សង្គមអន្តរជាតិ
អន្តរជាតិ
កសិករឥណ្ឌាម្នាក់ស្រាតជិត ៤០ ឆ្នាំមកហើយ ដោយសារតែមានប្រតិកម្មជាមួយសម្លៀកបំពាក់
ត្រឹមតែពាក់ស្រោមជើងក៏ធ្វើឲ្យកសិករឥណ្ឌាម្នាក់នេះមានការឈឺចាប់រោលរាលទៅហើយ។ ដោយសារមានប្រតិកម្មជាមួយនឹងក្រណាត់ បុរសម្នាក់នេះគ្មានជម្រើសអ្វីក្រៅពីស្រាតអស់រយៈពេលជិត ៤០ ឆ្នាំមកហើយនោះទេ។ ប៉ុន្តែ វាមិនមែនជារឿងចម្លែកទេ ព្រោះថាអ្នកដទៃទៀតក្នុងភូមិ Rajpur នៅរដ្ឋ West Bengal ប្រទេសឥណ្ឌា ក៏ស្រាតដូចជាគាត់អ៊ីចឹងដែរ។
Subal Barman អាយុ ៤៣ ឆ្នាំបាននិយាយថា៖ « តាំងពីក្មេងមក ខ្ញុំមិនអាចពាក់ខោអាវបានទេ ព្រោះថាពេលដែលសាច់ក្រណាត់ប៉ះជាមួយស្បែក ខ្លួនប្រាណខ្ញុំទាំងមូលត្រូវរលាកយ៉ាងខ្លាំង »។ សូម្បីតែគេងនៅលើកម្រាល ក៏បុរសកំសត់នេះមិនអាចគេងបានដែរ។ Subal ត្រូវបានគេសន្និដ្ឋានថា មានជំងឺចម្លែក នៅពេលដែលគាត់មានអាយុ ៥ ឆ្នាំ ហើយការសន្និដ្ឋានរោគនេះត្រូវបានបញ្ជាក់សាជាថ្មីដោយគ្រូពេទ្យមូលដ្ឋាន កាលគាត់អាយុ ១៧ ឆ្នាំ។ ជំងឺនេះទាមទារឲ្យមានការព្យាបាល តែគាត់គ្មានលទ្ធភាពទៅព្យាបាលនៅទីក្រុងក្បែរនេះទេ ព្រោះវាត្រូវចំណាយអស់ប្រាក់ច្រើនណាស់។ ហេតុនេះ គាត់សុខចិត្តមករស់នៅក្នុងខ្ទមក្នុងតំបន់ដាច់ស្រយាលនេះ។
មនុស្សជាច្រើនអាចនឹងភ្ញាក់ផ្អើលយ៉ាងខ្លាំង បើសិនជាពួកគេឃើញបុរសម្នាក់ដើរកាត់ចុះឡើងដោយគ្មានសម្លៀកបំពាក់បិទបាំងខ្លួន តែសម្រាប់អ្នកភូមិរបស់ Subal ពួកគេក៏មានទម្លាប់ស្រាតដូច Subal ដែរ។ កសិកររូបនេះបាននិយាយថា៖ « ចៃដន្យអី អ្នកជិតខាងរបស់ខ្ញុំមានទម្លាប់ដូចខ្ញុំដែរ ដូច្នេះ វាជារឿងធម្មតាទេ គ្មានអ្វីគួរឲ្យនិយាយឡើយ »។ គាត់បានបន្ថែមទៀតថា៖ « ពួកគេដឹងថា ខ្ញុំមានជំងឺនេះច្រើនឆ្នាំមកហើយ ពួកគេបណ្តោយតាមខ្ញុំ ហើយមិនដែលសើចចំអកឲ្យខ្ញុំដែរ »។
ប្រឈមនឹងជំងឺដ៏ចម្លែកនេះ បុរសដ៏ក្លាហាននេះមិនព្រមបណ្តោយឲ្យវាមកបំផ្លាញជីវិតសង្គមរបស់គាត់ជាដាច់ខាត។ កសិកររូបនេះបានពន្យល់ថា គាត់ទៅចូលរួមក្នុងពិធីមង្គលការ ពិធីបុណ្យជប់លៀងផ្សេងៗ ហើយក៏ចូលទៅក្នុងវិហារទាំងសភាពស្រាតផងដែរ។ បើទោះជាយ៉ាងនេះក៏ដោយ Subal មិនដែលចាកចេញពីភូមិរបស់គាត់ទេ។
រដូវត្រជាក់គឺជារដូវដែលអំណោយផលសម្រាប់បុរសចម្លែក ព្រោះថាធាតុត្រជាក់ប៉ះនឹងដងខ្លួនទទេរបស់គាត់ ធ្វើឲ្យគាត់ស្រួលខ្លួន។ ចំណែកនៅរដូវក្តៅវិញ គាត់ត្រូវមុជទឹកជាច្រើនដង ព្រោះថាស្បែករបស់គាត់ចាញ់កម្ដៅថ្ងៃខ្លាំងណាស់។ កម្តៅថ្ងៃធ្វើឲ្យគាត់ស្កៀបរមាស់ ហើយមានតែទឹកប៉ុណ្ណោះទើបអាចជួយបាន។ Subal មិនបណ្តោយឲ្យជំងឺប្រតិកម្មនេះប៉ះពាល់ដល់ការងារស្រែចម្ការរបស់គាត់ឡើយ ប៉ុន្តែគាត់ត្រូវអត់ទ្រាំនឹងជីវិតឯកា ក្រោយពីឪពុកស្លាប់កាលពីគាត់នៅក្មេង និងម្តាយស្លាប់នៅឆ្នាំ ២០០៣ ។
បុរសនេះបានត្អូញត្អែរថា៖ « តើមានស្រីណាព្រមរៀបការជាមួយបុរសដែលមានបញ្ហាដូចខ្ញុំទៅ ? គ្មានគ្រួសារណាព្រមឲ្យកូនស្រីរបស់ខ្លួនយកខ្ញុំទេ។ ខ្ញុំគ្មានជម្រើសក្រៅពីរស់នៅតែម្នាក់ឯងរហូតនោះទេ។ វាគឺជាវាសនារបស់ខ្ញុំ ទោះជាខ្ញុំកើតទុក្ខ ឬខូចចិត្តយ៉ាងណា ក៏មិនអាចដោះស្រាយបញ្ហាបានដែរ »។
បុរសរូបនេះជឿថា លក្ខខណ្ឌពិសេសរបស់គាត់អាចជាការប្រសិទ្ធិពររបស់ព្រះ។ « ខ្ញុំព្រមទទួលយកនូវភាពពិសេសនេះ។ ប្រហែលជាព្រះមើលឃើញថា ខ្ញុំជាមនុស្សពិសេសខុសពីអ្នកដទៃ »៕
© រក្សាសិទ្ធិដោយ thmeythmey.com