ជាតិ
ម្តាយ នី មុនីនាថ ច្រានចោលដំណឹងស្នេហ៍ជំនួសកូនស្រី
× ភ្នំពេញ៖ ថ្មីៗនេះមានព័ត៌មានថា តារាសម្តែង កញ្ញា នី មុនីនាថ កំពុងព្យាយាមកាត់ផ្តាច់ទំនាក់ទំនងស្នេហាជាមួយលោក សូឡា ខណៈដែលលេចឮថា នាងកំពុងតែលួចបង្កើតចំណងស្នេហ៍ជាមួយបុរសអ្នកមានទ្រព្យ និងជាម្ចាស់ហាងនៅទួលគោកម្នាក់ ប៉ុន្តែព័ត៌មាននេះ ម្តាយតារាទឹកភ្នែក នី មុនីនាថ ចេញមុខច្រានចោលថា កូនស្រីអ្នកស្រីមិនបានបង្កើតទំនាក់ជាមួយបុរសណាទេ។
ម្តាយ នី មុនីនាថ បានចេញមុខច្រានចោលព័ត៌មានដែលមហាជនមួយចំនួនសង្ស័យថា កូនស្រីរបស់គាត់ នី មុនីនាថ ទំនងជាមានស្នេហាជាមួយបុរសអ្នកមានទ្រព្យ និងជាម្ចាស់ហាងមួយរូប តែគាត់បញ្ជាក់ថា នាថ គ្រាន់តែរាប់អានគ្នាតែប៉ុណ្ណោះ ហើយការដែលកូនស្រីរាប់អានជាមួយបុរសម្នាក់នេះ មិនមែនទើបតែធ្វើឡើងនៅពេលនេះទេ គឺមានរយៈពេលយូរឆ្នាំមកហើយ។
ម្តាយ នី មុនីនាថ បន្តថា ចំពោះរឿងរ៉ាវគេយល់ច្រឡំបែបនេះ គឺកូនស្រីអ្នកស្រីជួបញឹកញាប់មកហើយជាមួយបុរសថៅកែហាងរូបនោះ តែដល់កើតបញ្ហាគេយល់ច្រឡំបែបនេះ អ្នកស្រីមិនដឹងធ្វើម៉េច មានតែព្យាយាមចេញមុខឆ្លើយតប បញ្ជាក់ការពិតឲ្យមហាជនបានដឹងប៉ុណ្ណោះ ព្រោះកូនស្រីជាអ្នកសិល្បៈ ដូច្នេះហើយ ទោះបីជាអ្នកស្រីគេចមុខមិនព្រមចេញមកឆ្លើយបំភ្លឺ មានតែនាំឱ្យព័ត៌មានទាំងនេះរីកកាន់តែធំ ដែលធ្វើឱ្យប៉ះពាល់ដល់ប្រជាប្រិយភាពរបស់កូនស្រីទៅវិញ។
ទន្ទឹមគ្នានឹងការបញ្ជាក់ប្រាប់រឿងមហាជនយល់ច្រឡំនេះ ម្តាយ នី មុនីនាថ ក៏បានបង្ហើបឲ្យដឹងផងដែរ ចំពោះរឿងរ៉ាវដែលគេនិយាយថា ស្នេហា នី មុនីនាថ ប្រេះស្រាំជាមួយលោក សូឡា តែម្តាយតារាទឹកភ្នែករូបនេះ មិនបានបរិយាយអ្វីច្រើនទេ ដោយអ្នកស្រីគ្រាន់តែប្រាប់ថា ពួកគេមិនមានកើតរឿងរ៉ាវអ្វីឡើយ គឺគេនៅតែឈ្វេងយល់ចិត្តគ្នា ដើម្បីឈានទៅរកការរៀបចំគម្រោងរៀបការប៉ុណ្ណោះ៕
© រក្សាសិទ្ធិដោយ thmeythmey.com