ជាតិ
នយោបាយជាតិ
គណបក្សប្រជាជនកម្ពុជាអាចនឹងនៅបន្តឈ្នះឆ្នោតកាន់អំណាចឆ្នាំ២០១៧-២០១៨
×
ភ្នំពេញ៖ ការបោះឆ្នោតឃុំសង្កាត់២០១៧ និងការបោះឆ្នោតជាតិ២០១៨ មិនទាន់មកដល់មែន។ ប៉ុន្តែ អ្នកវិភាគចាប់ផ្តើមសន្និដ្ឋានថា គណបក្សប្រជាជនកម្ពុជាអាចនឹងបន្តឈ្នះឆ្នោតទៀតប្រសិនបើអ្នកប្រជាធិបតេយ្យដើរផ្លូវបែកគ្នាដោយបង្កើតគណបក្សរៀងៗខ្លួន។
ក្រោយការបោះឆ្នោតឆ្នាំ២០១៣កន្លងមក អ្នកតាមដានសភាពការណ៍នយោបាយនៅក្នុងប្រទេសកម្ពុជាចាប់ផ្តើមចោទជាសំណួរថា តើគណបក្សប្រជាជនកម្ពុជាអាចនៅបន្តកាន់អំណាចសម្រាប់ការបោះឆ្នោតឃុំសង្កាត់២០១៧ និងការបោះឆ្នោតជាតិឆ្នាំ២០១៨ ទៀតដែឬទេ បើគណបក្សកាន់អំណាចដ៏យូរមួយនេះ បានបាត់បង់អាសនៈចំនួន២២កាលពីការបោះឆ្នោតឆ្នាំពី២០១៣កន្លងមក ពោលគឺចំនួនអាសនៈបានថយចុះពី៩០កៅអីនៅឆ្នាំ២០០៨ មកនៅត្រឹមតែ៦៨កៅអីនៅ២០១៣ ។
សំណួរដែលចោទសួរឡើងថា តើគណបក្សប្រជាជនកម្ពុជាអាចចាញ់ឆ្នោត ឬឈ្នះឆ្នោតនៅឆ្នាំ២០១៧ និង២០១៨ ចេះតែបន្តសួរជាបន្តបន្ទាប់។ ប៉ុន្តែ នៅពេលនេះ អ្នកវិភាគនយោបាយមួយចំនួនអត្ថាធិប្បាយថា គណបក្សប្រជាជនកម្ពុជា អាចនៅបន្តឈ្នះឆ្នោតនៅឆ្នាំ២០១៧ និង២០១៨ទៀត ប្រសិនបើអ្នកប្រជាធិបតេយ្យបែកបាក់គ្នា ហើយពួកគេទៅបង្កើតគណបក្សផ្សេងៗជាច្រើនទៀតនោះ។
លោក សឺន ស៊ូប៊ែរ៍ ប្រធានគណបក្សសិទ្ធិមនុស្ស និងជាកូនបង្កើតរបស់លោកតា សឺន សាន បានបញ្ជាក់នៅថ្ងៃសៅរ៍នេះថា៖«ប្រសិនបើអ្នកប្រជាធិបតេយ្យនៅតែបែកគ្នា CPP នៅតែឈ្នះរហូត ពីព្រោះ វាបែកសំឡេង។ ម្នាក់ៗចេះតែថា ចង់ផ្លាស់ប្តូរ។ ប៉ុន្តែ ពួកគេមិនរួបរួមគ្នា»។ ការអត្ថាធិប្បាយរបស់លោក សឺន ស៊ូប៊ែរ៍ ធ្វើឡើងស្របពេលដែលលោក ម៉ម សូណង់ដូ ប្រធានវិទ្យុសំបុកឃ្មុំបង្កើត«គណបក្សសំបុកឃ្មុំសង្គមប្រជាធិបតេយ្យ» រីឯ លោក កែម ឡី និងលោក យ៉ង់សាំង កុមារ គ្រោងបង្កើត«គណបក្សប្រជាធិបតេយ្យមូលដ្ឋាន»។ ម្យ៉ាងទៀត លោក សួន សេរីរដ្ឋា ដែលជាបុគ្គលល្បីដែរនោះ ក៏បង្កើតគណបក្សថ្មីមួយដែរ។
ដោយចង់និយាយសំដៅទៅកាន់លោក ម៉ម សូណង់ដូ លោក កែម ឡី និងលោក យ៉ង់ សាំង កុមារ លោក សឺន ស៊ូប៊ែរ បន្តអត្ថាធិប្បាយថា៖«អ្នកប្រជាធិបតេយ្យកំពុងតែបំបែកសំឡេងគ្នា។ ដូច្នេះ អ្នកប្រជាធិបតេយ្យមិនអាចឈ្នះទេ។ ចូរកុំបន្ទោសគណបក្សប្រជាជនកម្ពុជាអោយសោះ»។ លោក សឺន ស៊ូប៊ែរ ចង់មានប្រសាសន៍ថា ប្រសិនបើគណបក្សប្រជាជនកម្ពុជាបន្តឈ្នះឆ្នោត គឺមិនមែនដោយសារគណបក្សប្រជាជនកម្ពុជាខ្លាំងទេ ប៉ុន្តែ ដោយសារអ្នកប្រជាធិបតេយ្យបែកខ្ញែកគ្នា។
លោក សឺន ស៊ូប៊ែរ បានអំពាវនាវអោយគណបក្សសង្គ្រោះជាតិអញ្ជើញអ្នកប្រជាធិបតេយ្យទាំងអស់ចូលរួមជាមួយគណបក្សសង្គ្រោះជាតិទើបអាចយកឈ្នះគណបក្សប្រជាជនកម្ពុជាក្នុងការបោះឆ្នោតឆ្នាំ២០១៧ និង២០១៨ខាងមុខបាន។
ទាក់ទងទៅនឹងការបង្កើតគណបក្សថ្មីៗរបស់លោក កែម ឡី និងរបស់លោក ម៉ម សូណង់ដូ ព្រះអង្គម្ចាស់ស៊ីសុវត្ថិ ធម្មិកោ មានបន្ទូលថា ព្រះអង្គមិនជំទាស់ទៅនឹងការបង្កើតគណបក្សថ្មីទេ។ ប៉ុន្តែ ព្រះអង្គចោទជាសំណួរថា តើចង់ផ្លាស់ប្តូរឬអត់ ប្រសិនបើអ្នកទាំងអស់គ្នាចង់ផ្លាស់ប្តូរ ពួកគេត្រូវតែរួបរួមគ្នា៕
© រក្សាសិទ្ធិដោយ thmeythmey.com