អន្តរជាតិ
ក្រុងប៉េកាំងកាន់តែស្និទ្ធក្រុងសេអ៊ូលអាចធ្វើឲ្យក្រុងវ៉ាស៊ីនតោនបាត់បង់ឥទ្ធិពល
× ប្រធានាធិបតីកូរ៉េខាងត្បូងលោកស្រី ប៉ាក ហ្គឺនហេ បានអញ្ជើញទៅដល់ប្រទេសចិននៅថ្ងៃអង្គារនេះតបតាមការអញ្ជើញរបស់ប្រមុខរដ្ឋចិន ស៊ី ជិនពីង។ លោកស្រីនឹងចូលរួមក្នុងពិធីខួបរំលឹកជ័យជម្នះលើចក្រពត្តិជប៉ុនសម័យសង្គ្រាមលោកលើកទី២ តែលោក គីម ជុងអ៊ុនមិនទៅចូលរួមឡើយ។ វត្តមានលោកស្រីបញ្ជាក់ថា ទំនាក់ទំនងរវាងកូរ៉េខាងត្បូងនិងចិនល្អប្រសើរខ្លាំងមិនចាញ់សម្ព័ន្ធមិត្តអាមេរិកឡើយ។ ក្រុងប៉េកាំងកំពុងស្វះស្វែងធ្វើឲ្យសម្ព័ន្ធភាពកូរ៉េខាងត្បូងជាមួយអាមេរិកទន់ខ្សោយដើម្បីបន្ថយឥទ្ធិពលអាមេរិក។
សូមស្តាប់ការបកស្រាយរបស់លោក សៅ ផលនិស្ស័យ៖
ប្រមុខរដ្ឋ ប្រមុខរដ្ឋាភិបាលនៃរដ្ឋជាមិត្តរបស់ចិនបានអញ្ជើញទៅដល់ប្រទេសចិនជាបន្តបន្ទាប់ដើម្បីចូលរួមក្នុងពិធីរំលឹកខួបជ័យជម្នះសង្គ្រាមលោកលើកទី២ ។ មេដឹកនាំទាំងនោះមានមកពីអាហ្វ្រិក អឺរ៉ុបខាងកើត និងអាស៊ី ជាដើម ប៉ុន្តែមេដឹកនាំលោកខាងលិចជាច្រើនប្រកាសមិនចូលរួម ហើយនាយករដ្ឋមន្ត្រីជប៉ុនលោក ស៊ីនហ្សូ អាបេ ក៏មិនចូលរួមក្នុងកម្មវិធីនៅចិនដែរ។ មេដឹកនាំមកពីប្រទេសចំនួន៣០ មានលោក វ្ល៉ាឌីមៀពូទីន រួមជាមួយប្រមុខអង្គការសហប្រជាជាតិលោក បាន គីមូនផងដែរ។ ថ្ងៃព្រហស្បតិ៍ស្អែកនេះ មានការដើរហែរក្បួនទ័ពដ៏ធំមិនធ្លាប់មាន នៅទីលានធានអានមេនផងដែរ។ ចិននឹងបង្អួតសាច់ដុំយោធា ដោយបញ្ចេញសពា្វវុធទំនើបៗច្រើនរយប្រភេទផងដែរ។
រឿងដែលសំខាន់នៅថ្ងៃពុធនេះ ប្រធានាធិបតីកូរ៉េខាងត្បូងលោកស្រី ប៉ាក ហ្គឺនហេ បានទៅដល់ទីក្រុងប៉េកាំងរួចទៅហើយតបតាមការអញ្ជើញរបស់លោក ស៊ី ជីនពិង។ គេរំពឹង លោកស្រីនឹងជួបពិភាក្សាជាលក្ខណៈទ្វេភាគីជាមួយសមភាគីចិន ដោយផ្តោតលើប្រធានបទសំខាន់ៗជាច្រើនជាពិសេសបញ្ហាទំនាក់ទំនងការទូត ពាណិជ្ជកម្មទ្វេភាគីនិង បញ្ហាឧបទ្វីបកូរ៉េផង។ វត្តមានលោកស្រីប្រមុខរដ្ឋកូរ៉េខាងត្បូងនៅចិន បញ្ជាក់កាន់តែច្បាស់ថា ទំនាក់ទំនងចិននិងកូរ៉េខាងត្បូងកាន់ប្រសើរមិនចាញ់ទំនាក់ទំនងកូរ៉េខាងត្បូងជាមួយសម្ព័ន្ធមិត្តអាមេរិកប៉ុន្មានឡើយ។ លោកស្រីអញ្ជើញទៅចិន ផ្ទុយទៅវិញលោក គីម ជុងអ៊ុន ប្រមុខរដ្ឋកូរ៉េខាងជើងបែរជាបដិសេធចូលរួមដោយបញ្ជូនតំណាងរបស់ខ្លួនលោក Choe Ryong Hae ទៅជំនួសទៅវិញ។ នេះក៏អាចរំលេចឲ្យឃើញពីការឃ្លាតឆ្ងាយពីគ្នារវាងសម្ព័ន្ធមិត្តទាំងពីរចិននិងកូរ៉េខាងជើងផងដែរ។
