បទវិភាគ
×![]()
ភ្នំពេញ៖ ក្រោយពីការបាត់បង់សម្លេងគាំទ្រជាង២០អាសនៈនៅក្នុងរដ្ឋសភា ក្នុងបោះឆ្នោត ជ្រើសតាំងតំណាងរាស្ត្រ កាលពីខែកក្កដា ឆ្នាំ២០១៣, គណបក្សកាន់អំណាចបានយល់ កាន់តែច្បាស់ថា ប្រជាប្រិយភាពរបស់ខ្លួនកាន់តែធ្លាក់ចុះជាលំដាប់។ ការធ្លាក់ចុះនេះ ត្រូវបានគេសន្និដ្ឋានថា បណ្ដាលមកពីមូលហេតុជាច្រើន ដូចជា បក្សប្រជាជនកម្ពុជាដឹកនាំ ប្រទេសច្រើនអាណត្តិ ដែលតិចឬច្រើនតែងតែមានកំហុសចៀសមិនរួច, គោលនយោ បាយរបស់បក្សនេះមិនឆ្លើយតបនឹងតម្រូវការជាក់ស្ដែងរបស់ពលរដ្ឋ, ប្រព័ន្ធតុលាការមិន ឯករាជ្យ, អំពើពុករលួយ, ការបណ្ដោយឱ្យមន្ត្រីធំៗនិងអ្នកមានធ្វើបាបអ្នកតូច និងអ្នកទន់ខ្សោយ តាមទំនើងចិត្ត, ការមិនសូវអើពើនឹងប្រជាជនក្រីក្រ និង កត្តាអវិជ្ជមានជាច្រើនទៀត។ តើបក្សនេះ ត្រូវធ្វើអ្វីខ្លះ ដើម្បីស្ដារប្រជាប្រិយភាពរបស់ខ្លួន?
យោងតាមតថភាពរបស់សង្គមខ្មែរ យើងបានមើលឃើញថា ដោយសារជោគជ័យផ្ទួនៗរបស់បក្សប្រជាជនកម្ពុជា និងដោយសារការកាន់អំណាចមានរយៈពេលយូរឆ្នាំ នាំឱ្យមន្ត្រី របស់បក្សនេះស្ទើរតែទាំងអស់ សប្បាយភ្លេចខ្លួន តម្លើងឬកកាន់តែធំ, មានចរិតក្អេងក្អាង, ខ្វះភាពជិតស្និទ្ធជាមួយពលរដ្ឋ, មានការរើសអើងចំពោះពលរដ្ឋដែលមាននិន្នាករទៅរក បក្សនយោបាយដទៃ និង ធ្វើអ្វីៗតាមទំនើងចិត្តរបស់ខ្លួនដោយមិនកោតញញឹតច្បាប់ និង សីលធម៌ឡើយ។ ពួកគេមួយចំនួនបានក្លាយជាអ្នកមានដោយសារអំពើពុករលួយ អំពើខុស ច្បាប់ និងការកេងប្រវ័ញ្ច។ ជារួមពួកគេគិតតែពី វីឡាថ្មី ឡានថ្មី សម្ភារៈទំនើប ទ្រព្យសម្បត្តិ ឋានៈ បុណ្យស័ក្ដិ និង មេដាយកិត្តិយស។ល។
ចំណែកឯ គំនិតស្ដីពីការដឹកនាំល្អ ការគ្រប់គ្រងល្អ ការអភិវឌ្ឍសេដ្ឋកិច្ចជាតិ ការផ្ដល់សេវាសាធារណៈប្រកបដោយគុណភាពនិងប្រសិទ្ធភាព ការលើកម្ពស់ប្រព័ន្ធយុត្តិធម៌សង្គម ការថែរក្សាសន្តិសុខសណ្ដាប់ធ្នាប់សង្គម និង ការលើកកម្ពស់សុខដុមនីយកម្មក្នុងសង្គមខ្មែរ មិនសូវមានមន្ត្រីណាយកចិត្តទុកដាក់នៅឡើយទេ។ លើសពីនេះទៀត សូម្បីតែរបៀបឃោសនារកសម្លេងគាំទ្រ និង របៀបការពារខ្លួន ក៏មិនមានអ្វីថ្មីដែរ ក្រៅតែពីការលើកយកគំនិតដដែលៗ ទាក់ទងនឹង គុណថ្ងៃ៧ មករា, ការមិនយកពន្ធដីពីកសិករ, ការសរសើរលើកជើងសម្ដេចទាំងបី, ការសូត្រគោលនយោបាយលើក្រដាសដោយមិនបានអនុត្តឱ្យត្រឹមត្រូវ, ការប្រើការគម្រាមកំហែង អំពើហិង្សា និង យន្តការតុលាការ ដើម្បីផ្ដួលគូរប្រជែង, និងថា ប្រសិនបើបក្សប្រជាជនមិនជាប់ឆ្នោតនឹងមានសង្គ្រាម ជាដើម។
