សង្គមអន្តរជាតិ
អន្តរជាតិ
តំណាង គីម ជុងអ៊ុន គំរាមវាយប្រហារកូរ៉េខាងត្បូងនៅ អ.ស.ប
× ក្រោយក្រុងព្យុងយ៉ាងប្រកាសបញ្ជាទ័ពឲ្យប្រុងប្រៀបធ្វើសង្គ្រាម តំណាង លោក គីម ជុងអ៊ុន បានថ្លែងសុន្ទរកថាព្រមានប្រឆាំងតបដោយប្រើទ័ព ប្រសិនបើកូរ៉េខាងត្បូងមិនបញ្ឈប់សកម្មភាពឃោសនាបង្ខូចឈ្មោះខ្លួនតាមព្រំដែន។ មិនមែនជារឿងធម្មតាទេ ដែលតំណាងក្រុងព្យុងយ៉ាងយកវេទិកាអង្គការសហប្រជាជាតិថ្លែងសន្ទុរកថា គំរាមវាយប្រហារកូរ៉េខាងត្បូងដូច្នេះ។ កូរ៉េខាងជើងក៏បានស្នើឲ្យមានការបើកកិច្ចប្រជុំបន្ទាន់មួយដើម្បីជជែកវិបត្តិឧបទ្វីបកូរ៉េនៅក្រុមប្រឹក្សាសន្តិសុខផងដែរ។
បេសកជនតំណាងរដ្ឋាភិបាលក្រុងព្យុងយ៉ាងប្រចាំអង្គការសហប្រជាជាតិបានថ្លែងសុន្ទរកថាព្រមានតបតដោយប្រើប្រាស់កម្លាំងទ័ពប្រឆាំងកូរ៉េខាងត្បូង ប្រសិនបើកូរ៉េខាងត្បូងមិនព្រមបញ្ឈប់ការឃោសនាតាមព្រំដែនតាមខ្លួនទាមទារទេនោះ។
ឯកអគ្គរដ្ឋទូតរងកូរ៉េខាងជើងប្រចាំអង្គការសហប្រជាតិលោក An Myong Hun បានផ្តល់សុន្ទកថានៅអង្គការសហប្រជាជាតិម្សិលមិញថា សកម្មភាពប្រឆាំងដោយប្រើកម្លាំងយោធារបស់រដ្ឋាភិបាលលោកនឹងខ្លាំងបំផុតមិនធ្លាប់មាន ហើយវាជារឿងមិនអាចចៀសរួចឡើយ បើកូរ៉េខាងត្បូងនៅរឹងទទឹងមិនធ្វើតាមខ្លួនទាមទារទេ។ អ្នកការទូតម្នាក់នេះថ្លែងទាំងមុខមាំដោយប្រើប្រាស់សំលេងខ្លាំងៗ ដោយព្រមានជាមុនថា សង្គ្រាមប្រឆាំងកូរ៉េខាងត្បូងមិនអាចចៀសរួចឡើយ បើកូរ៉េខាងត្បូងនៅតែបន្តបង្ករឿងធ្វើឲ្យខ្លួនក្តៅក្រហាយនោះ។
មន្ត្រីការទូតកូរ៉េខាងជើងខាងលើ ក៏បានស្នើឲ្យមានកិច្ចប្រជុំបន្ទាន់មួយផងដែរនៅក្នុងក្រុមប្រឹក្សាសន្តិសុខដើម្បជជែកពិភាក្សាគ្នាពីស្ថានភាពនិងវិបត្តិឧបទ្វីបកូរ៉េបច្ចុប្បន្ន។ ប៉ុន្តែលោកសង្កត់ធ្ងន់ថាគ្មានសមាជិកក្រុមប្រឹក្សាសន្តិសុខណាមួយគាំទ្រសំណើររបស់លោកឡើយ សូម្បីតែសម្ព័ន្ធមិត្តខ្លួនចិន។
លោកសង្កត់ធ្ងន់ថា ស្ថានភាពបច្ចុប្បន្នបញ្ជាក់ច្បាស់ថាឧបទ្វីបកូរ៉េក្បែរនឹងធ្លាក់ក្នុងភ្លើងសង្គ្រាមទៅហើយ ដែលវាចាំបាច់ណាស់ត្រូវមានដំណោះស្រាយមួយ។ ក្រៅលើកឡើងពីគ្រោះថ្នាក់នៃការប្រឈមមុខគ្នានេះ មន្ត្រីកូរ៉េខាងជើងនេះក៏បន្តចោទប្រកាន់កូរ៉េខាងត្បូងនិងអាមេរិកផងថាជាមេបង្កបញ្ហា និងធ្វើឲ្យស្ថានភាពកាន់តែតានតឹងនិងដុនដាបខ្លាំង។ ជាពិសេសភាគីទាំងពីរនេះកំពុងលាបពណ៌និងធ្វើឲ្យរដ្ឋាភិបាលលោក គីម ជុងអ៊ុន បាក់មុខបាក់មាត់ និងមានកេរ្តិ៍ឈ្មោះអាក្រក់លើឆាកអន្តរជាតិផង។
យ៉ាងណាក៏ដោយ ជុំវិញការប្រឈមមុខដាក់គ្នាខ្លាំងរហូតដល់បញ្ជាឲ្យទ័ពត្រៀមធ្វើសង្គ្រាមនេះ បានធ្វើឲ្យសហគមន៍អន្តរជាតិបារម្ភជាខ្លាំង។ គេឃើញក្រសួងការបរទេសចិនចេញសេចក្តីថ្លែងការណ៍អំពាវនាវឲ្យភាគីពាក់ព័ន្ធបញ្ឈប់សកម្មភាពដែលបង្កឲ្យភាពតានតឹងកើនឡើងនិងស្នើឲ្យកូរ៉េទាំងពីរអត់ធ្មត់។ ចំណែកអគ្គលេខាធិការអង្គការសហប្រជាជាតិលោក បាន គីមូន ដែលធ្លាប់ធ្វើជារដ្ឋមន្ត្រីការបរទេសកូរ៉េខាងត្បូងពីឆ្នាំ ២០០៤ដល់ឆ្នាំ ២០០៦នោះក៏បង្ហាញកង្វល់ខ្លាំងដែរ តែលោកបានទទួចឲ្យភាគីអត់ធ្មត់ ធ្វើយ៉ាងណាបញ្ចៀសសង្គ្រាមឲ្យបានផងដែរ។
សូមបញ្ជាក់ថា តំណាងរដ្ឋាភិបាលលោក គីម ជុងអ៊ុន ចេញមុខប្រើប្រាស់វេទិកាអង្គសហប្រជាជាតិគំរាមកូរ៉េខាងត្បូង ក្រោយពេលដែលប្រមុខរដ្ឋកូរ៉េខាងជើងដាក់បញ្ជាឲ្យទ័ពនៅខ្សែត្រៀមជួរមុខរៀបចំខ្លួនត្រៀមធ្វើសង្គ្រាម និងក្រោយមានការដាក់ឱសានវាទសម្រាប់កូរ៉េខាងត្បូងក្នុងការដកឧបករណ៍ឃោសនាចេញពីព្រំដែនត្រឹមល្ងាចថ្ងៃសៅរ៍៕
Tag:
កូរ៉េខាងជើង
កូរ៉េខាងត្បូង
© រក្សាសិទ្ធិដោយ thmeythmey.com