អន្តរជាតិ
Florida ៖ ត្រឹមតែ ៣០ នាទី ស្ត្រីម្នាក់ប្លន់ធនាគារបានបីកន្លែងដើម្បីបង់ថ្លៃជប់លៀងបញ្ចប់ការសិក្សាឲ្យកូនស្រី
× ស្ត្រីម្នាក់បានប្លន់ធនាគារបីកន្លែង ដោយប្រើពេលត្រឹមតែ ៣០ នាទី បន្ទាប់ពីថ្ងៃទិវាបុណ្យម្តាយ ព្រោះតែចង់បង់ថ្លៃពិធីជប់លៀងបញ្ចប់ការសិក្សាឲ្យកូនស្រី និងថ្លៃជួលផ្ទះដែលខកខានកាលពីពេលកន្លងមក។
Cindy Sanchez Carabeo អាយុ ៥០ ឆ្នាំរស់នៅរដ្ឋ Florida ប្រឈមនឹងជាប់ពន្ធនាគារ ២០ ឆ្នាំ។ ស្ត្រីជាម្តាយរូបនេះត្រូវបានចោទប្រកាន់ពីបទប្លន់ប្រាក់ ៦ ពាន់ដុល្លារកាលពីខែឧសភាកន្លងទៅនេះ។ នៅពេលធ្វើសកម្មភាពប្លន់ធនាគារទាំងបីកន្លែង ជនជាប់ចោទគ្រាន់តែសរសេរពាក្យគំរាមដាក់លើក្រដាស រួចហុចឲ្យបេឡាករប៉ុណ្ណោះ។ បើតាមបណ្តាញព័ត៌មាន the Tampa Bay News ពាក្យគំរាមទាំងនោះគឺដូចជា៖
« បើមិនស្តាប់តាមការណែនាំខ្ញុំទេ អ្នកអាចនឹងជួបគ្រោះថ្នាក់ »។
« បើមិនធ្វើតាមពាក្យខ្ញុំប្រាប់ទេ ខ្ញុំនឹងបាញ់អ្នកជាមិនខានឡើយ »។
ចុងក្រោយ គឺជាពាក្យគំរាមបាញ់សម្លាប់ តែមានភ្ជាប់នូវពាក្យជូនពរ « រីករាយទិវាបុណ្យម្តាយ » ផងដែរ។
ថ្វីដ្បិតតែស្ត្រីរូបនេះប្រើពេលវេលាតិចប៉ុណ្ណោះធ្វើសកម្មភាពប្លន់ តែប៉ូលិសក៏អាចចាប់បានយ៉ាងលឿនបំផុតដែរ។ គឺត្រឹមតែ ១៥ នាទីប៉ុណ្ណោះ។ រថយន្តដែលស្ត្រីរូបនេះជិះប្លន់ បានបញ្ចេញផ្សែងពណ៌ក្រហម ជាហេតុធ្វើឲ្យប៉ូលិសតាមដានដល់ផ្ទះ។
សកម្មភាពប្លន់ត្រូវបានធ្វើឡើងនៅក្នុងពេលវេលាយ៉ាងប្រកិតគ្នា គឺនៅម៉ោង ១៥ និង ១៩ នាទី, ម៉ោង ១៥ និង ៣៥ នាទី, ម៉ោង ១៥ និង ៤០ នាទី នៅថ្ងៃទី ១១ ឧសភា បន្ទាប់ពីទិវាបុណ្យម្តាយ៕
© រក្សាសិទ្ធិដោយ thmeythmey.com