អន្តរជាតិ
ហ្វីលីពីនបង្កើនថវិកាការពារជាតិ៣ដង ដើម្បីទិញអាវុធប្រឆាំងមហាយក្សចិន
× ការប្រឈមមុខគ្នារវាងមហាយក្សចិន និង ហ្វីលីពីន បានឈានដល់ដំណាក់កាលមួយគួរព្រួយបារម្ភ និង កំពុងគំរាមកំហែងដល់សន្តិសុខនៅក្នុងតំបន់ផងដែរ។ អវត្តមាននៃការដោះស្រាយតាម វិធានការផ្លូវច្បាប់ និង កិច្ចអន្តរាគមន៍ពីស្ថាប័នអន្តរជាតិនិង ក្នុងតំបន់ បានជំរុញ ឲ្យរដ្ឋាភិបាលក្រុងម៉ានីល ត្រូវរៀបចំខ្លួនទុកជាមុន ចំពោះការប៉ះទង្គិចគ្នាដែលអាចនឹងកើតឡើងគ្រប់ពេលវេលា។ រដ្ឋាភិបាលក្រុងម៉ានីល បានស្នើឲ្យសភាបង្កើនកញ្ចប់ថវិកាការពារជាតិ៣ដង ដើម្បីទិញសព្វាវុធប្រឆាំងជាមួយនឹងការវាតទីរបស់មហាយក្សចិន។
សូមស្ដាប់ពត៌មានលម្អិត៖
រដ្ឋាភិបាលក្រុងម៉ានីល បានស្នើទៅកាន់សភាហ្វីលីពីន ដើម្បីអនុម័តលើកញ្ចប់ថវិកាប្រចាំឆ្នាំ លើវិស័យយោធា ដែលបង្កើនបរិមាណបីដង ដើម្បីទិញអាវុធបន្ថែម និង ដើម្បីពង្រឹងសមត្ថភាពយោធាប្រឆាំងជាមួយនឹងមហាយក្សចិនដែលកំពុងតែបំពានដែនអធិបតេយ្យខ្លួននៅក្នុងតំបន់ជម្លោះសមុទ្រចិនខាងត្បូង។ សំណើនេះ ធ្វើឡើងក្រោយរដ្ឋាភិបាល ក្រុងប៉េកាំង បានប្រកាស ថាបានធ្វើសមយុទ្ធយោធាទ្រង់ទ្រាយធំទាំងផ្នែកអាកាស និង កងទ័ពជើងទឹកនៅក្នុងតំបន់ជម្លោះសមុទ្រចិនខាងត្បូង។
បច្ចុប្បន្ន រដ្ឋាភិបាលហ្វីលីពីន បានកំណត់កញ្ចប់ថវិកាសម្រាប់វិស័យការពារជាតិមិនឲ្យលើសពី ១ភាគរយនៃផលិតផលសរុបរបស់ខ្លួន។ ជុំវិញបញ្ហានេះ លោកឧត្តមសេនីយ៍ ហ្គីលើម៉ូ (Guillermo) បានបញ្ជាក់ថា កម្រិតក្រោមមួយភាគរយនៃផលិតផលសរុបសម្រាប់ វិស័យការ ពារជាតិ គឺមិនគ្រប់គ្រាន់នោះទេ ពោលគឺ លោក ទាមទារឲ្យមានយ៉ាងណាស់ ត្រូវមានទំហំពីរ ភាគរយដែរ។
