សង្គមអន្តរជាតិ
អន្តរជាតិ
សហរដ្ឋអាមេរិក៖ ក្មេងប្រុសអាយុ២ឆ្នាំម្នាក់ ជាប់សង្ស័យពីបទបាញ់សម្លាប់ឪពុករបស់ខ្លួន
×![]()
ដោយ: ធីតា
បុរសអាយុ ៣១ ឆ្នាំម្នាក់បានស្លាប់ដោយសារគ្រាប់កាំភ្លើងបាញ់ចំក្បាលនៅក្នុងផ្ទះរបស់ខ្លួន កាលពីថ្ងៃអង្គារកន្លងទៅនេះ នៅទីក្រុង Birmingham នៃរដ្ឋ Alabama សហរដ្ឋអាមេរិក។ ប៉ូលីសសង្ស័យថា នេះគឺជាឧប្បត្តិហេតុដែលបង្កឡើងដោយកូនប្រុសជនរងគ្រោះ អាយុ ២ ឆ្នាំ។
ម្តាយរបស់ក្មេងបានប្រទះឃើញសាកសពរបស់ស្វាមី នៅពេលដែលនាងត្រឡប់មកពីធ្វើការវិញ។ តើនរណាជាអ្នកសម្លាប់ ? ស្ត្រីរូបនេះបានសន្និដ្ឋានថា គ្មាននរណាផ្សេងទៀតក្រៅពីកូនប្រុសអាយុ ២ ឆ្នាំរបស់ខ្លួនឡើយ។
បណ្តាញព័ត៌មានក្នុងស្រុកបានរាយការណ៍ថា អាជ្ញាធរក៏ធ្វើការសន្និដ្ឋានដូច្នេះដែរ។ ប៉ូលីស Gregg Rector បានពន្យល់ថា៖ « ខ្ញុំមិនអាចនិយាយបានថា បុរសម្នាក់នេះត្រូវបានសម្លាប់ដោយចៃដន្យទេ ប៉ុន្តែវាក៏គ្មានសញ្ញានៃការត្រតាយត្រតប់គ្នានៅក្នុងផ្ទះដែរ ហើយក៏ពុំមានអ្វីបញ្ជាក់ថា គាត់ធ្វើអត្តឃាតដែរ »។ ប៉ូលីសរូបនេះបានសន្និដ្ឋានទៀតថា៖ « ឪពុក និងកូនប្រុសប្រហែលជានៅជាមួយគ្នាតែពីរនាក់ នៅក្នុងហេតុការណ៍នេះ »។
កាំភ្លើងមួយដើមត្រូវបានរកឃើញនៅក្នុងផ្ទះ ប៉ុន្តែគេនៅមិនទាន់ដឹងនៅឡើយទេថា តើកាំភ្លើងនេះបានចុះបញ្ជីត្រឹមត្រូវតាមច្បាប់ឬទេ។ សម្រាប់ពេលនេះ គេត្រូវរង់ចាំលទ្ធផលនៃកោសលវិច្ឆ័យសិន៕
© រក្សាសិទ្ធិដោយ thmeythmey.com
