ពិភពតារា៖ គឹម រ៉ូហ្សា រំលឹកពីប្រវត្តិមុនចូលសិល្បៈ
×
ភ្នំពេញ៖ តារាបង្ហាញម៉ូដនាង គឹម រ៉ូហ្សា ក្នុងវ័យ២៥ឆ្នាំ មានរូបសម្ផស្សស្រស់សោភា និងទេពកោសល្យបង្ហាញម៉ូដយ៉ាងល្អ នាងធ្លាប់ជាតួឯកក្នុងរឿង “ចន្ទចាកវេហាស៍” របស់ផលិតកម្មវិស្ណុភាពយន្ត។ កញ្ញា គឹម រ៉ូហ្សា ឱ្យដឹងថា នាងមានស្រុកកំណើតនៅស្រុកមោងឫស្សី ខេត្តបាត់ដំបង ហើយនាងមានបងប្អូនស្រី២នាក់ ក្នុងនោះរូបនាងជាកូនពៅ។
កញ្ញា គឹម រ៉ូហ្សា រំលឹកថា កាលពីឆ្នាំ១៩៩៩ នាងធ្លាប់ប្រឡងច្រៀងជាប់ចំណាត់ថ្នាក់លេខ១ប្រចាំខេត្តបាត់ដំបង ដោយច្រៀងបទ ស្នេហ៍ក្រោមម្លប់ជ្រៃ។ នាងសំរេចចិត្តបណ្តែតជីវិតចូលប្រឡូកក្នុងវិស័យសិល្បៈចាប់ពីឆ្នាំ២០០៥ មកគឺធ្វើជាតារាបង្ហាញម៉ូដនាងដោយចូលហាត់រៀនជាមួយលោកខេវិននៅស្ថានីយទូរទស្សន៍ CTN។ ក្នុងអាជីពជាអ្នកបង្ហាញម៉ូដរយៈពេល ៥ឆ្នាំនេះនាងមានការងារច្រើនពិសេសនៅឆ្នាំ២០១១ នេះនាងមានឱកាសបានចូលរួមសម្តែងឱ្យផលិតកម្មវិស្ណុភាពយន្តដោយអ្នកដឹក នាំរឿងតម្រូវឱ្យនាងសម្តែងជាតួឯក ដែលបានចេញថតនៅថ្ងៃទី៧ ខែកម្ភៈ ឆ្នាំ២០១១ ។ រឿង “ចន្ទចាកវេហាស៍” និពន្ធ និងដឹកនាំរឿងដោយលោក ជ័យ រិទ្ធា។
កញ្ញាគឹម រ៉ូហ្សា បន្តឲ្យដឹងថា សាច់រឿង “ចន្ទចាកវេហាស៍” ឆ្លុះបញ្ចាំងពីជីវិតក្មេងស្រីលក់កាសែត ខាត់ស្បែកជើង លក់ផ្កា លក់ប៉ោងប៉ោង ដើម្បីរកប្រាក់មកផ្គត់ផ្គង់គ្រួសារ និងបន្តការសិក្សានៅមហាវិទ្យាល័យ រហូតក្លាយខ្លួនជានិស្សិតពូកែ។ កញ្ញារ៉ូហ្សា និយាយថា នេះជាលើកទី១ហើយដែលនាងបានសម្តែងជាតួឯកភាពយន្ត ដូច្នេះនាងបានខិតខំប្រឹងសម្តែងឱ្យអស់ពីសមត្ថភាព៕
© រក្សាសិទ្ធិដោយ thmeythmey.com