ជាតិ
នយោបាយជាតិ
×![]()
តុលាការសាលាឧទ្ធរណ៍ បានសម្រចច្រានចោលបណ្តឹងប្រឆាំងនឹងដីកាសម្រេចឲ្យឃុំខ្លួន លោក ហុង សុខហួរ សមាជិកព្រឹទ្ធសភា គណបក្សសម រង្ស៊ី ពីសំណាក់តុលាការសាលាដំបូងរាជធានីភ្នំពេញ។ 
បន្ទាប់ពីបានសាកសួរពាក់ព័ន្ធនឹងសេចក្តីសម្រេច ឃុំខ្លួន លោក ហុង សុខហួរ រយៈពេលជាង១ម៉ោង នៅព្រឹកថ្ងៃទី២ កញ្ញានេះ ចៅក្រមស៊ើបសួរ លោក ឃុន ប៊ុនឡេង បានសម្រេចច្រានចោលបណ្តឹងប្រឆាំងនឹងដីកាសម្រេចនេះ ដោយចាត់ទុកដីការសម្រេចរបស់តុលាការសាលាដំបូងរាជធានីភ្នំពេញ ជាបានការ។
លោក ជួង ជូងី មេធាវីការពារក្តី លោក ហុង សុខហួរ បានសម្តែងក្តីមិនពេញចិត្តចំពោះសេចក្តីសម្រេចនេះ។ លោក បានថ្លែងប្រាប់អ្នកសារព័ត៌មានថា លោកនឹងពិភាក្សាជាមួយកូនក្តីរបស់លោក ដើម្បីរៀបចំបណ្តឹងសាទុក្ខទៅតុលាការកំពូល។
សូមបញ្ជាក់ថា នៅក្នុងបន្ទប់សវនាការនៅព្រឹកនេះ មិនមានវត្តមានជនជាប់ចោទលោក ហុង សុខហួរ នោះឡើយ។
លោក ជួង ជូងី ដែលជាមេធាវីការពារក្តី ឲ្យលោក ហុង សុខហួរ ធ្លាប់ថ្លែងប្រាប់សារព័ត៌មានថ្មីៗថា លោក ហុង សុខ ហួរ អាចនៅក្រៅឃុំបាន ល្គឹកណាមានដំណោះស្រាយតាមផ្លូវនយោបាយ។
លោក ហុង សុខហួរ ត្រូវបានកងកម្លាំងមានសមត្ថកិច្ចចាប់ខ្លួនបាននៅព្រឹកព្រហាមថ្ងៃសៅរ៍ ទី១៥ ខែសីហា នៅភូមិគ្រឹះដែលស្ថិតនៅក្នុងភូមិសាស្ត្រសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ នៅថ្ងៃទី១៦ខែសីហា សមាជិកព្រឹទ្ធសភា គណបក្សសម រង្ស៊ីរូបនេះ ត្រូវបានលើបទចោទប្រកាន់ចំនួន៣ គឺបទក្លែង និងប្រើ ឯកសារសាធារណៈ រួមទាំងញុះញង់ឲ្យមានបទល្មើសមជ្ឈិម។
ការចាប់ខ្លួនលោក ហុង សុខហួរ ត្រូវបានចាប់ខ្លួនបន្ទាប់ពីមានពីលោកនាយករដ្ឋមន្ត្រី ហ៊ុន សែន កាលពីថ្ងៃទី១៣ខែសីហា។ ការបញ្ជាឲ្យចាប់ខ្លួននេះ ត្រូវបានប្រមុខរដ្ឋាភិបាលកម្ពុជា អះអាងថា លោក ហុង សុខហួរ បានបកស្រាយខុសពីបញ្ហាព្រំដែន ជាពិសេសទាក់ទងនឹងកិច្ចព្រមព្រៀងរវាងកម្ពុជា និងវៀតណាម។ លោក ហ៊ុន សែន បានលើកឡើងថា ការបកស្រាយបែបនេះ គឺជាបទល្មើសក្បត់ជាតិ។ លោកក៏បានហាមផងដែរ ចំពោះការធ្វើអន្តរាគមន៍នានាពីបណ្តាទូតបរទេស និងគណបក្សនយោបាយ ព្រោះនេះគ្រាន់តែជារឿងបុគ្គលម្នាក់ប៉ុណ្ណោះ៕
Tag:
ហុង សុខហួរ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
