អ៊ីវ៉ា នៅតែមិនអាចគេចចេញពីសាន់ដេ
×
ភ្នំពេញ៖ ថ្មីៗនេះ មានព័ត៌មានថា តារាចម្រៀងកញ្ញា អ៊ីវ៉ា បានត្រៀមខ្លួនវេចបង្វេចដើរចេញពីផលិតកម្ម សាន់ដេ ដោយបញ្ហាការចចារធ្វើកុងត្រាលើកទីពីរមិនត្រូវគ្នា ព្រោះតែនាងទាមទារប្រយោជន៍ច្រើន ធ្វើឱ្យផលិតកម្មមិនអាចទទួលយកបាន រហូតមានព័ត៌មានចចាមអារ៉ាមថា តារាស្រីរូបនេះបានត្រៀមខ្លួនបង្ខំចិត្តមកជ្រកក្រោមទ្រនំផលិតកម្មថ្មីវិញ ប៉ុន្តែទីបំផុត នាងនៅតែមិនអាចគេចចេញពីសាន់ដេឡើយ។
កាលពីពេលថ្មីៗនេះ មានព័ត៌មានលេចឮថា តារាចម្រៀងប្រចាំផលិតកម្ម សាន់ដេ កញ្ញា អ៊ីវ៉ា បានទៅចុះកុងត្រាច្រៀងឲ្យផលិតកម្មចាស់វិញ គឺផលិតកម្ម ថោន ដែលមានរយៈពេលតែបីឆ្នាំប៉ុណ្ណោះ ខុសប្លែកពីកុងត្រាទីមួយមានរយៈពេលប្រាំឆ្នាំ។
យ៉ាងណាមិញ ថ្មីៗនេះ អ៊ីវ៉ា ក៏បានចេញលក់បទចម្រៀងថ្មីនៅក្នុងផលិតកម្ម សាន់ដេ ជាថ្មី ហើយភស្តុតាងនេះបញ្ជាក់យ៉ាងច្បាស់ថា តារាចម្រៀង អ៊ីវ៉ា មិនអាចរត់ទៅជ្រកនៅផលិតកម្មថ្មីក្រៅពី សាន់ដេ បានឡើយ។
ពាក់ព័ន្ធនឹងការវិលត្រឡប់ជាថ្មីរបស់កញ្ញា អ៊ីវ៉ា នេះដែរ គេហទំព័រ “ថ្មី” ក៏បានទូរស័ព្ទសួរបញ្ជាក់ អ៊ីវ៉ា ផងដែរ ប៉ុន្តែទូរស័ព្ទរបស់នាងមិនអាចទាក់ទងបាន។ ចំណែកលោក ឡាយ សុខចំរើន ហៅស្រេង ជាអ្នកគ្រប់គ្រងទូទៅផលិតកម្ម សាន់ដេ ក៏មិនអាចទូរស័ព្ទសួរបញ្ជាក់បានជុំវិញច្បាប់កុងត្រាថ្មីនេះ រវាងផលិតកម្ម សាន់ដេ ជាមួយកញ្ញា អ៊ីវ៉ា បានដែរ ដោយទូរស័ព្ទរបស់លោក ខលចូលគ្មានអ្នកទទួល៕
© រក្សាសិទ្ធិដោយ thmeythmey.com