ក្រៅពីនេះ នយោបាយប្រជាភិថុតិ និង របៀបដឹកនាំបែប នីកូឡូ ម៉ាឃាវែល្លី ដែលថា «អ្នកដឹកនាំត្រូវតែមានលក្ខណៈជាតោផងនិងជាកញ្ជ្រោងផង, និងអ្នកដឹកនាំ ត្រូវតែបង្ហាញចំពោះមុខរាស្ត្រឱ្យឃើញថា ខ្លួនជាអ្នកស្រឡាញ់យុត្តិធម៌ គោរពច្បាប់និងសីលធម៌ ប៉ុន្តែ ខ្លួនមិនចាំបាច់ត្រូវតែធ្វើដូច្នោះទេ» ក៏ត្រូវបានគេយកមកប្រើក្នុងការដឹកនាំនិងការគ្រប់គ្រងសង្គមខ្មែរដែរ។ លើសពីនេះទៀត វិធី ឬល្បិចអាក្រក់មួយចំនួន របស់ ឆាវៗ និង តួអង្គចិត្តអាក្រក់មួយចំនួនទៀតក្នុងរឿងសាមកុក ក៏ត្រូវគេយកមកប្រើសម្រាប់ការដឹកនាំ និង ការគ្រប់គ្រងសង្គមខ្មែរដែរ។
មូលហេតុទាំងអស់នេះហើយ ដែលរុញច្រានសង្គមខ្មែរឱ្យមានភាពស្មុគស្មាញពិបាកដោះស្រាយ, ការដឹកនាំឈានទៅរកភាពផ្ដាច់ការ, ប្រព័ន្ធរដ្ឋបាលនិងប្រព័ន្ធយុត្តិធម៌មិនមានភាពច្បាស់លាស់ រឹងមាំ និងត្រឹមត្រូវ ដែលនាំឱ្យមានទំនាស់ផលប្រយោជន៍ អយុត្តិធម៌ និង និទណ្ឌភាព។ សេវាសាធារណៈមិនមានប្រសិទ្ធភាព តម្លាភាព និងសមធម៌។ លើសពីនេះទៀត សិទ្ធិទទួលបានព័ត៌មាន សិទ្ធិសម្ដែងមតិ និង ការវ៉ាផ្សេងៗ ក៏មិនមានលក្ខណៈងាយស្រួលដែរ។ ក្រៅពីនេះ ការជួញដូរគ្រឿងញៀន ការកាប់បំផ្លាញព្រៃឈើ ការកាន់កាប់ដីសាធារណៈរបស់រដ្ឋដោយខុសច្បាប់ និងការដោះស្រាយបញ្ហាក្រៅប្រព័ន្ធតុលាការកំពុងតែកើនឡើងជាបន្តបន្ទាប់។
អ្វីដែលបានរៀបរាប់ខាងលើនេះ សាធារណជន និង មន្ត្រីបក្សកាន់អំណាចសុទ្ធតែបានដឹងច្បាស់។ ហេតុនេះ ប្រសិនបើបក្សកាន់អំណាចចង់ស្ដារកិត្តិយស និង ចង់រក្សា ឬទាញយកសម្លេងគាំទ្រដែលខ្លួនបាត់បង់នោះមកវិញ ពួកគេគួរតែពិចារណាលើចំណុចទាំងដប់ដូចជាខាងក្រោម៖
ត្រូវយល់ថា កំណែទម្រង់មិនមែនធ្វើឱ្យបាត់សម្លេងគាំទ្រទេ ប៉ុន្តែ វាធ្វើឱ្យកើនសម្លេងគាំទ្រទៅវិញទេ។ កំណែទម្រង់ មិនមែនគ្រានតែធ្វើឡើងដើម្បីតែការស្វែងរកការគាំទ្រចំពោះបក្សរបស់ខ្លួនក្នុងពេលបោះឆ្នោតប៉ុណ្ណោះទេ ប៉ុន្តែ គឺសម្រាប់ផលប្រយោជន៍សង្គមរយៈពេលយូរ។ កំណែទម្រង់គួរធ្វើពីលើមកក្រោម ឬធ្វើព្រមគ្នាក្នុងពេលតែមួយ។
ត្រូវផ្លាស់ប្ដូរផ្នត់គំនិត និង ទម្លាប់អាក្រក់ ដែលធ្លាប់ធ្វើអ្វីៗតាមទំនើងចិត្ត និង មិនខ្វល់ពីអ្នកដទៃ មកជាការធ្វើអ្វីៗផ្អែលើកច្បាប់ និង សីលធម៌ ព្រមទាំងគិតពីផលប៉ះពាល់ដល់អ្នកដទៃនិងសង្គមទាំងមូល។
