ជាតិ
អាជ្ញាធរអប្សរា រៀបចំបទបង្ហាញស្តីពីអារ្យធម៌អង្គរ និងការប្រែប្រួលសង្គមអាស៊ីអាគ្នេយ៍
×
អាជ្ញាធរជាតិអប្សរា នឹងរៀបចំបទបង្ហាញមួយ ស្តីពីអារ្យធម៌អង្គរនិងការប្រែប្រួលនៃបរិបទសង្គមនៅតំបន់អាស៊ីអាគ្នេយ៍ នៅរសៀលថ្ងៃទី៧ និងព្រឹកថ្ងៃទី៨ ខែកញ្ញាខាងមុខនេះ។
បទបង្ហាញនេះ រៀបចំក្នុងគោលបំណង ចែករំលែកបទពិសោធន៍ស្រាវជ្រាវ និងផ្តល់ចំណេះដឹងថ្មីដែលអ្នកស្រាវជ្រាវជាតិ និងអន្តរជាតិបានសិក្សា។ វាគ្មិនដែលនឹងត្រូវធ្វើបទបង្ហាញនេះ គឺលោកសាស្ត្រាចារ្យ Sahai (Sachchidanand Sahai) ដែលជាអ្នកជំនាញការអន្តរជាតិផ្នែកប្រវត្តិសាស្ត្រ និងសិលាចារឹក។ នេះជាការបញ្ជាក់របស់អាជ្ញាធរជាតិអប្សរា។
លោកសាស្ត្រាចារ្យ Sahai គឺជាអ្នកស្រាវជ្រាវដ៏ល្បីនៅប្រទេសឥណ្ឌា។ លោកធ្លាប់បានធ្វើការសិក្សាស្រាវជ្រាវជាច្រើនពាក់ព័ន្ធនឹងតំបន់អាស៊ីអាគ្នេយ៍ ជាពិសេសប្រទេសកម្ពុជានិងតំបន់អង្គរ។
បច្ចុប្បន្នលោក ជាទីប្រឹក្សារបស់អាជ្ញាធរជាតិអប្សរា និងជាអ្នកជំនាញការនៃគណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍ប្រាសាទព្រះវិហារ(អាយស៊ីស៊ី-ព្រះវិហារ)។ ក្នុងរយៈពេលកន្លងមក លោកសាស្ត្រាចារ្យបានសរសេរសៀវភៅជាច្រើន ដែលពាក់ព័ន្ធនឹងប្រវត្តិសាស្ត្រ វប្បធម៌ និងអារ្យធម៌នៃបណ្តាប្រទេសនៅអាស៊ីអាគ្នេយ៍ ជាពិសេសប្រទេសកម្ពុជា៕
© រក្សាសិទ្ធិដោយ thmeythmey.com