ជាតិ
ស្រូវជិត ២០ម៉ឺនហិកតា នឹងរងការខូចខាត
× គ្រោះរាំងស្ងួត និងការកង្វះខាតប្រព័ន្ធធារាសាស្ត្រសម្រាប់ផ្គត់ផ្គង់ទឹកនៅកម្ពុជា ឆ្នាំនេះធ្វើឱ្យដំណាំស្រូវប្រមាណជិត ២០ម៉ឺន ហិកតានៅទូទាំងប្រទេសនឹងរងការខូចខាត ។ នេះបើយោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ កាលពីចុងខែសីហា។
របាយការណ៍ក្រសួងកសិកម្មដដែលបានឱ្យដឹងថា ដំណាំស្រូវប្រមាណជាង ១៨៥.៤៥១ហិកតា នៅទូទាំង១៣រាជធានី និងខេត្តរងការខូចខាតដោយសារគ្រោះរាំងស្ងួត និងដោយសារតែគ្មានប្រព័ន្ធធារាសាស្ត្រគ្រប់គ្រាន់សម្រាប់បង្ហូរទឹកក្នុងការស្រោចស្រពដំណាំ។
ថ្វីដ្បិតតែរបាយការណ៍នោះបញ្ជាក់អំពីផលប៉ះពាល់ពីគ្រោះរាំងស្ងួត ប៉ុន្តែក្រសួងបានអន្តរាគមន៍ទាន់ពេលនៅបណ្តាខេត្តខ្លះ តាមរយៈយន្តការដែលមានស្រាប់។ នេះបើតាមការអះអាងរបស់ លោក អ៊ាង សុផល្លែត អនុរដ្ឋលេខាធិការ និងជាអ្នកនាំពាក្យក្រសួងកសិកម្មរុក្ខាប្រមាញ់និងនេសាទ។
គួររំឮកផងដែរថា គិតត្រឹមដើមខែសីហា ឆ្នាំ២០១៥នេះ ដំណើរការនៃការបង្កបង្កើនផលស្រូវរដូវវស្សានៅទូទាំងប្រទេសសម្រេចបាន២.១២៣.៦២៩ហិកតាស្មើនឹងជាង៨២%នៃផែនការ។ ចំនួននេះតិចជាងឆ្នាំមុនជាង ៦០.៧៥១ហិកតាបើប្រៀបធៀបរយៈពេលដូចគ្នា។ នៅពេលនេះទឹកភ្លៀងបានធ្លាក់រាយប៉ាយនៅទូទាំងប្រទេសវិញហើយធ្វើឱ្យកសិករអាចដាំដុះឡើងវិញបានលើកលែងតែខេត្តប៉ៃលិនមួយប៉ុណ្ណោះដែលការដាំដុះនៅមានកម្រិតទាប៕
ប្រភព៖ AKP
© រក្សាសិទ្ធិដោយ thmeythmey.com