សង្គមអន្តរជាតិ
អន្តរជាតិ
ស្ត្រីកូឡុំប៊ី ម្នាក់ត្រូវចាប់ខ្លួន ដោយមានលុយជាង ៣៨ ០០០ ដុល្លារនៅក្នុងពោះ
×![]()
ដោយ: ធីតា
ស្ត្រីជនជាតិកូឡុំប៊ីអាយុ ៣៩ ឆ្នាំម្នាក់ត្រូវបានចាប់ខ្លួនកាលពីថ្ងៃអង្គារកន្លងទៅនេះ នៅព្រលានយន្តហោះ Bogota បន្ទាប់ពីចុះពីជើងហោះហើរមកពីប្រទេសម៉ិចស៊ិក។ ស្ត្រីម្នាក់នេះបានលាក់លុយចំនួនប្រមាណជាង ៣៨ ០០០ ដុល្លារនៅក្នុងពោះ។ ក្រដាសប្រាក់ ១០០ ដុល្លារអាមេរិកសុទ្ធជាច្រើនរយសន្លឹកត្រូវបានច្រកក្នុងកូនថង់ប្លាស្ទិកជាង ៦០ ហើយស្ត្រីរូបនេះលេបចូលទៅក្នុងពោះ។
គួរបញ្ជាក់ថា ៩០ % នៃកូកាអីនដែលប្រើប្រាស់នៅសហរដ្ឋអាមេរិក មានប្រភពចេញពីប្រទេសនេះ។ កូឡូមប៊ីបានដាក់ពង្រាយភ្នាក់ងាររបស់ខ្លួនដើម្បីស្វែងរកអ្នកដំណើរដែលលាក់គ្រឿងញៀននៅក្នុងពោះ។ ក៏ដូចជាប្រទេសដទៃទៀតដែរ ការនាំយកប្រាក់សុទ្ធតាមខ្លួនលើសពី ១ ម៉ឺនដុល្លារត្រូវបានហាមឃាត់។
ប៉ូលិសកូឡូមប៊ីបានពន្យល់ថា ការប៉ុនប៉ងផ្ទេរប្រាក់សុទ្ធតាមវិធីនេះច្រើនតែពាក់ព័ន្ធនឹងក្រុមជួញដូរគ្រឿងញៀនដែលយល់ថា នេះជាវិធីដែលអាចនាំយកលុយខុសច្បាប់ចូលមកក្នុងប្រទេសខ្លួនវិញ។ ឆ្នាំនេះ ករណីចាប់បានលុយលាក់ក្នុងពោះបានកើនឡើងបួនដង ដែលមានតម្លៃស្មើនឹង ៥ លានដុល្លារ។ ការកើនឡើងនៃករណីនេះស្របពេលនឹងតម្លៃប្រាក់ដុល្លារអាមេរិកកើនឡើងផងដែរ បើធៀននឹងប្រាក់ peso របស់កូឡុំប៊ី៕
Tag:
កូឡុំប៊ី
© រក្សាសិទ្ធិដោយ thmeythmey.com