តាមពិតទៅចំណងទំនាក់ទំនងប្រទេសទាំងពីរចាប់ផ្តើមមានបញ្ហា ចាប់តាំងពី គីម ជុងអ៊ុន ឡើងកាន់តំណែងមកម្ល៉េះ ដ្បិតថាក្រុងប៉េកាំងមើលឃើញថាគីមជុងអ៊ុនជាមនុស្សពិបាកធ្វើការជាមួយមិនដូចជីតានិងឪពុកលោកឡើយ។ ជាឧទាហរណ៍ គីម ជុងអ៊ុន បញ្ជាឲ្យគេបាញ់សាកល្បងកាំជ្រួចនុយក្លេអ៊ែរក្នុងឆ្នាំ ២០១៣ ទាំងដែលចិនជំទាស់រួចទៅហើយដែរ។ ប៉ុន្តែទោះជាដូច្នេះក្តី ទំនាក់ទំនងនៅតែរឹងមាំទោះធ្លាក់ចុះមែនក្តី។ នេះក៏ដោយសារប្រទេសទាំងពីរមានទំនាក់ទំនងយូរយារណាស់មកហើយ ដោយចិនធ្លាប់ចេញជួយច្បាំងកូរ៉េខាងជើងប្រឆាំងទ័ពអាមេរិកនិងសម្ព័ន្ធមិត្តសម័យសង្គ្រាមកូរ៉េផងឆ្នាំ ១៩៥០ ១៩៥៣ ផង។
ត្រលប់មកវិញ វាជាការពិតដែលថា ទំនាក់ទំនងទ្វេភាគីនៃមិត្តជិតខាងទាំងពីរកូរ៉េខាងត្បូងនិងចិនល្អពិតមែន ជាពិសេសផ្នែកសេដ្ឋកិច្ច។ យោងតាមសារព័ត៌មាន Wall Street ទំហំពាណិជ្ជកម្មទ្វេភាគីរដ្ឋទាំងពីរកើនរហ័សក្នុងរយៈពេលប៉ុន្មានឆ្នាំចុងក្រោយ ដោយចិនជាដៃគូពាណិជ្ជកម្មលេខមួយរបស់កូរ៉េខាងត្បូង ហើយកូរ៉េខាងត្បូងជាដៃគូពាណិជ្ជកម្មលេខរៀងទី៤របស់ចិនផង។ ភាគីទាំងពីរក៏បានចុះកិច្ចព្រមព្រៀងពាណិជ្ជកម្មទ្វេភាគីផងនៅដើមឆ្នាំ ២០១៥នេះទៀត។
កាលខែឧសភាលោកស្រីបដិសេធអញ្ជើញទៅចូលរួមខួបលើកទី ៧០នៃជ័យជម្នះសង្គ្រាមលោកលើកទី២នៅរុស្ស៊ីដោយសារតែរុស្ស៊ីអញ្ជើញ គីម ជុងអ៊ុនទៅចូលរួមហើយណាមួយរុស្ស៊ីកំពុងស្ថិតក្រោមបញ្ជីខ្មៅរបស់លោកខាងលិចជាពិសេសអាមេរិកផងព្រោះឈ្លានពានអ៊ុយក្រែន។ ចុងក្រោយលោក គីមជុងអ៊ុនសម្រេចលុបចោលដំណើរទៅរុស្ស៊ីទៅវិញដោយមិនដឹងមូលហេតុ។
កូរ៉េខាងជើងបន្ថយការពឹងផ្អែកលើក្រុងប៉េកាំង ដោយព្យាយាមបង្កើនទំនាក់ទំនងជាមួយបណ្តារដ្ឋឯទៀតនៅអាស៊ី អាហ្វ្រិក និងអាមេរិកឡាទីនជាដើម។ កាលពីប៉ុន្មានខែមុន រដ្ឋមន្ត្រីការបរទេសក្រុងព្យុងយ៉ាង Ri Su Yong ចេញដំណើរទៅទស្សនកិច្ចនៅគុយបា ហើយបន្តទៅរដ្ឋឯទៀតនៅអាហ្វ្រិកផង ដោយមានគោលបំណងរឹតបន្តឹងចំណងមិត្តភាពនិងអាចបង្កើតកិច្ចសហប្រតិបត្តិការសេដ្ឋកិច្ចនិងពាណិជ្ជកម្មផងនៅពេលខាងមុខ។ តែទោះចង់មិនចង់ ក្រុងព្យុងយ៉ាងមិនចង់ឲ្យខូចខាតទំនាក់ទំនងជាមួយចិនឡើយ ទោះជាចង់កាត់បន្ថយការពឹងពាក់លើចិនខ្លះក្តី។ មិនមានវត្តមាន គីម ជុងអ៊ុន មែនតែតំណាងដែលត្រូវបញ្ជូនទៅចិន ជាមន្ត្រីជំនិតបំផុតរបស់លោកនិងមានតំណែងជាលេខាគណកម្មការកណ្តាលទៀត។