លោកឧត្តមសេនីយ៍ បានអះអាងចំពោះការទាមទារនេះ ដោយបានប្រៀបធៀបបរិមាណនេះ ជាមួយនឹងប្រទេសជិតខាង ពោលគឺមហាយក្សចិន ដែលជាដៃគូប្រជែង នៅក្នុងជម្លោះសមុទ្រ ចិន គឺហ្វីលីពីននៅត្រឹមកំរិតទាបបំផុត។បន្ថែមពី ដើម្បីអាចទប់ស្កាត់នឹងភាពតានតឹង កាន់តែ រីកធំឡើងពីមួយថ្ងៃទៅមួយថ្ងៃ និង អាចការពារលើដែនអធិបតេយ្យខ្លួនផងដែរនោះ ហ្វីលីពីន ត្រូវតែទិញអាវុធទំនើបៗបន្ថែម និង ពង្រឹងសមត្ថភាពវិស័យយោធារបស់ខ្លួន។
អ្វីដែលគួរកត់សម្គាល់នោះ ការសើ្នឲ្យអនុម័តកញ្ចប់ថវិកាកើនបីដងនេះ គឺស្របពេល ដែលចិន បានប្រកាសថាខ្លួន ធ្វើសមយុទ្ធយោធាទ្រង់ទ្រាយធំរយៈពេលដប់ថ្ងៃ នៅក្នុងដែនជម្លោះ សមុទ្រចិន។ ថ្វីត្បិត ហ្វីលីពីន មានជប៉ុន និងអាមេរិក គាំទ្រពីក្រោយខ្នងក៏ដោយ ហ្វីលីពីនមិនអាចរង់ចាំជំនួយពីគេនោះទេ ព្រោះសមត្ថភាពគូបដិបក្ខរបស់ខ្លួន បានឈានដល់កម្រិតមួយគួរព្រួយបារម្ភហើយ។
ក្នុងក្រសែភ្នែកអ្នកវិភាគ ការតស៊ូរបស់ហ្វីលីពីន ទាំងផ្នែកច្បាប់ និង សមត្ថភាពយោធា នឹងធ្វើ រដ្ឋាភិបាលក្រុងប៉េកាំង អាចបន្ទន់ខ្លួនក្នុងសកម្មភាពឯកតោភាគីនៃ ការចូលទៅកាន់តំបន់ ត្រួតស៊ីគ្នា។ នោះ ក៏ព្រោះតែបើចិននៅតែបន្តសកម្មភាពរបស់ខ្លួន ចិន នឹងត្រូវរងនូវភាពអាម៉ាស នៅក្នុងឆាកអន្តរជាតិ ដោយសារសកម្មភាពខុសច្បាប់របស់ខ្លួន ដែលជាភាគីមួយនៃច្បាប់អន្តរជាតិ ។ មួយវិញទៀត កាលណាបើហ្វីលីពីន អាចបង្កើនសមត្ថភាពកងកម្លាំង និង សព្វាវុធកាន់តែច្រើន នោះភាគីទាំងពីរមិនអាចប្រថុយនឹងចូលសង្គ្រាមជាមួយគ្នានោះទេ។ ហើយបើសង្គ្រាមកើតឡើងមែននោះ អ្នកដែល អាចខាតបង់ច្រើនជាងគេគឺចិនដែលបានព្យាយាមកសាងសមិទ្ធផលរបស់ខ្លួនជាច្រើន ក្នុងនៅក្នុងតំបន់ជម្លោះ។
គួររំលឹកផងដែរថា បញ្ហាសមុទ្រចិនខាងត្បូង គឺជាជម្លោះដែនអធិបតេយ្យដែល ក្នុងនោះ ចិន បានទាមទារស្ទើរតែទាំងអស់ ហើយបានបដិសេធរាល់ការដោះស្រាយតាមវិធានច្បាប់។ យ៉ាងណាមិញ ក្នុងចំណោមរដ្ឋពាក់ពន្ធ័អាស៊ានទាំងបួនដែលមានប្រ៊ុយណេ ម៉ាឡេស៊ី ហ្វីលីពីន និង វៀតណាម គ្មានរដ្ឋណាមួយក្រៅពីហ្វីលីពីនដែលហ៊ានចេញមុខប្រឈមជាមួយ នឹងចិននោះទេ៕
© រក្សាសិទ្ធិដោយ thmeythmey.com