ជាតិ
ឃាត់ខ្លួនជនជាតិវៀតណាមខុសច្បាប់៧នាក់ និងផាកពិន័យ៤នាក់
×
ជនអន្តោប្រវេសន៍វៀតណាម ចំនួន១១នាក់ ត្រូវសមត្ថកិច្ចឃាត់ខ្លួន នៅខណ្ឌច្បារអំពៅ កាលពីថ្ងៃទី១ ខែកញ្ញា ម្សិលមិញ។ ក្នុងចំណោមពួកគេ ៤នាក់មានលិខិតឆ្លងដែន និង៧នាក់ទៀត មិនមានលិខិតឆ្លងដែន។ អ្នកដែលគ្មានលិខិតឆ្លងដែនអាចនឹងត្រូវបាន បណ្តេញចេញពីកម្ពុជា នៅចុងសប្តាហ៍នេះ។ នេះជាការបញ្ជាក់របស់លោក អ៊ុក ហៃសីលា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ។
បើតាមលោក អ៊ុក ហៃសីលា ជនជាតិវៀតណាមចំនួន១១នាក់ ដែលលួចស្នាក់នៅ និងរកស៊ីដោយខុសច្បាប់ក្នុងព្រះរាជាណាចក្រកម្ពុជា ត្រូវបានសមត្ថកិច្ចឃាត់ខ្លួន នៅសង្កាត់និរោធន៍ ខណ្ឌច្បារអំពៅ កាលពីម្សិលមិញ។ នាយកដ្ឋានស៊ើបអង្កេត និងអនុវត្តនីតិវិធី បានបញ្ជូនជនជាតិវៀតណាមទាំងនោះទៅកាន់អគ្គនាយដ្ឋានអន្តោប្រវេសន៍ ដើម្បីធ្វើការសាកសួរចម្លើយ។
លោកបញ្ជាក់ដូច្នេះថា៖ «ជនជាតិវៀតណាមទាំង១១នាក់នេះ គឺសុទ្ធតែជាបុរស ហើយពួកគេធ្វើការជាជាងសំណង់ និងជាងក្រឡឹង។ ក្នុងចំណោមពួកគេ ៤នាក់ មានលិខិតឆ្លងដែន តែគ្មានសៀវភៅការងារ អីចឹងគ្រាន់តែផាកពិន័យ ប៉ុណ្ណោះ។ ចំណែកឯ ៧នាក់ទៀត មិនមានលិខិតឆ្លងដែន ត្រូវបានឃុំខ្លួន នៅអគ្គនាយកដ្ឋានអន្តោប្រវេសន៍។ ។ យើងអាចនឹង បណ្តេញពួកគេចេញពីកម្ពុជានៅថ្ងៃសៅរ៍ ឬថ្ងៃអាទិត្យ ចុងសប្តាហ៍ហ្នឹង ប្រសិនបើក្រសួងមហាផ្ទៃសម្រេចថាបណ្តេញចេញ បន្ទាប់ពីអគ្គនាយកដ្ឋានអន្តោប្រវេសន៍ ទទួលបានថាជនជាតិវៀតណាមទាំងនេះ មករស់នៅដោយខុសច្បាប់មែន»។
កាលពីកន្លងទៅថ្មីៗនេះ ប្រធាននាយកដ្ឋានស៊ើបអង្កេតរូបនេះ ក៏ធ្លាប់អំពាវនាវដល់ប្រជាពលរដ្ឋគ្រប់ទីកន្លែងជួយសហការជាមួយ សមត្ថកិច្ច ក្នុងការឃាត់ខ្លួនជនជាតិវៀតណាម ដែលលួចមកស្នាក់នៅ និងរកស៊ីដោយខុសច្បាប់ក្នុងព្រះរាជាណាចក្រកម្ពុជា។ លោកស្នើឡើងដូច្នេះថា៖ «យើងចង់ឲ្យប្រជាពលរដ្ឋគ្រប់រូប ជួយរាយការណ៍ជូនកម្លាំងគនរបាល ប្រសិនបើពួកគាត់បានដឹងថា មានជនជាតិវៀតណាម កំពុងរស់នៅកន្លែងណា ដោយខុសច្បាប់ គ្មានលិខិតឆ្លងដែន ឬក៏ឯកសារត្រឹមត្រូវនោះទេ»។
សូមបញ្ជាក់ថា ជនអន្តោប្រវេសន៍ខុសច្បាប់សរុបទាំងអស់ ៤៦ជនជាតិ មានចំនួនប្រមាណជាង ២០០០នាក់ ត្រូវបានសមត្ថកិច្ចឃាត់ខ្លួន និងបណ្តេញចេញពីកម្ពុជា ដោយគិតត្រឹមរយៈពេល ៩ខែ ដើមឆ្នាំ២០១៥នេះ។ ក្នុងចំណោមជនអន្តោប្រវេសន៍ទាំងនោះ មានជនជាតិវៀតណាម ប្រមាណជាង ៩០% ៕
© រក្សាសិទ្ធិដោយ thmeythmey.com