ជុំវិញរូបភាពថ្មីនៃការប្រសើរឡើងនៃទំនាក់ទំនងចិននិងកូរ៉េខាងត្បូង ទាំងចិន និងកូរ៉េខាងត្បូងសុទ្ធតែមើលឃើញប្រយោជន៍ច្រើនដែលអាចទាញបានពីការរឹតបន្តឹងចំណងមិត្តភាពនេះ។ កូរ៉េខាងត្បូងឯណោះវិញយល់ឃើញថា មានទំនាក់ទំនងជិតស្និទ្ធជាមួយចិនមានប្រយោជន៍ច្រើនយ៉ាង។ ប្រយោជន៍ចម្បងគឺ ចិនអាចជួយដាក់សម្ពាធក្រុងព្យុងយ៉ាងឲ្យត្រលប់ទៅតុចរចាដើម្បីជជែកគ្នាពីការរួបរួមគ្នារវាងបងប្អូនទាំងពីរ។ លោក ស៊ី ជិនពីងនិងលោកស្រី ប៉ាក ហ្គឺនហេ ធ្លាប់ជជែកគ្នារឿងដំណើរឈានទៅរួបរួម រវាងកូរ៉េទាំងពីរ ដែលវាជារឿងចម្រូងចម្រាសដែលមេដឹកនាំចិនមុនមិនដែរលើកមកនិយាយឡើយ។ នេះក៏ព្រោះថា ចិនមិនចង់បាត់បង់របបក្រុងព្យុងយ៉ាងទាល់តែសោះ។ តែលើកនេះចិនស្រាប់តែព្រមជជែករឿងនេះតែម្តង។ លោកស្រី ប៉ាក អរគុណសមភាគីចិន ដោយសារចិនពេលនេះយល់ច្បាស់ពីគោលជំហររបស់ក្រុងសេអ៊ូលកាន់តែច្រើនជាងមុនផង។
មួយទៀតកូរ៉េខាងត្បូងចង់ឲ្យចិនកាត់បន្ថយការគាំទ្រក្រុងព្យុយ៉ាង ដើម្បីងាយស្រួលទាញរបបដឹកនាំឯកោនោះមកជជែកបញ្ហាសន្តិសុខនិងកម្មវិធីនុយក្លេអ៊ែរផង។ ថ្មីៗកន្លងទៅចិននេះឯងបានរួមចំណែកច្រើនដែរក្នុងការជម្រុញភាគីកូរ៉េទាំងពីរបញ្ចៀសសង្គ្រាមនិងត្រលប់ទៅចរចាគ្នាវិញផង។ ចុងក្រោយក្រុងសេអ៊ូលរំពឹងថានឹងចាប់ដៃចិនធ្វើពាណិជ្ជកម្មថ្ងៃអនាគត។ អ្នកណាក៏ទទួលស្គាល់ថាវាពិតជាមិនអាចខ្វះចិនបានឡើយ ក្នុងការធ្វើពាណិជ្ជកម្មអន្តរជាតិ។ បើទុកឲ្យទំនាក់ទំនងជាមួយចិននៅស្ថិតក្នុងកម្រិតទាប កូរ៉េខាងត្បូងនឹងខាតបង់ច្រើនចៀសមិនផុត។ ផ្ទុយទៅវិញ ការស្ទុះស្ទាអញ្ជើញនិងទទួលស្វាគមន៍លោកស្រីប៉ាកយ៉ាងកក់ក្តៅពីសំណាក់ក្រុងប៉េកាំងនោះ ជាចេតនារបស់ចិនក្នុងការធ្វើឲ្យសម្ព័ន្ធភាពរវាងអាមេរិកនិងកូរ៉េខាងត្បូងថយចុះ ដែលវាបង្កភាពងាយស្រួលដល់ខ្លួនក្នុងការប្រជែងអាមេរិកនៅក្នុងតំបន់ផង។ ម្យ៉ាងចិនឆក់ឱកាសចាប់ដៃកូរ៉េខាងត្បូង ដោយសារចិននិងកូរ៉េខាងត្បូងសុទ្ធតែមិនត្រូវគ្នាជាមួយជប៉ុន។ ដោយសារ មហិច្ឆតាសាងកម្លាំងយោធារបស់រដ្ឋាភិបាលជប៉ុន កូរ៉េខាងត្បូងនិងចិនចាំបាច់ត្រូវរត់រកគ្នា៕
© រក្សាសិទ្ធិដោយ thmeythmey.com