អន្តរជាតិ
×![]()
សារព័ត៌មាន ជាតិមីយ៉ាន់ម៉ាបានប្រកាសកាលពីថ្ងៃសៅរ៍ថា រដ្ឋាភិបាលបានកំណត់អោយមានប្រាក់ខែអប្បបរមាជាលើកដំបូង ក្នុងប្រទេស។ នេះជាកំណែទម្រង់សេដ្ឋកិច្ចមួយរបស់មីយ៉ាន់ម៉ា ដើម្បីឆ្លើយតបតាមការចង់បានរបស់អ្នកវិនិយោគបរទេស។ ការអនុវត្តអោយមានប្រាក់ខែអប្បបរមានេះចាប់ធ្វើ ពីថ្ងៃអង្គារម្សិលមិញនេះតែម្តង។
ប្រាក់ខែ អប្បបរមានៅមីយ៉ាន់ម៉ា បើគិតជាប្រាក់ប្រចាំថ្ងៃ សម្រាប់ពលកម្ម៨ម៉ោងក្នុងមួយថ្ងៃ គឺស្មើនឹង៣៦០០Kyat ត្រូវនឹង២អឺរ៉ូ៥០ សេន។ ការតវ៉ាអោយមានប្រាក់ខែអប្បបរមាមានតាំងពី២ឆ្នាំមុនម្ល៉េះ។ សហជីពចង់អោយកម្មករទទួលបាន២អឺរ៉ូ៨០សេន ប៉ុន្តែ ក្រោយពេលពិភាក្សាអស់យូរយាររវាងរដ្ឋាភិបាលសហជីព និងតំណាងថ្នាក់ដឹកនាំសហគ្រាស គ្រប់ភាគីបានព្រមព្រៀងអោយកំណត់នៅត្រឹម២អឺរ៉ូ៥០សេនវិញ។
ប្រៀបនឹងប្រទេសជិតខាងក្នុងតំបន់ ប្រាក់ខែអប្បបរមានេះមានតម្លៃទាបណាស់។ ការយល់ព្រម អោយកំណត់ប្រាក់ខែអប្បបរមា ធ្វើឡើងក្រោមសម្ពាធរបស់សហគ្រាសប្រទេសលោកខាងលិច និងដោយសារតែមានបាតុកម្មតវ៉ា កាលពីដើមឆ្នាំប៉ុណ្ណោះ។ សម្រាប់ប្រាក់អប្បបរមានេះ ក្រុមហ៊ុនដែលមានបុគ្គលិកតិចជាង១៥នាក់ រឺក៏សហគ្រាសបែបគ្រួសារមិនចាំបាច់អនុវត្តធ្វើទេ។
ផ្ទុយទៅវិញ ការសិក្សារបស់ធនាគារពិភពលោក ក្នុងឆ្នាំកន្លងទៅ បានបង្ហាញថា ប្រជាជនសកម្មជិត៣ភាគ៤ បំរើការអោយផ្នែកការងារផ្សេងៗដែលគ្មានលក្ខណៈផ្លូវការ។ ដូច្នេះ មានន័យថា ប្រជាជនតិចតួច អាចនឹងទទួលបានប្រាក់កម្រៃអប្បបរមានេះ។ ជាទូទៅ ប្រាក់ខែអប្បរមានេះពាក់ព័ន្ធនឹងរោងចក្រកាត់ដេរក្នុងស្រុក។
ក្រោយរបបសឹកដួលរលំនៅឆ្នាំ ២០១១ និងក្រោយប្រទេសលោកខាងលិចលើកលែងទណ្ឌកម្មសេដ្ឋកិច្ចអោយមីយ៉ាន់ម៉ា សហគ្រាសចិននិងកូរ៉េបាននាំគ្នារកស៊ីផ្នែកកាត់ដេរសម្លៀកបំពាក់ នៅមីយ៉ាន់ម៉ា។ ក្រោយមហន្តរាយរលំអគារ Rana Plaza នៅបង់ក្លាដែសនៅឆ្នាំ២០១៣មក សហគ្រាសយីហោធំៗ ដូចជាAdidas, H&M ដែលបោះទុននៅមីយ៉ាន់ម៉ា បានជំរុញអោយរដ្ឋាភិបាលមីយ៉ាន់ម៉ាជួយធ្វើអោយលក្ខខណ្ឌការងារកម្មករមានលក្ខណៈល្អប្រសើរឡើង៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