ត្រូវបញ្ឈប់ការបណ្ដោយឱ្យអ្នកធំ និង អ្នកមានធ្វើបាបអ្នកតូច និង អ្នកក្រតាមទំនើងចិត្ត។
ត្រូវប្រយុទ្ធប្រឆាំងនឹងអំពើពុករលួយ ទាំងកម្រិតទូទៅនិងទាំងផ្ទៃក្នុងបក្ស។
ត្រូវហ៊ានកាត់សាច់ស្អុយ ហ៊ានផ្លាស់ប្ដូរមន្ត្រីអាក្រក់ មន្ត្រីពុករលួយ និង ផ្ដន្ទាទោសពួកគេតាមច្បាប់រដ្ឋ។
ត្រូវតែកែទម្រង់ប្រព័ន្ធតុលាការ ដើម្បីលើកកម្ពស់យុត្តិធម៌សង្គម ជាពិសេស ត្រូវបញ្ឈប់ការប្រើតុលាការជាឧបករណ៍របស់អ្នកនយោបាយ លុបបំបាត់អំពើពុករលួយក្នុងប្រព័ន្ធតុលាការ និង ត្រូវដោះស្រាយករណីចាស់ៗដែលបានបង្ហាញឱ្យឃើញភាពអយុត្តិធម៌ច្បាស់ក្រឡែត តែនៅមិនទាន់បានចាត់វិធានការសមស្របនៅឡើយ ដូចជា ករណី លោក ឈូក បណ្ឌិត, ឧកញ៉ា ថោង សារ៉ាត់ និង សុខ ប៊ុន ជាដើម។
ត្រូវលើកម្ពស់គុណភាណអប់រំ និង ប្រើប្រាស់ធនធានមនុស្សឱ្យបានត្រឹមត្រូវ ទាំងកម្រិតជំនាញ និងវ័យ។
ត្រូវទប់ស្កាត់បទល្មើសផ្សេងៗ ដូចជា ការកាប់បំផ្លាញព្រៃឈើ ការជួញដូរគ្រឿងញៀន ការនេសាទខុសច្បាប់ ការឈ្លានពានបូរណភាពទឹកដីពីប្រទេសជិតខាង និង ជនអន្តោប្រវេសន៍ខុសច្បាប់ ជាដើម។
ត្រូវកែទម្រង់សេវាសាធារណៈ ដូចជា សេវារដ្ឋបាល សុខាភិបាល ការចុះបញ្ជីដីធ្លី ការធ្វើលិខិតឆ្លងដែន...ឱ្យប្រសើរជាងសព្វថ្ងៃ ជាពិសេស ត្រូវលុបបំបាត់របៀបធ្វើការក្នុងនាមជាចៅហ្វាយ និង លុបបំបាត់ការយកលុយក្រៅច្បាប់លើការផ្ដល់សេវាទាំងនេះ។
គួរឈប់ប្រើវិធីសាស្ត្រដដែលៗ ដែលមិនទាក់ទាញ មិនថ្លៃថ្នូរ និង ឈប់ប្រើនយោបាយប្រជាភិថុតិ ការទិញសន្លឹកឆ្នោត និង ការគម្រាមកំហែង ក្នុងការឃោសរកសម្លេងឆ្នោត។
យើងគិតថា ប្រសិនបើបក្សកាន់អំណាច អាចធ្វើកំណែទម្រង់តាមចំណុចទាំងដប់ខាងលើ និង ចំណុចល្អៗផ្សេងទៀត ដែលយើងមិនបានលើកបង្ហាញនៅទីនេះ នោះបក្សកាន់អំណាចអាចទាញយកសម្លេងដែលខ្លួនបានបាត់បង់នោះមកវិញ ឬយ៉ាងហោចណាស់ ក៏អាចរក្សាបាននូវចំនួនអាសនៈដែលខ្លួនមានសព្វថ្ងៃនេះដែរ។ ផ្ទុយទៅវិញ ប្រសិនបើ បក្សកាន់អំណាច មិនអាចកែទម្រង់បានទេ យើងគិតថា សម្លេងគាំទ្ររបស់បក្សនេះ នឹងបន្តធ្លាក់ចុះបន្ថែមទៀត។ ទីបំផុត បក្សកាន់អំណាច នៅសល់តែសម្លេងគាំទ្រដែលជាអាជ្ញាធរគ្រប់លំដាប់ថ្នាក់ និង អ្នកមានទ្រព្យ ដែលបានផលប្រយោជន៍ពីបក្សរបស់ខ្លួនតែប៉ុណ្ណោះ ឯប្រជាជនទូទៅមិនគាំទ្រឡើយ៕
Tag:
CPP
© រក្សាសិទ្ធិដោយ thmeythmey.com
