះទេ តែការចាប់បញ្ជូនជនជាតិវៀតណាមគឺជាការចាប់ផ្តើមអនុវត្តច្បាប់អន្តោប្រវេសន៍របស់កម្ពុជា។ លោកបន្ថែមទៀតថា បានជាកម្ពុជាទើបចាប់ផ្តើមបណ្តេញជនជាតិវៀតណាម គឺដោយសារស្ថានភាពនយោបាយ និងការទំនាក់ទំនងល្អជាមួយប្រទេសវៀតណាម ទើបកម្ពុជាមានលទ្ធភាពបញ្ជូន ហើយភាគីវៀតណាមរង់ចាំទទួល។

គួរបញ្ជាក់ថា ក្នុងរយៈពេល៧ខែ ក្នុងឆ្នាំ២០១៥នេះ កម្ពុជាបានបណ្តេញជនអន្តោប្រវេសន៍វៀតណាមដែលរស់នៅលើទឹកដីកម្ពុជាដោយខុសច្បាប់ ជិត៣ពាន់នាក់ហើយ៕